Texts

vaiśaṃpāyana uvāca / (1.1) Par.?

jāmadagnyavacaḥ śrutvā kaṇvo 'pi bhagavān ṛṣiḥ / (1.2) Par.?

duryodhanam idaṃ vākyam abravīt kurusaṃsadi // (1.3) Par.?

akṣayaścāvyayaścaiva brahmā lokapitāmahaḥ / (2.1) Par.?

tathaiva bhagavantau tau naranārāyaṇāv ṛṣī // (2.2) Par.?

ādityānāṃ hi sarveṣāṃ viṣṇur ekaḥ sanātanaḥ / (3.1) Par.?

ajayyaścāvyayaścaiva śāśvataḥ prabhur īśvaraḥ // (3.2) Par.?

nimittamaraṇāstvanye candrasūryau mahī jalam / (4.1) Par.?

vāyur agnistathākāśaṃ grahāstārāgaṇāstathā // (4.2) Par.?

te ca kṣayānte jagato hitvā lokatrayaṃ sadā / (5.1) Par.?

kṣayaṃ gacchanti vai sarve sṛjyante ca punaḥ punaḥ // (5.2) Par.?

muhūrtamaraṇāstvanye mānuṣā mṛgapakṣiṇaḥ / (6.1) Par.?

tiryagyonyaśca ye cānye jīvalokacarāḥ smṛtāḥ // (6.2) Par.?

bhūyiṣṭhena tu rājānaḥ śriyaṃ bhuktvāyuṣaḥ kṣaye / (7.1) Par.?

maraṇaṃ pratigacchanti bhoktuṃ sukṛtaduṣkṛtam // (7.2) Par.?

sa bhavān dharmaputreṇa śamaṃ kartum ihārhati / (8.1) Par.?

pāṇḍavāḥ kuravaścaiva pālayantu vasuṃdharām // (8.2) Par.?

balavān aham ityeva na mantavyaṃ suyodhana / (9.1) Par.?

balavanto hi balibhir dṛśyante puruṣarṣabha // (9.2) Par.?

na balaṃ balināṃ madhye balaṃ bhavati kaurava / (10.1) Par.?

balavanto hi te sarve pāṇḍavā devavikramāḥ // (10.2) Par.?

atrāpyudāharantīmam itihāsaṃ purātanam / (11.1) Par.?

mātaler dātukāmasya kanyāṃ mṛgayato varam // (11.2) Par.?

matastrailokyarājasya mātalir nāma sārathiḥ / (12.1) Par.?

tasyaikaiva kule kanyā rūpato lokaviśrutā // (12.2) Par.?

guṇakeśīti vikhyātā nāmnā sā devarūpiṇī / (13.1) Par.?

śriyā ca vapuṣā caiva striyo 'nyāḥ sātiricyate // (13.2) Par.?

tasyāḥ pradānasamayaṃ mātaliḥ saha bhāryayā / (14.1) Par.?

jñātvā vimamṛśe rājaṃstatparaḥ paricintayan // (14.2) Par.?

dhik khalvalaghuśīlānām ucchritānāṃ yaśasvinām / (15.1) Par.?

narāṇām ṛddhasattvānāṃ kule kanyāprarohaṇam // (15.2) Par.?

mātuḥ kulaṃ pitṛkulaṃ yatra caiva pradīyate / (16.1) Par.?

kulatrayaṃ saṃśayitaṃ kurute kanyakā satām // (16.2) Par.?

devamānuṣalokau dvau mānasenaiva cakṣuṣā / (17.1) Par.?

avagāhyaiva vicitau na ca me rocate varaḥ // (17.2) Par.?

na devānnaiva ditijānna gandharvānna mānuṣān / (18.1) Par.?

arocayaṃ varakṛte tathaiva bahulān ṛṣīn // (18.2) Par.?

bhāryayā tu sa saṃmantrya saha rātrau sudharmayā / (19.1) Par.?

mātalir nāgalokāya cakāra gamane matim // (19.2) Par.?

na me devamanuṣyeṣu guṇakeśyāḥ samo varaḥ / (20.1) Par.?

rūpato dṛśyate kaścinnāgeṣu bhavitā dhruvam // (20.2) Par.?

ityāmantrya sudharmāṃ sa kṛtvā cābhipradakṣiṇam / (21.1) Par.?

kanyāṃ śirasyupāghrāya praviveśa mahītalam // (21.2) Par.?