Texts

yā triṣaptaiḥ punar eti nānā rūpāṇi bibhratī / (1.1) Par.?

vācaspatir balā tasyā āre hetiṃ dadhātu mat // (1.2) Par.?

vācā nuttā kṛtyā dindramatī jāgratā svapate kṛtā / (2.1) Par.?

nuttā pākasya śaṃsena pratyak kartāram ṛcchatu // (2.2) Par.?

yad etad bhūri spardhase kṛtyāsmīti manyase / (3.1) Par.?

pratīcīnā paretya viṣād iva viṣam addhi tat // (3.2) Par.?

pareṇaitv aghaśaṃso mainena sam arāmahi / (4.1) Par.?

dyauś cāsmān pṛthivī cobhe pātām aṃhasaḥ // (4.2) Par.?

yava yāvayāsmad dveṣāṃsi yavamayena haviṣā / (5.1) Par.?

durhārde cakruṣe kṛtyāṃ grīvāsu prati muñcata // (5.2) Par.?

anyā vo anyām avatv anyānyasyā upāvata / (6.1) Par.?

aśvā iva pravalgantīḥ kṛtyāṃ hatauṣadhayo 'rātiṃ hatauṣadhayaḥ // (6.2) Par.?

mehopa gā mopa raṃsthāḥ pathāṃ durgāṇy anv ihi / (7.1) Par.?

sapatni naśyatād ito dūraṃ gacchādhy okasaḥ // (7.2) Par.?

yasyās te nāma gṛhṇāmi yāsminn ā ramase jane / (8.1) Par.?

ā parasyāḥ parāvataḥ sapatnīṃ nāśayāmasi // (8.2) Par.?

triṃśataṃ trīṃś ca parvatāṃś caturaś ca girīn ati / (9.1) Par.?

sapatnīṃ brahmaṇaspate paro bhrūṇāny arpaya // (9.2) Par.?

un mādayata marutaḥ samudriyā ud dyāvāpṛthivī ubhe / (10.1) Par.?

ut tvā samudro 'rṣatu tvām agnir ayaṃ dahāt // (10.2) Par.?

yat sapatnī sapatnyā amuṣyā varca ā dade / (11.1) Par.?

adhastād upavādiny asau syād aham uttarāt // (11.2) Par.?

ā te badhnāmy oṣadhiṃ sapatnībhyaḥ pracātanīm / (12.1) Par.?

yathā te 'sad ayaṃ patiḥ putrāṇāṃ te bhavat pitā // (12.2) Par.?

yāny ṛṇāny anuvartāny asmin yamasya yena balinā carāmi / (13.1) Par.?

idaṃ tad agne anṛṇo bhavāmīdaṃ tad agne avadānam astu // (13.2) Par.?

yās te sapta pravato yā u tisro yās te santi nivato yā abhīvataḥ / (14.1) Par.?

arvāvato aṣṭadhā trīṇi rocanā tās te agne saṃmanaso bhavantu jānan yamāya ni vahā kusīdam // (14.2) Par.?

yās ta ūrdhvās tanvo jātavedo yās tiraścīr uta yā anūcīḥ / (15.1) Par.?

tābhiṣ ṭvam agne sayujā gṛṇāno jānan yamāya ni vahā kusīdam // (15.2) Par.?