Texts

tatra pramāṇābhāsajaṃ jñānaṃ mithyājñānam uktaṃ saṃśayaviparyayādilakṣaṇam // (1) Par.?

śāstrāntarebhyo'pi tarhi saṃśayādinivṛtter aviśeṣaprasaṅga iti cen na śāstrāntarapraṇetṝṇām api viparyayānivṛttipratipādanād ācāryavaiśeṣyaprakaraṇe // (2) Par.?

tanna śāstrāntarebhyo'pi saṃśayādinivṛttiriti // (3) Par.?

kāmakrodhadveṣāḥ kaluṣaṃ tasyāpyajñāne 'ntarbhāvaḥ // (4) Par.?

kasmāt // (5) Par.?

avyaktāvasthāgamane pratyanīkatvāt // (6) Par.?

tadidaṃ saṃśayādi kaluṣaṃ ca saha bījena mithyājñānam ityucyate // (7) Par.?

dvitīyaṃ malaṃ darśayati adharmaśca iti // (8) Par.?

pāpmabījaṃ pāpam evātrādharma ityabhipretam // (9) Par.?

tasya savikārasyaikamalatvaṃ vikāravikāriṇorananyatvād iti // (10) Par.?

saty apy ajñānakaluṣasaṅgacyutihetor adharmatve pāpākhya evātrādharmo 'bhipreta iti caḥ sūcayati // (11) Par.?

tṛtīyaṃ malam āha // (12) Par.?

saktihetuḥ iti // (13) Par.?

saktiḥ saṅgaḥ viṣayāsaktilakṣaṇasukhaṃ bhāṣye sukhābhimāna ityanenoktam // (14) Par.?

tasyaiva lakṣaṇārthaṃ bhāṣyam avivecanamiśraṇapreraṇalakṣaṇo vanagajavat iti // (15) Par.?

tasya saṅgasya hetus tanmayakaraṇaṃ vidhyantaropārjito dharmaḥ saṅgakara iti ya uktaḥ saha vikāreṇāsau tṛtīyo mala iti // (16) Par.?

caturthaṃ malam āha // (17) Par.?

cyutis tathā iti // (18) Par.?

rudratattvādīṣaccittaṃ cyavate viṣayaṃ na prāpnoti taccittacyavanaṃ cyutir ityucyate // (19) Par.?

tathāśabdaḥ samānārthe // (20) Par.?

yathā mithyājñānasya svabījena saha malatvam adharmasaṅgakarayoś ca savikāreṇa tathā cyuterapi ūṣmavad avasthitādharmākhyena svabījena saha malatvam iti // (21) Par.?

atra bhāṣyavirodhānna mithyājñānakaluṣapāpmasaṅgacyutayaḥ puruṣasya bhāvāś cittavidyayor vā // (22) Par.?

nāpi kaluṣamicchāyā bhāvaḥ kiṃtvadharmavikārā evaite jñānecchābhyāṃ saha kṣīrodakavad abhinnā iva gṛhyante // (23) Par.?

tathā ca satkāryavicāre prapañcitametad iti // (24) Par.?

pañcamaṃ malamāha paśutvam iti // (25) Par.?

dharmādharmavyatiriktaḥ pratighātānumeyaḥ puruṣaguṇaḥ paśutvam // (26) Par.?

tasya caturdaśalakṣaṇopetasya malatvam // (27) Par.?

tāni ca lakṣaṇāny asarvajñatvādīny apatitvāntāni sarvajñatvādiviparyayeṇaiva vyākhyātānīti // (28) Par.?

taccetthaṃbhūtaṃ paśutvaṃ saṃsārasyānādikāraṇaṃ pradhānabhūtam ityevaṃ matvāha mūlamiti // (29) Par.?

tathāhi kaivalyagatānāmanyamalābhāve 'pi paśutvādeva punaḥ saṃsārāpattiriti // (30) Par.?

pañca iti nyūnādhikavyavacchedenopasaṃhārārtham // (31) Par.?

ete ityavadhāraṇārtham // (32) Par.?

ete eva saṃsārabandhātmakā malā na tu śāstrāntaroktā bhoktṛbhogyasambandhādaya ityarthaḥ // (33) Par.?

kva punaritthaṃbhūtā malāḥ prasiddhā ityāha // (34) Par.?

tantre sākṣān maheśvarapraṇītam athaśabdādi śivāntaṃ śāstraṃ tantraṃ tasminnete pratipāditā ityarthaḥ // (35) Par.?

dharmajñānāderapi tyajyamānatvād adharmāderiva malatvaṃ prāptamityāśaṅkyāha heyādhikārataḥ iti // (36) Par.?

yeṣāṃ kardamādivadduḥkhahetutvaṃ matvā sādhakaḥ kṣapaṇārtham adhikriyate ta eva malā na tu yeṣāṃ puṣpādivad anicchato'pi vināśa ityato heyādhikārād ajñānādaya eva malā iti // (37) Par.?

heyādhikārikā iti vā pāṭhastatrāpyayam arthaḥ // (38) Par.?

heyatvena kṣapaṇīyatvenādhikāro yogyatāsti yeṣāṃ te heyādhikāriṇasta eva heyādhikārikāḥ // (39) Par.?

svārthe kapratyayaḥ // (40) Par.?

adhikāraśabdād vā ikaṅpratyaye kṛte heyapadena karmadhārayas tadayamartho yato heyādhikārikā evātra malā vivakṣitāḥ // (41) Par.?

tasmānna dharmajñānavairāgyādayo'pi malā iti // (42) Par.?

ityetatsarvamākhyātaṃ saṃkṣipyābdhisamaṃ mayā / (43.1) Par.?

ācāryāṇāṃ prasādena jñānaṃ pañcārthalakṣaṇam // (43.2) Par.?

kiṃ jñātairbahubhiḥ śāstraiḥ svānuṣṭhānāpahāribhiḥ / (44.1) Par.?

idamevottamaṃ jñātvā yogābhyāsaratirbhavet // (44.2) Par.?

kṛtakṛtyaṃ svamātmānaṃ śrutvaitanmanyate tu yaḥ / (45.1) Par.?

tasmai deyamidaṃ jñānaṃ nānyasmin siddhimicchatā // (45.2) Par.?

yastu maryādāhīnebhyo dadyātkenāpi hetunā / (46.1) Par.?

sa guhyabhedato gacchetsaha śiṣyairadhogatim // (46.2) Par.?

namaḥ sadgurave tasmai sarvavidyāntagāmine / (47.1) Par.?

sacchlokair aṣṭabhir yena pañcārthābdhiḥ pradarśitaḥ // (47.2) Par.?