Texts

śrīmārkaṇḍeya uvāca / (1.1) Par.?

tato gacchenmahīpāla tīrthaṃ paramaśobhanam / (1.2) Par.?

saubhāgyakaraṇaṃ divyaṃ naranārīmanoramam // (1.3) Par.?

tatra yā durbhagā nārī naro vā nṛpasattama / (2.1) Par.?

snātvārcayed umārudrau saubhāgyaṃ tasya jāyate // (2.2) Par.?

tṛtīyāyāmahorātraṃ sopavāso jitendriyaḥ / (3.1) Par.?

nimantrayed dvijaṃ bhaktyā sapatnīkaṃ surūpiṇam // (3.2) Par.?

gandhamālyairalaṃkṛtya vastradhūpādivāsitam / (4.1) Par.?

bhojayet pāyasānnena kṛsareṇātha bhaktitaḥ // (4.2) Par.?

bhojayitvā yathānyāyaṃ pradakṣiṇamudāharet / (5.1) Par.?

prīyatāṃ me mahādevaḥ sapatnīko vṛṣadhvajaḥ // (5.2) Par.?

yathā te devadeveśa na viyogaḥ kadācana / (6.1) Par.?

mamāpi karuṇāṃ kṛtvā tathāstviti vicintayet // (6.2) Par.?

evaṃ kṛte tatastasya yatpuṇyaṃ samudāhṛtam / (7.1) Par.?

tatte sarvaṃ pravakṣyāmi yathā devena bhāṣitam // (7.2) Par.?

daurbhāgyaṃ durgatiścaiva dāridryaṃ śokabandhanam / (8.1) Par.?

vandhyatvaṃ saptajanmāni jāyate na yudhiṣṭhira // (8.2) Par.?

jyeṣṭhamāse site pakṣe tṛtīyāyāṃ viśeṣataḥ / (9.1) Par.?

tatra gatvā tu yo bhaktyā pañcāgniṃ sādhayettataḥ // (9.2) Par.?

so 'pi pāpairaśeṣaistu mucyate nātra saṃśayaḥ / (10.1) Par.?

guggulaṃ dahate yastu dvidhā cittavivarjitaḥ // (10.2) Par.?

śarīraṃ bhedayed yastu gauryāścaiva samīpataḥ / (11.1) Par.?

tasminkarmapraviṣṭasya utkrāntir jāyate yadi // (11.2) Par.?

dehapāte vrajet svargam ityevaṃ śaṅkaro 'bravīt / (12.1) Par.?

sitaraktaistathā pītairvastraiśca vividhaiḥ śubhaiḥ // (12.2) Par.?

brāhmaṇīṃ brāhmaṇaṃ caiva pūjayitvā yathāvidhi / (13.1) Par.?

puṣpairnānāvidhaiścaiva gandhadhūpaiḥ suśobhanaiḥ // (13.2) Par.?

kaṇṭhasūtrakasindūraiḥ kuṅkumena vilepayet / (14.1) Par.?

kalpayeta striyaṃ gaurīṃ brāhmaṇaṃ śivarūpiṇam // (14.2) Par.?

teṣāṃ tadrūpakaṃ kṛtvā dānamutsṛjyate tataḥ / (15.1) Par.?

kaṅkaṇaṃ karṇaveṣṭaṃ ca kaṇṭhikāṃ mudrikāṃ tathā // (15.2) Par.?

saptadhānyaṃ tathā caiva bhojanaṃ nṛpasattama / (16.1) Par.?

anyānyapi ca dānāni tasmiṃstīrthe dadāti yaḥ // (16.2) Par.?

sarvadānaiśca yatpuṇyaṃ prāpnuyānnātra saṃśayaḥ / (17.1) Par.?

sahasraguṇitaṃ sarvaṃ nātra kāryā vicāraṇā // (17.2) Par.?

śaṅkareṇa samaṃ tasmādbhogaṃ bhuṅkte hyanuttamam / (18.1) Par.?

saubhāgyaṃ tasya vipulaṃ jāyate nātra saṃśayaḥ // (18.2) Par.?

aputro labhate putramadhano dhanamāpnuyāt / (19.1) Par.?

rājendra kāmadaṃ tīrthaṃ narmadāyāṃ vyavasthitam // (19.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe kāmadatīrthamāhātmyavarṇanaṃ nāma ṣaḍuttaraśatatamo 'dhyāyaḥ // (20.1) Par.?