Texts

aṅgadasya vacaḥ śrutvā sugrīvaḥ sacivaiḥ saha / (1.1) Par.?

lakṣmaṇaṃ kupitaṃ śrutvā mumocāsanam ātmavān // (1.2) Par.?

sacivān abravīd vākyaṃ niścitya gurulāghavam / (2.1) Par.?

mantrajñān mantrakuśalo mantreṣu pariniṣṭhitaḥ // (2.2) Par.?

na me durvyāhṛtaṃ kiṃcin nāpi me duranuṣṭhitam / (3.1) Par.?

lakṣmaṇo rāghavabhrātā kruddhaḥ kim iti cintaye // (3.2) Par.?

asuhṛdbhir mamāmitrair nityam antaradarśibhiḥ / (4.1) Par.?

mama doṣān asaṃbhūtāñ śrāvito rāghavānujaḥ // (4.2) Par.?

atra tāvad yathābuddhi sarvair eva yathāvidhi / (5.1) Par.?

bhavadbhir niścayas tasya vijñeyo nipuṇaṃ śanaiḥ // (5.2) Par.?

na khalvasti mama trāso lakṣmaṇānnāpi rāghavāt / (6.1) Par.?

mitraṃ tv asthānakupitaṃ janayatyeva sambhramam // (6.2) Par.?

sarvathā sukaraṃ mitraṃ duṣkaraṃ paripālanam / (7.1) Par.?

anityatvāt tu cittānāṃ prītir alpe 'pi bhidyate // (7.2) Par.?

atonimittaṃ trasto 'haṃ rāmeṇa tu mahātmanā / (8.1) Par.?

yan mamopakṛtaṃ śakyaṃ pratikartuṃ na tan mayā // (8.2) Par.?

sugrīveṇaivam uktas tu hanumān haripuṃgavaḥ / (9.1) Par.?

uvāca svena tarkeṇa madhye vānaramantriṇām // (9.2) Par.?

sarvathā naitad āścaryaṃ yat tvaṃ harigaṇeśvara / (10.1) Par.?

na vismarasi susnigdham upakārakṛtaṃ śubham // (10.2) Par.?

rāghaveṇa tu śūreṇa bhayam utsṛjya dūrataḥ / (11.1) Par.?

tvatpriyārthaṃ hato vālī śakratulyaparākramaḥ // (11.2) Par.?

sarvathā praṇayāt kruddho rāghavo nātra saṃśayaḥ / (12.1) Par.?

bhrātaraṃ sa prahitavāṃllakṣmaṇaṃ lakṣmivardhanam // (12.2) Par.?

tvaṃ pramatto na jānīṣe kālaṃ kalavidāṃ vara / (13.1) Par.?

phullasaptacchadaśyāmā pravṛttā tu śaracchivā // (13.2) Par.?

nirmalagrahanakṣatrā dyauḥ pranaṣṭabalāhakā / (14.1) Par.?

prasannāś ca diśaḥ sarvāḥ saritaś ca sarāṃsi ca // (14.2) Par.?

prāptam udyogakālaṃ tu nāvaiṣi haripuṃgava / (15.1) Par.?

tvaṃ pramatta iti vyaktaṃ lakṣmaṇo 'yam ihāgataḥ // (15.2) Par.?

ārtasya hṛtadārasya paruṣaṃ puruṣāntarāt / (16.1) Par.?

vacanaṃ marṣaṇīyaṃ te rāghavasya mahātmanaḥ // (16.2) Par.?

kṛtāparādhasya hi te nānyat paśyāmy ahaṃ kṣamam / (17.1) Par.?

antareṇāñjaliṃ baddhvā lakṣmaṇasya prasādanāt // (17.2) Par.?

niyuktair mantribhir vācyo 'vaśyaṃ pārthivo hitam / (18.1) Par.?

ata eva bhayaṃ tyaktvā bravīmy avadhṛtaṃ vacaḥ // (18.2) Par.?

abhikruddhaḥ samartho hi cāpam udyamya rāghavaḥ / (19.1) Par.?

sadevāsuragandharvaṃ vaśe sthāpayituṃ jagat // (19.2) Par.?

na sa kṣamaḥ kopayituṃ yaḥ prasādya punar bhavet / (20.1) Par.?

pūrvopakāraṃ smaratā kṛtajñena viśeṣataḥ // (20.2) Par.?

tasya mūrdhnā praṇamya tvaṃ saputraḥ sasuhṛjjanaḥ / (21.1) Par.?

rājaṃs tiṣṭha svasamaye bhartur bhāryeva tadvaśe // (21.2) Par.?

na rāmarāmānujaśāsanaṃ tvayā kapīndrayuktaṃ manasāpy apohitum / (22.1) Par.?

mano hi te jñāsyati mānuṣaṃ balaṃ sarāghavasyāsya surendravarcasaḥ // (22.2) Par.?