Texts

uṣitvā rajanīṃ tatra rājaputrāv ariṃdamau / (1.1) Par.?

maharṣim abhivādyātha jagmatus taṃ giriṃ prati // (1.2) Par.?

prasthitāṃś caiva tān prekṣya pitā putrān ivānvagāt / (2.1) Par.?

tataḥ pracakrame vaktuṃ vacanaṃ sa mahāmuniḥ // (2.2) Par.?

athāsādya tu kālindīṃ śīghrasrotasam āpagām / (3.1) Par.?

tatra yūyaṃ plavaṃ kṛtvā taratāṃśumatīṃ nadīm // (3.2) Par.?

tato nyagrodham āsādya mahāntaṃ haritacchadam / (4.1) Par.?

vivṛddhaṃ bahubhir vṛkṣaiḥ śyāmaṃ siddhopasevitam // (4.2) Par.?

krośamātraṃ tato gatvā nīlaṃ drakṣyatha kānanam / (5.1) Par.?

palāśabadarīmiśraṃ rāma vaṃśaiś ca yāmunaiḥ // (5.2) Par.?

sa panthāś citrakūṭasya gataḥ subahuśo mayā / (6.1) Par.?

ramyo mārdavayuktaś ca vanadāvair vivarjitaḥ / (6.2) Par.?

iti panthānam āvedya maharṣiḥ sa nyavartata // (6.3) Par.?

upāvṛtte munau tasmin rāmo lakṣmaṇam abravīt / (7.1) Par.?

kṛtapuṇyāḥ sma saumitre munir yan no 'nukampate // (7.2) Par.?

iti tau puruṣavyāghrau mantrayitvā manasvinau / (8.1) Par.?

sītām evāgrataḥ kṛtvā kālindīṃ jagmatur nadīm // (8.2) Par.?

tau kāṣṭhasaṃghāṭam atho cakratuḥ sumahāplavam / (9.1) Par.?

cakāra lakṣmaṇaś chittvā sītāyāḥ sukham āsanam // (9.2) Par.?

tatra śriyam ivācintyāṃ rāmo dāśarathiḥ priyām / (10.1) Par.?

īṣat saṃlajjamānāṃ tām adhyāropayata plavam // (10.2) Par.?

tataḥ plavenāṃśumatīṃ śīghragām ūrmimālinīm / (11.1) Par.?

tīrajair bahubhir vṛkṣaiḥ saṃterur yamunāṃ nadīm // (11.2) Par.?

te tīrṇāḥ plavam utsṛjya prasthāya yamunāvanāt / (12.1) Par.?

śyāmaṃ nyagrodham āseduḥ śītalaṃ haritacchadam // (12.2) Par.?

kausalyāṃ caiva paśyeyaṃ sumitrāṃ ca yaśasvinīm / (13.1) Par.?

iti sītāñjaliṃ kṛtvā paryagacchad vanaspatim // (13.2) Par.?

krośamātraṃ tato gatvā bhrātarau rāmalakṣmaṇau / (14.1) Par.?

bahūn medhyān mṛgān hatvā ceratur yamunāvane // (14.2) Par.?

vihṛtya te barhiṇapūganādite śubhe vane vāraṇavānarāyute / (15.1) Par.?

samaṃ nadīvapram upetya saṃmataṃ nivāsam ājagmur adīnadarśanāḥ // (15.2) Par.?