Texts

śrīmārkaṇḍeya uvāca / (1.1) Par.?

tasyaivānantaraṃ pārtha sāvitrītīrthamuttamam / (1.2) Par.?

yatra siddhā mahābhāgā sāvitrī vedamātṛkā // (1.3) Par.?

yudhiṣṭhira uvāca / (2.1) Par.?

sāvitrī kā dvijaśreṣṭha kathaṃ vārādhyate budhaiḥ / (2.2) Par.?

prasannā vā varaṃ kaṃ ca dadāti kathayasva me // (2.3) Par.?

śrīmārkaṇḍeya uvāca / (3.1) Par.?

padmā padmāsanasthenādhiṣṭhitā padmayoginī / (3.2) Par.?

sāvitratejaḥsadṛśī sāvitrī tena cocyate // (3.3) Par.?

padmānanā padmavarṇā padmapatranibhekṣaṇā / (4.1) Par.?

dhyātavyā brāhmaṇairnityaṃ kṣatravaiśyair yathāvidhi // (4.2) Par.?

brahmahatyābhayātsā hi na tu śūdraiḥ kadācana / (5.1) Par.?

uccāraṇād dhāraṇād vā narake patati dhruvam // (5.2) Par.?

vedoccāraṇamātreṇa kṣatriyair dharmapālakaiḥ / (6.1) Par.?

jihvāchedo 'sya kartavyaḥ śūdrasyeti viniścayaḥ // (6.2) Par.?

bālā bālendusadṛśī raktavastrānulepanā / (7.1) Par.?

uṣaḥkāle tu dhyātavyā sandhyā sandhāna uttame // (7.2) Par.?

uttuṅgapīvarakucā sumukhī śubhadarśanā / (8.1) Par.?

sarvābharaṇasampannā śvetamālyānulepanā // (8.2) Par.?

śvetavastraparicchannā śvetayajñopavītinī / (9.1) Par.?

madhyāhnasandhyā dhyātavyā taruṇā bhuktimuktidā // (9.2) Par.?

pradoṣe tu punaḥ pārtha śvetā pāṇḍuramūrdhajā / (10.1) Par.?

sumṛtā tu durgakāntāre mātṛvatparirakṣati // (10.2) Par.?

viśeṣeṇa tu rājendra sāvitrītīrthamuttamam / (11.1) Par.?

snātvācamya vidhānena manovākkāyakarmabhiḥ // (11.2) Par.?

prāṇāyāmair dahed doṣān saptajanmārjitānbahūn / (12.1) Par.?

āpohiṣṭheti mantreṇa prokṣayedātmanastanum // (12.2) Par.?

navaṣaṭ ca tathā tisrastatra tīrthe nṛpottama / (13.1) Par.?

āpohiṣṭheti trirāvṛtya pratigrāhair na lipyate // (13.2) Par.?

aghamarṣaṇaṃ tryṛcaṃ toyaṃ yathāvedam athāpi vā / (14.1) Par.?

upapāpair na lipyeta padmapatramivāmbhasā // (14.2) Par.?

tryāpaṃ hi kurute vipra ullekhatrayam ācaret / (15.1) Par.?

caturthaṃ kārayed yas tu brahmahatyāṃ vyapohati // (15.2) Par.?

drupadākhyaśca yo mantro vede vājasaneyake / (16.1) Par.?

antarjale sakṛjjaptaḥ sarvapāpakṣayaṃkaraḥ // (16.2) Par.?

udutyam iti mantreṇa pūjayitvā divākaram / (17.1) Par.?

gāyatrīṃ ca japed devīṃ pavitrāṃ vedamātaram // (17.2) Par.?

gāyatrīṃ tu japed devīṃ yaḥ sandhyānantaraṃ dvijaḥ / (18.1) Par.?

sarvapāpavinirmukto brahmalokaṃ sa gacchati // (18.2) Par.?

daśabhirjanmabhirlabdhaṃ śatena tu purākṛtam / (19.1) Par.?

triyugaṃ tu sahasreṇa gāyatrī hanti kilbiṣam // (19.2) Par.?

gāyatrīsāramātro 'pi varaṃ vipraḥ suyantritaḥ / (20.1) Par.?

nāyantritaś caturvedī sarvāśī sarvavikrayī // (20.2) Par.?

sandhyāhīno 'śucir nityamanarhaḥ sarvakarmasu / (21.1) Par.?

yadanyat kurute kiṃcinna tasya phalabhāg bhavet // (21.2) Par.?

sandhyāṃ nopāsate yastu brāhmaṇo mandabuddhimān / (22.1) Par.?

sa jīvanneva śūdraḥ syān mṛtaḥ śvā samprajāyate // (22.2) Par.?

sāvitrītīrthamāsādya sāvitrīṃ yo japeddvijaḥ / (23.1) Par.?

traividyaṃ tu phalaṃ tasya jāyate nātra saṃśayaḥ // (23.2) Par.?

pitṝnuddiśya yaḥ snātvā piṇḍanirvapaṇaṃ nṛpa / (24.1) Par.?

kurute dvādaśābdāni tṛpyanti tatpitāmahāḥ // (24.2) Par.?

sāvitrītīrthamāsādya yaḥ kuryāt prāṇasaṃkṣayam / (25.1) Par.?

brahmalokaṃ vaset tāvad yāvad ābhūtasamplavam // (25.2) Par.?

pūrṇe caiva tataḥ kāla iha mānuṣyatāṃ gataḥ / (26.1) Par.?

caturvedo dvijo rājañjāyate vimale kule // (26.2) Par.?

dhanadhānyacayopetaḥ putrapautrasamanvitaḥ / (27.1) Par.?

vyādhiśokavinirmukto jīvecca śaradāṃ śatam // (27.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe sāvitrītīrthamāhātmyavarṇanaṃ nāma dviśatatamo 'dhyāyaḥ // (28.1) Par.?