Texts

trayo guṇāḥ sukhaduḥkhamohā asyeti triguṇam / (1.1) Par.?

tad anena sukhādīnām ātmaguṇatvam parābhimatam apākṛtam / (1.2) Par.?

aviveki / (1.3) Par.?

yathā pradhānam svato na vivicyata evam mahadādayo 'pi na pradhānād vivicyante tadātmakatvāt / (1.4) Par.?

athavā sambhūyakāritāvivekaḥ / (1.5) Par.?

na hi kiṃcid ekam paryāptam kārye 'pi tu sambhūya / (1.6) Par.?

ye tvāhur vijñānam eva harṣaviṣādaśabdādyākāram na punar ito 'nyastaddharmeti tān pratyāha viṣaya iti / (1.7) Par.?

viṣayo grāhyo vijñānād bahir iti yāvat / (1.8) Par.?

sāmānyam sādhāraṇam / (1.9) Par.?

vijñānarūpatve tvasādhāraṇyād vijñānānām vṛttirūpāṇām te 'pyasādhāraṇāḥ syuḥ / (1.10) Par.?

tathā ca nartakībhrūlatābhaṅga ekasmin bahūnām pratisaṃdhānam yuktam / (1.11) Par.?

anyathā tanna syād iti bhāvaḥ / (1.12) Par.?

acetanam / (1.13) Par.?

sarva eva pradhānabuddhyādayo 'cetanā na tu vaināśikavaccaitanyam buddher ityarthaḥ / (1.14) Par.?

prasavadharmi / (1.15) Par.?

prasavarūpo dharmaḥ so 'syāsti prasavadharmi / (1.16) Par.?

prasavadharmeti vaktavye matvarthīyaḥ prasavadharmasya nityayogam ākhyātum / (1.17) Par.?

sarūpavirūpapariṇāmābhyām na kadācid api viyujyata ityarthaḥ / (1.18) Par.?

vyaktavṛttam avyakte 'tidiśati tathā pradhānam / (1.19) Par.?

ābhyām vaidharmyam puruṣasyāha tadviparītaḥ pumān / (1.20) Par.?

syād etat / (1.21) Par.?

ahetumannityatvādi pradhānasādharmyam asti puruṣasya evam anekatvam vyaktasādharmyam / (1.22) Par.?

tat katham ucyate tadviparītaḥ pumān iti / (1.23) Par.?

ata āha tathā ca / (1.24) Par.?

cakāro 'pyarthaḥ / (1.25) Par.?

yadyapyahetumattvādi sādharmyam tathāpyatraiguṇyādi vaiparītyam ityarthaḥ / (1.26) Par.?

triguṇam ity uktam / (1.27) Par.?

tatra ke te guṇās trayaḥ kim ca tadupalakṣitam iti / (1.28) Par.?

ata āha // (1.29) Par.?