Texts

duryodhana uvāca / (1.1) Par.?

ehi kṣattar draupadīm ānayasva priyāṃ bhāryāṃ saṃmatāṃ pāṇḍavānām / (1.2) Par.?

saṃmārjatāṃ veśma paraitu śīghram ānando naḥ saha dāsībhir astu // (1.3) Par.?

vidura uvāca / (2.1) Par.?

durvibhāvyaṃ bhavati tvādṛśena na manda saṃbudhyasi pāśabaddhaḥ / (2.2) Par.?

prapāte tvaṃ lambamāno na vetsi vyāghrānmṛgaḥ kopayase 'tibālyāt // (2.3) Par.?

āśīviṣāḥ śirasi te pūrṇakośā mahāviṣāḥ / (3.1) Par.?

mā kopiṣṭhāḥ sumandātmanmā gamastvaṃ yamakṣayam // (3.2) Par.?

na hi dāsītvam āpannā kṛṣṇā bhavati bhārata / (4.1) Par.?

anīśena hi rājñaiṣā paṇe nyasteti me matiḥ // (4.2) Par.?

ayaṃ dhatte veṇur ivātmaghātī phalaṃ rājā dhṛtarāṣṭrasya putraḥ / (5.1) Par.?

dyūtaṃ hi vairāya mahābhayāya pakvo na budhyatyayam antakāle // (5.2) Par.?

nāruṃtudaḥ syānna nṛśaṃsavādī na hīnataḥ param abhyādadīta / (6.1) Par.?

yayāsya vācā para udvijeta na tāṃ vaded ruśatīṃ pāpalokyām // (6.2) Par.?

samuccarantyativādā hi vaktrād yair āhataḥ śocati rātryahāni / (7.1) Par.?

parasya nāmarmasu te patanti tān paṇḍito nāvasṛjet pareṣu // (7.2) Par.?

ajo hi śastram akhanat kilaikaḥ śastre vipanne padbhir apāsya bhūmim / (8.1) Par.?

nikṛntanaṃ svasya kaṇṭhasya ghoraṃ tadvad vairaṃ mā khanīḥ pāṇḍuputraiḥ // (8.2) Par.?

na kiṃcid īḍyaṃ pravadanti pāpaṃ vanecaraṃ vā gṛhamedhinaṃ vā / (9.1) Par.?

tapasvinaṃ saṃparipūrṇavidyaṃ bhaṣanti haivaṃ śvanarāḥ sadaiva // (9.2) Par.?

dvāraṃ sughoraṃ narakasya jihmaṃ na budhyase dhṛtarāṣṭrasya putra / (10.1) Par.?

tvām anvetāro bahavaḥ kurūṇāṃ dyūtodaye saha duḥśāsanena // (10.2) Par.?

majjantyalābūni śilāḥ plavante muhyanti nāvo 'mbhasi śaśvad eva / (11.1) Par.?

mūḍho rājā dhṛtarāṣṭrasya putro na me vācaḥ pathyarūpāḥ śṛṇoti // (11.2) Par.?

anto nūnaṃ bhavitāyaṃ kurūṇāṃ sudāruṇaḥ sarvaharo vināśaḥ / (12.1) Par.?

vācaḥ kāvyāḥ suhṛdāṃ pathyarūpā na śrūyante vardhate lobha eva // (12.2) Par.?