Texts

yudhiṣṭhira uvāca / (1.1) Par.?

śrutaṃ dānaphalaṃ tāta yat tvayā parikīrtitam / (1.2) Par.?

annaṃ tu te viśeṣeṇa praśastam iha bhārata // (1.3) Par.?

pānīyadānaṃ paramaṃ kathaṃ ceha mahāphalam / (2.1) Par.?

ityetacchrotum icchāmi vistareṇa pitāmaha // (2.2) Par.?

bhīṣma uvāca / (3.1) Par.?

hanta te vartayiṣyāmi yathāvad bharatarṣabha / (3.2) Par.?

gadatastanmamādyeha śṛṇu satyaparākrama / (3.3) Par.?

pānīyadānāt prabhṛti sarvaṃ vakṣyāmi te 'nagha // (3.4) Par.?

yad annaṃ yacca pānīyaṃ sampradāyāśnute naraḥ / (4.1) Par.?

na tasmāt paramaṃ dānaṃ kiṃcid astīti me matiḥ // (4.2) Par.?

annāt prāṇabhṛtastāta pravartante hi sarvaśaḥ / (5.1) Par.?

tasmād annaṃ paraṃ loke sarvadāneṣu kathyate // (5.2) Par.?

annād balaṃ ca tejaśca prāṇināṃ vardhate sadā / (6.1) Par.?

annadānam atastasmācchreṣṭham āha prajāpatiḥ // (6.2) Par.?

sāvitryā hyapi kaunteya śrutaṃ te vacanaṃ śubham / (7.1) Par.?

yataścaitad yathā caitad devasatre mahāmate // (7.2) Par.?

anne datte nareṇeha prāṇā dattā bhavantyuta / (8.1) Par.?

prāṇadānāddhi paramaṃ na dānam iha vidyate // (8.2) Par.?

śrutaṃ hi te mahābāho lomaśasyāpi tad vacaḥ / (9.1) Par.?

prāṇān dattvā kapotāya yat prāptaṃ śibinā purā // (9.2) Par.?

tāṃ gatiṃ labhate dattvā dvijasyānnaṃ viśāṃ pate / (10.1) Par.?

gatiṃ viśiṣṭāṃ gacchanti prāṇadā iti naḥ śrutam // (10.2) Par.?

annaṃ cāpi prabhavati pānīyāt kurusattama / (11.1) Par.?

nīrajātena hi vinā na kiṃcit sampravartate // (11.2) Par.?

nīrajātaśca bhagavān somo grahagaṇeśvaraḥ / (12.1) Par.?

amṛtaṃ ca sudhā caiva svāhā caiva vaṣaṭ tathā // (12.2) Par.?

annauṣadhyo mahārāja vīrudhaśca jalodbhavāḥ / (13.1) Par.?

yataḥ prāṇabhṛtāṃ prāṇāḥ sambhavanti viśāṃ pate // (13.2) Par.?

devānām amṛtaṃ cānnaṃ nāgānāṃ ca sudhā tathā / (14.1) Par.?

pitṝṇāṃ ca svadhā proktā paśūnāṃ cāpi vīrudhaḥ // (14.2) Par.?

annam eva manuṣyāṇāṃ prāṇān āhur manīṣiṇaḥ / (15.1) Par.?

tacca sarvaṃ naravyāghra pānīyāt sampravartate // (15.2) Par.?

tasmāt pānīyadānād vai na paraṃ vidyate kvacit / (16.1) Par.?

tacca dadyānnaro nityaṃ ya icched bhūtim ātmanaḥ // (16.2) Par.?

dhanyaṃ yaśasyam āyuṣyaṃ jaladānaṃ viśāṃ pate / (17.1) Par.?

śatrūṃścāpyadhi kaunteya sadā tiṣṭhati toyadaḥ // (17.2) Par.?

sarvakāmān avāpnoti kīrtiṃ caiveha śāśvatīm / (18.1) Par.?

pretya cānantyam āpnoti pāpebhyaśca pramucyate // (18.2) Par.?

toyado manujavyāghra svargaṃ gatvā mahādyute / (19.1) Par.?

akṣayān samavāpnoti lokān ityabravīnmanuḥ // (19.2) Par.?