Texts

atha jāraṇāsaṃskāre prakṣepārhasya bījasya lakṣaṇamāha nirvāhaṇeti // (1) Par.?

nirvāhyate prakṣepeṇaikīkriyate 'neneti vyutpattyā nirvāhaṇaśabdena nirvāhakaṃ dravyaṃ grāhyam // (2) Par.?

prakṣepeṇa guṇaviśeṣotpādanapūrvakaikībhāvasāmānyācca tena śabdena vāpanadravyasyāpi saṃgrahaḥ kāryaḥ // (3) Par.?

etadabhiprāyeṇaiva nirvāpaṇaviśeṣeṇetyapi pāṭho dṛśyate // (4) Par.?

tena nirvāhaṇena nirvyūḍhaṃ yadbījopādānarasalohādi tattadvarṇaṃ nirvāhaṇadravyasya samānavarṇaṃ śāstranirdiṣṭavarṇaṃ ca bhavati // (5) Par.?

vāpanadravyeṇa mṛdu ca bhavettathā sattvabhasmotpādakavidhibhyāṃ ca prāptamārdavam // (6) Par.?

tathā kṛto vicitrasaṃskāro garbhadrāvako raktavargakaṣāye niṣecanarūpo melāpakadravyasaṃyogādiśca yasyetyevaṃguṇaviśiṣṭaṃ rasaśāstre siddhabījamityabhidhīyate // (7) Par.?

bījaṃ dvividhaṃ pītaṃ sitaṃ ceti bhedāt // (8) Par.?

tadapi pratyekaṃ dvividham // (9) Par.?

akṛtrimaṃ kṛtrimaṃ ca // (10) Par.?

yaddhi khanisambhūtaṃ śuddhaṃ svarṇaṃ rajataṃ vā tad akṛtrimam // (11) Par.?

yattu dhāturasoparasasaṃyogakriyāviśeṣajanitasvarṇarajatotpādanayogyatāsaṃpannaṃ pītaṃ svarṇarītyādi śvetaṃ vaṅgādi tatkṛtrimam ityācakṣate // (12) Par.?

tadapi pratyekaṃ dvividham // (13) Par.?

śuddhaṃ miśraṃ ca // (14) Par.?

śuddhamekaikaṃ miśraṃ mithaḥ saṃkīrṇam // (15) Par.?

punarapi sarvam etattridhā bhavati // (16) Par.?

kalpitaṃ rañjitaṃ pakvaṃ ca // (17) Par.?

tatra tatkalpitaśabdavācyaṃ yacchuddharasoparasaśuddhamāritaṃ mithaḥ saṃyuktaṃ miśraṃ vā lohādidvaṃdvīkṛtam ekaikaṃ sattvakaraṇavidhinā nirvāhaṇena dvaṃdvamelāpakavidhinā ca militaṃ śuddhaṃ jātamārdavaṃ tad evaikībhāvaṃ vrajati ca raktādivargeṣu secanena prāptavarṇaṃ rañjitasaṃjñakaṃ bhavati // (18) Par.?

nirvāhaṇena hemaśeṣakṛtaṃ tāraśeṣakṛtaṃ vā yadbījaṃ bhūdharayantrādiṣu puṭitaṃ tatpakvabījaṃ vadanti // (19) Par.?

evaṃ cedamuktalakṣaṇaṃ sarvabījānāṃ saṃgrāhakaṃ bodhyam // (20) Par.?

atra rasoparasānāṃ śodhanaṃ tu sūryāvartādigaṇena kuryāt // (21) Par.?

śaśaraktabhāvanayā kāntaṃ śudhyati // (22) Par.?

sauvarṇaṃ rājataṃ patraṃ ca lavaṇakṣārāmlaravisnuhīkṣīrair liptaṃ dhmātaṃ paścānnirguṇḍīrase bahuvāraṃ niṣecitaṃ sacchudhyati // (23) Par.?

nāgavaṅgaghoṣatāmrāṇi tu prataptāni nirguṇḍīrasasekais tanmūlarajaḥpravāpaiśca śudhyanti // (24) Par.?

sarvo'pi lohaḥ pratapto mākṣīkadaradavāpena bahuvāraṃ kṛtena śudhyati // (25) Par.?

rasoparasānāṃ sattvāni mūloktavidhinā pātayet // (26) Par.?

saṃprati bījanirvāhaṇavidhiṃ rasahṛdayoktaṃ vakṣyāmi // (27) Par.?