Texts

sūta uvāca / (1.1) Par.?

athovāca mahādevaḥ prīto'haṃ surasattamau / (1.2) Par.?

paśyatāṃ māṃ mahādevaṃ bhayaṃ sarvaṃ vimucyatām // (1.3) Par.?

yuvāṃ prasūtau gātrābhyāṃ mama pūrvaṃ mahābalau / (2.1) Par.?

ayaṃ me dakṣiṇe pārśve brahmā lokapitāmahaḥ // (2.2) Par.?

vāme pārśve ca me viṣṇurviśvātmā hṛdayodbhavaḥ / (3.1) Par.?

prīto'haṃ yuvayoḥ samyagvaraṃ dadmi yathepsitam // (3.2) Par.?

evamuktvā tu taṃ viṣṇuṃ karābhyāṃ parameśvaraḥ / (4.1) Par.?

pasparśa subhagābhyāṃ tu kṛpayā tu kṛpānidhiḥ // (4.2) Par.?

tataḥ prahṛṣṭamanasā praṇipatya maheśvaram / (5.1) Par.?

prāha nārāyaṇo nāthaṃ liṅgasthaṃ liṅgavarjitam // (5.2) Par.?

yadi prītiḥ samutpannā yadi deyo varaś ca nau / (6.1) Par.?

bhaktirbhavatu nau nityaṃ tvayi cāvyabhicāriṇī // (6.2) Par.?

devaḥ pradattavān devāḥ svātmanyavyabhicāriṇīm / (7.1) Par.?

brahmaṇe viṣṇave caiva śraddhāṃ śītāṃśubhūṣaṇaḥ // (7.2) Par.?

jānubhyāmavanīṃ gatvā punarnārāyaṇaḥ svayam / (8.1) Par.?

praṇipatya ca viśveśaṃ prāha mandataraṃ vaśī // (8.2) Par.?

āvayordevadeveśa vivādamatiśobhanam / (9.1) Par.?

ihāgato bhavān yasmādvivādaśamanāya nau // (9.2) Par.?

tasya tadvacanaṃ śrutvā punaḥ prāha haro harim / (10.1) Par.?

praṇipatya sthitaṃ mūrdhnā kṛtāñjalipuṭaṃ smayan // (10.2) Par.?

śrīmahādeva uvāca / (11.1) Par.?

pralayasthitisargāṇāṃ kartā tvaṃ dharaṇīpate / (11.2) Par.?

vatsa vatsa hare viṣṇo pālayaitaccarācaram // (11.3) Par.?

tridhā bhinno hyahaṃ viṣṇo brahmaviṣṇubhavākhyayā / (12.1) Par.?

sargarakṣālayaguṇairniṣkalaḥ parameśvaraḥ // (12.2) Par.?

saṃmohaṃ tyaja bho viṣṇo pālayainaṃ pitāmaham / (13.1) Par.?

pādme bhaviṣyati sutaḥ kalpe tava pitāmahaḥ // (13.2) Par.?

tadā drakṣyasi māṃ caivaṃ so'pi drakṣyati padmajaḥ / (14.1) Par.?

evamuktvā sa bhagavāṃstatraivāntaradhīyata // (14.2) Par.?

tadāprabhṛti lokeṣu liṅgārcā supratiṣṭhitā / (15.1) Par.?

liṅgavedī mahādevī liṅgaṃ sākṣānmaheśvaraḥ // (15.2) Par.?

layanālliṅgamityuktaṃ tatraiva nikhilaṃ surāḥ / (16.1) Par.?

yastu laiṅgaṃ paṭhennityamākhyānaṃ liṅgasannidhau // (16.2) Par.?

sa yāti śivatāṃ vipro nātra kāryā vicāraṇā // (17.1) Par.?