Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 8806

Click on a sentence to show its analysis
Keep the mouse pointer over a lemma to show its meanings.

vaiśaṃpāyana uvāca / (1.1) Par.?

tathā vilapyoparatā bhartuḥ pādau pragṛhya sā / (1.2) Par.?

upaviṣṭābhavad devī socchvāsaṃ putram īkṣatī // (1.3) Par.?

tataḥ saṃjñāṃ punar labdhvā sa rājā babhruvāhanaḥ / (2.1) Par.?

mātaraṃ tām athālokya raṇabhūmāvathābravīt // (2.2) Par.?

ito duḥkhataraṃ kiṃ nu yanme mātā sukhaidhitā / (3.1) Par.?

bhūmau nipatitaṃ vīram anuśete mṛtaṃ patim // (3.2) Par.?

nihantāraṃ raṇe 'rīṇāṃ sarvaśastrabhṛtāṃ varam / (4.1) Par.?

mayā vinihataṃ saṃkhye prekṣate durmaraṃ bata // (4.2) Par.?

aho 'syā hṛdayaṃ devyā dṛḍhaṃ yanna vidīryate / (5.1) Par.?

vyūḍhoraskaṃ mahābāhuṃ prekṣantyā nihataṃ patim // (5.2) Par.?

durmaraṃ puruṣeṇeha manye hyadhvanyanāgate / (6.1) Par.?

yatra nāhaṃ na me mātā viprayujyeta jīvitāt // (6.2) Par.?

aho dhik kuruvīrasya hyuraḥsthaṃ kāñcanaṃ bhuvi / (7.1) Par.?

vyapaviddhaṃ hatasyeha mayā putreṇa paśyata // (7.2) Par.?

bho bho paśyata me vīraṃ pitaraṃ brāhmaṇā bhuvi / (8.1) Par.?

śayānaṃ vīraśayane mayā putreṇa pātitam // (8.2) Par.?

brāhmaṇāḥ kurumukhyasya prayuktā hayasāriṇaḥ / (9.1) Par.?

kurvantu śāntikāṃ tvadya raṇe yo 'yaṃ mayā hataḥ // (9.2) Par.?

vyādiśantu ca kiṃ viprāḥ prāyaścittam ihādya me / (10.1) Par.?

sunṛśaṃsasya pāpasya pitṛhantū raṇājire // (10.2) Par.?

duścarā dvādaśa samā hatvā pitaram adya vai / (11.1) Par.?

mameha sunṛśaṃsasya saṃvītasyāsya carmaṇā // (11.2) Par.?

śiraḥkapāle cāsyaiva bhuñjataḥ pitur adya me / (12.1) Par.?

prāyaścittaṃ hi nāstyanyaddhatvādya pitaraṃ mama // (12.2) Par.?

paśya nāgottamasute bhartāraṃ nihataṃ mayā / (13.1) Par.?

kṛtaṃ priyaṃ mayā te 'dya nihatya samare 'rjunam // (13.2) Par.?

so 'ham apyadya yāsyāmi gatiṃ pitṛniṣevitām / (14.1) Par.?

na śaknomyātmanātmānam ahaṃ dhārayituṃ śubhe // (14.2) Par.?

sā tvaṃ mayi mṛte mātastathā gāṇḍīvadhanvani / (15.1) Par.?

bhava prītimatī devi satyenātmānam ālabhe // (15.2) Par.?

ityuktvā sa tadā rājā duḥkhaśokasamāhataḥ / (16.1) Par.?

upaspṛśya mahārāja duḥkhād vacanam abravīt // (16.2) Par.?

śṛṇvantu sarvabhūtāni sthāvarāṇi carāṇi ca / (17.1) Par.?

tvaṃ ca mātar yathā satyaṃ bravīmi bhujagottame // (17.2) Par.?

yadi nottiṣṭhati jayaḥ pitā me bharatarṣabhaḥ / (18.1) Par.?

asminn eva raṇoddeśe śoṣayiṣye kalevaram // (18.2) Par.?

na hi me pitaraṃ hatvā niṣkṛtir vidyate kvacit / (19.1) Par.?

narakaṃ pratipatsyāmi dhruvaṃ guruvadhārditaḥ // (19.2) Par.?

vīraṃ hi kṣatriyaṃ hatvā gośatena pramucyate / (20.1) Par.?

pitaraṃ tu nihatyaivaṃ dustarā niṣkṛtir mayā // (20.2) Par.?

eṣa hyeko mahātejāḥ pāṇḍuputro dhanaṃjayaḥ / (21.1) Par.?

pitā ca mama dharmātmā tasya me niṣkṛtiḥ kutaḥ // (21.2) Par.?

ityevam uktvā nṛpate dhanaṃjayasuto nṛpaḥ / (22.1) Par.?

upaspṛśyābhavat tūṣṇīṃ prāyopeto mahāmatiḥ // (22.2) Par.?

Duration=0.17179107666016 secs.