Texts

medhāvī tu tato dhyātvā sa kiṃcid idam uttamam / (1.1) Par.?

labdhasaṃjñas tatas taṃ tu vedajño nṛpam abravīt // (1.2) Par.?

iṣṭiṃ te 'haṃ kariṣyāmi putrīyāṃ putrakāraṇāt / (2.1) Par.?

atharvaśirasi proktair mantraiḥ siddhāṃ vidhānataḥ // (2.2) Par.?

tataḥ prākramad iṣṭiṃ tāṃ putrīyāṃ putrakāraṇāt / (3.1) Par.?

juhāva cāgnau tejasvī mantradṛṣṭena karmaṇā // (3.2) Par.?

tato devāḥ sagandharvāḥ siddhāś ca paramarṣayaḥ / (4.1) Par.?

bhāgapratigrahārthaṃ vai samavetā yathāvidhi // (4.2) Par.?

tāḥ sametya yathānyāyaṃ tasmin sadasi devatāḥ / (5.1) Par.?

abruvaṃl lokakartāraṃ brahmāṇaṃ vacanaṃ mahat // (5.2) Par.?

bhagavaṃs tvatprasādena rāvaṇo nāma rākṣasaḥ / (6.1) Par.?

sarvānno bādhate vīryāc chāsituṃ taṃ na śaknumaḥ // (6.2) Par.?

tvayā tasmai varo dattaḥ prītena bhagavan purā / (7.1) Par.?

mānayantaś ca taṃ nityaṃ sarvaṃ tasya kṣamāmahe // (7.2) Par.?

udvejayati lokāṃs trīn ucchritān dveṣṭi durmatiḥ / (8.1) Par.?

śakraṃ tridaśarājānaṃ pradharṣayitum icchati // (8.2) Par.?

ṛṣīn yakṣān sagandharvān asurān brāhmaṇāṃs tathā / (9.1) Par.?

atikrāmati durdharṣo varadānena mohitaḥ // (9.2) Par.?

nainaṃ sūryaḥ pratapati pārśve vāti na mārutaḥ / (10.1) Par.?

calormimālī taṃ dṛṣṭvā samudro 'pi na kampate // (10.2) Par.?

tan manan no bhayaṃ tasmād rākṣasād ghoradarśanāt / (11.1) Par.?

vadhārthaṃ tasya bhagavann upāyaṃ kartum arhasi // (11.2) Par.?

evam uktaḥ suraiḥ sarvaiś cintayitvā tato 'bravīt / (12.1) Par.?

hantāyaṃ vihitas tasya vadhopāyo durātmanaḥ // (12.2) Par.?

tena gandharvayakṣāṇāṃ devadānavarakṣasām / (13.1) Par.?

avadhyo 'smīti vāg uktā tathety uktaṃ ca tan mayā // (13.2) Par.?

nākīrtayad avajñānāt tad rakṣo mānuṣāṃs tadā / (14.1) Par.?

tasmāt sa mānuṣād vadhyo mṛtyur nānyo 'sya vidyate // (14.2) Par.?

etac chrutvā priyaṃ vākyaṃ brahmaṇā samudāhṛtam / (15.1) Par.?

devā maharṣayaḥ sarve prahṛṣṭās te 'bhavaṃs tadā // (15.2) Par.?

etasminn antare viṣṇur upayāto mahādyutiḥ / (16.1) Par.?

brahmaṇā ca samāgamya tatra tasthau samāhitaḥ // (16.2) Par.?

tam abruvan surāḥ sarve samabhiṣṭūya saṃnatāḥ / (17.1) Par.?

tvāṃ niyokṣyāmahe viṣṇo lokānāṃ hitakāmyayā // (17.2) Par.?

rājño daśarathasya tvam ayodhyādhipater vibho / (18.1) Par.?

dharmajñasya vadānyasya maharṣisamatejasaḥ / (18.2) Par.?

tasya bhāryāsu tisṛṣu hrīśrīkīrtyupamāsu ca // (18.3) Par.?

tatra tvaṃ mānuṣo bhūtvā pravṛddhaṃ lokakaṇṭakam / (19.1) Par.?

avadhyaṃ daivatair viṣṇo samare jahi rāvaṇam // (19.2) Par.?

sa hi devān sagandharvān siddhāṃś ca ṛṣisattamān / (20.1) Par.?

rākṣaso rāvaṇo mūrkho vīryotsekena bādhate // (20.2) Par.?

tad uddhataṃ rāvaṇam ṛddhatejasaṃ pravṛddhadarpaṃ tridaśeśvaradviṣam / (21.1) Par.?

virāvaṇaṃ sādhu tapasvikaṇṭakaṃ tapasvinām uddhara taṃ bhayāvaham // (21.2) Par.?