Texts

saṃjaya uvāca / (1.1) Par.?

taṃ pātitaṃ tato dṛṣṭvā mahāśālam ivodgatam / (1.2) Par.?

prahṛṣṭamanasaḥ sarve babhūvustatra pāṇḍavāḥ // (1.3) Par.?

unmattam iva mātaṅgaṃ siṃhena vinipātitam / (2.1) Par.?

dadṛśur hṛṣṭaromāṇaḥ sarve te cāpi somakāḥ // (2.2) Par.?

tato duryodhanaṃ hatvā bhīmasenaḥ pratāpavān / (3.1) Par.?

patitaṃ kauravendraṃ tam upagamyedam abravīt // (3.2) Par.?

gaur gaur iti purā manda draupadīm ekavāsasam / (4.1) Par.?

yat sabhāyāṃ hasann asmāṃstadā vadasi durmate / (4.2) Par.?

tasyāvahāsasya phalam adya tvaṃ samavāpnuhi // (4.3) Par.?

evam uktvā sa vāmena padā maulim upāspṛśat / (5.1) Par.?

śiraśca rājasiṃhasya pādena samaloḍayat // (5.2) Par.?

tathaiva krodhasaṃrakto bhīmaḥ parabalārdanaḥ / (6.1) Par.?

punar evābravīd vākyaṃ yat tacchṛṇu narādhipa // (6.2) Par.?

ye 'smān puro 'panṛtyanta punar gaur iti gaur iti / (7.1) Par.?

tān vayaṃ pratinṛtyāmaḥ punar gaur iti gaur iti // (7.2) Par.?

nāsmākaṃ nikṛtir vahnir nākṣadyūtaṃ na vañcanā / (8.1) Par.?

svabāhubalam āśritya prabādhāmo vayaṃ ripūn // (8.2) Par.?

so 'vāpya vairasya parasya pāraṃ vṛkodaraḥ prāha śanaiḥ prahasya / (9.1) Par.?

yudhiṣṭhiraṃ keśavasṛñjayāṃśca dhanaṃjayaṃ mādravatīsutau ca // (9.2) Par.?

rajasvalāṃ draupadīm ānayan ye ye cāpyakurvanta sadasyavastrām / (10.1) Par.?

tān paśyadhvaṃ pāṇḍavair dhārtarāṣṭrān raṇe hatāṃstapasā yājñasenyāḥ // (10.2) Par.?

ye naḥ purā ṣaṇḍhatilān avocan krūrā rājño dhṛtarāṣṭrasya putrāḥ / (11.1) Par.?

te no hatāḥ sagaṇāḥ sānubandhāḥ kāmaṃ svargaṃ narakaṃ vā vrajāmaḥ // (11.2) Par.?

punaśca rājñaḥ patitasya bhūmau sa tāṃ gadāṃ skandhagatāṃ nirīkṣya / (12.1) Par.?

vāmena pādena śiraḥ pramṛdya duryodhanaṃ naikṛtiketyavocat // (12.2) Par.?

hṛṣṭena rājan kurupārthivasya kṣudrātmanā bhīmasenena pādam / (13.1) Par.?

dṛṣṭvā kṛtaṃ mūrdhani nābhyanandan dharmātmānaḥ somakānāṃ prabarhāḥ // (13.2) Par.?

tava putraṃ tathā hatvā katthamānaṃ vṛkodaram / (14.1) Par.?

nṛtyamānaṃ ca bahuśo dharmarājo 'bravīd idam // (14.2) Par.?

mā śiro 'sya padā mardīr mā dharmaste 'tyagānmahān / (15.1) Par.?

rājā jñātir hataścāyaṃ naitannyāyyaṃ tavānagha // (15.2) Par.?

vidhvasto 'yaṃ hatāmātyo hatabhrātā hataprajaḥ / (16.1) Par.?

utsannapiṇḍo bhrātā ca naitannyāyyaṃ kṛtaṃ tvayā // (16.2) Par.?

dhārmiko bhīmaseno 'sāvityāhustvāṃ purā janāḥ / (17.1) Par.?

sa kasmād bhīmasena tvaṃ rājānam adhitiṣṭhasi // (17.2) Par.?

dṛṣṭvā duryodhanaṃ rājā kuntīputrastathāgatam / (18.1) Par.?

netrābhyām aśrupūrṇābhyām idaṃ vacanam abravīt // (18.2) Par.?

nūnam etad balavatā dhātrādiṣṭaṃ mahātmanā / (19.1) Par.?

yad vayaṃ tvāṃ jighāṃsāmastvaṃ cāsmān kurusattama // (19.2) Par.?

ātmano hyaparādhena mahad vyasanam īdṛśam / (20.1) Par.?

prāptavān asi yal lobhānmadād bālyācca bhārata // (20.2) Par.?

ghātayitvā vayasyāṃśca bhrātṝn atha pitṝṃstathā / (21.1) Par.?

putrān pautrāṃstathācāryāṃstato 'si nidhanaṃ gataḥ // (21.2) Par.?

tavāparādhād asmābhir bhrātaraste mahārathāḥ / (22.1) Par.?

nihatā jñātayaścānye diṣṭaṃ manye duratyayam // (22.2) Par.?

snuṣāśca prasnuṣāścaiva dhṛtarāṣṭrasya vihvalāḥ / (23.1) Par.?

garhayiṣyanti no nūnaṃ vidhavāḥ śokakarśitāḥ // (23.2) Par.?

evam uktvā suduḥkhārto niśaśvāsa sa pārthivaḥ / (24.1) Par.?

vilalāpa ciraṃ cāpi dharmaputro yudhiṣṭhiraḥ // (24.2) Par.?