Texts

sūta uvāca / (1.1) Par.?

uṣitvā tatra bhagavān kapardeśāntike punaḥ / (1.2) Par.?

draṣṭuṃ yayau madhyameśaṃ bahuvarṣagaṇān prabhuḥ // (1.3) Par.?

tatra mandākinīṃ puṇyām ṛṣisaṅghaniṣevitām / (2.1) Par.?

nadīṃ vimalapānīyāṃ dṛṣṭvā hṛṣṭo 'bhavanmuniḥ // (2.2) Par.?

sa tāmanvīkṣya munibhiḥ saha dvaipāyanaḥ prabhuḥ / (3.1) Par.?

cakāra bhāvapūtātmā snānaṃ snānavidhānavit // (3.2) Par.?

saṃtarpya vidhivad devānṛṣīn pitṛgaṇāṃstathā / (4.1) Par.?

pūjayāmāsa lokādiṃ puṣpairnānāvidhairbhavam // (4.2) Par.?

praviśya śiṣyapravaraiḥ sārdhaṃ satyavatīsutaḥ / (5.1) Par.?

madhyameśvaramīśānamarcayāmāsa śūlinam // (5.2) Par.?

tataḥ pāśupatāḥ śāntā bhasmoddhūlitavigrahāḥ / (6.1) Par.?

draṣṭuṃ samāgatā rudraṃ madhyameśvaramīśvaram // (6.2) Par.?

oṅkārāsaktamanaso vedādhyayanatatparāḥ / (7.1) Par.?

jaṭilā muṇḍitāścāpi śuklayajñopavītinaḥ // (7.2) Par.?

kaupīnavasanāḥ kecidapare cāpyavāsasaḥ / (8.1) Par.?

brahmacaryaratāḥ śāntā vedāntajñānatatparāḥ // (8.2) Par.?

dṛṣṭvā dvaipāyanaṃ viprāḥ śiṣyaiḥ parivṛtaṃ munim / (9.1) Par.?

pūjayitvā yathānyāyamidaṃ vacanamabruvan // (9.2) Par.?

ko bhavān kuta āyātaḥ saha śiṣyairmahāmune / (10.1) Par.?

procuḥ pailādayaḥ śiṣyāstānṛṣīn brahmabhāvitān // (10.2) Par.?

ayaṃ satyavatīsūnuḥ kṛṣṇadvaipāyano muniḥ / (11.1) Par.?

vyāsaḥ svayaṃ hṛṣīkeśo yena vedāḥ pṛthak kṛtāḥ // (11.2) Par.?

yasya devo mahādevaḥ sākṣādeva pinākadhṛk / (12.1) Par.?

aṃśāṃśenābhavat putro nāmnā śuka iti prabhuḥ // (12.2) Par.?

yaḥ sa sākṣānmahādevaṃ sarvabhāvena śaṅkaram / (13.1) Par.?

prapannaḥ parayā bhaktyā yasya tajjñānamaiśvaram // (13.2) Par.?

tataḥ pāśupatāḥ sarve hṛṣṭasarvatanūruhāḥ / (14.1) Par.?

nemuravyagramanasaḥ procuḥ satyavatīsutam // (14.2) Par.?

bhagavan bhavatā jñātaṃ vijñānaṃ parameṣṭhinaḥ / (15.1) Par.?

prasādād devadevasya yat tanmāheśvaraṃ param // (15.2) Par.?

tadvadāsmākamavyaktaṃ rahasyaṃ guhyamuttamam / (16.1) Par.?

kṣipraṃ paśyema taṃ devaṃ śrutvā bhagavato mukhāt // (16.2) Par.?

visarjayitvā tāñchiṣyān sumantupramukhāṃstataḥ / (17.1) Par.?

provāca tatparaṃ jñānaṃ yogibhyo yogavittamaḥ // (17.2) Par.?

tatkṣaṇādeva vimalaṃ sambhūtaṃ jyotiruttamam / (18.1) Par.?

līnāstatraiva te viprāḥ kṣaṇādantaradhīyata // (18.2) Par.?

tataḥ śiṣyān samāhūya bhagavān brahmavittamaḥ / (19.1) Par.?

provāca madhyameśasya māhātmyaṃ pailapūrvakān // (19.2) Par.?

asmin sthāne svayaṃ devo devyā saha maheśvaraḥ / (20.1) Par.?

ramate bhagavān nityaṃ rudraiśca parivāritaḥ // (20.2) Par.?

atra pūrvaṃ hṛṣīkeśo viśvātmā devakīsutaḥ / (21.1) Par.?

uvāsa vatsaraṃ kṛṣṇaḥ sadā pāśupatairvṛtaḥ // (21.2) Par.?

bhasmoddhūlitasarvāṅgo rudrādhyayanatatparaḥ / (22.1) Par.?

ārādhayan hariḥ śaṃbhuṃ kṛtvā pāśupataṃ vratam // (22.2) Par.?

tasya te bahavaḥ śiṣyā brahmacaryaparāyaṇāḥ / (23.1) Par.?

labdhvā tadvacanājjñānaṃ dṛṣṭavanto maheśvaram // (23.2) Par.?

tasya devo mahādevaḥ pratyakṣaṃ nīlalohitaḥ / (24.1) Par.?

dadau kṛṣṇasya bhagavān varado varamuttamam // (24.2) Par.?

ye 'rcayiṣyanti govindaṃ madbhaktā vidhipūrvakam / (25.1) Par.?

teṣāṃ tadaiśvaraṃ jñānamutpatsyati jaganmaya // (25.2) Par.?

namasyo 'rcayitavyaśca dhyātavyo matparairjanaiḥ / (26.1) Par.?

bhaviṣyasi na saṃdeho matprasādād dvijātibhiḥ // (26.2) Par.?

ye 'tra drakṣyanti deveśaṃ snātvā rudraṃ pinākinam / (27.1) Par.?

brahmahatyādikaṃ pāpaṃ teṣāmāśu vinaśyati // (27.2) Par.?

prāṇāṃstyajanti ye martyāḥ pāpakarmaratā api / (28.1) Par.?

te yānti tat paraṃ sthānaṃ nātra kāryā vicāraṇā // (28.2) Par.?

dhanyāstu khalu te viprā mandākinyāṃ kṛtodakāḥ / (29.1) Par.?

arcayanti mahādevaṃ madhyameśvaramīśvaram // (29.2) Par.?

snānaṃ dānaṃ tapaḥ śrāddhaṃ piṇḍanirvapaṇaṃ tviha / (30.1) Par.?

ekaikaśaḥ kṛtaṃ viprāḥ punātyāsaptamaṃ kulam // (30.2) Par.?

saṃnihatyāmupaspṛśya rāhugraste divākare / (31.1) Par.?

yat phalaṃ labhate martyastasmād daśaguṇaṃ tviha // (31.2) Par.?

evamuktvā mahāyogī madhyameśāntike prabhuḥ / (32.1) Par.?

uvāsa suciraṃ kālaṃ pūjayan vai maheśvaram // (32.2) Par.?

iti śrīkūrmapurāṇe ṣaṭsāhasryāṃ saṃhitāyāṃ pūrvavibhāge dvātriṃśo 'dhyāyaḥ // (33.1) Par.?