Texts

maheśvara uvāca / (1.1) Par.?

yājñavalkyena yatpūrvaṃ dharmaṃ proktaṃ kayaṃ hare / (1.2) Par.?

tanme kathaya keśighna yathātattvena mādhava // (1.3) Par.?

hariruvāca / (2.1) Par.?

yājñavalkyaṃ namaskṛtya mithilāyāṃ samāsthitam / (2.2) Par.?

apṛcchan ṛṣayo gatvā varṇadharmādyaśeṣataḥ / (2.3) Par.?

tebhyaḥ sa kathayāmāsa viṣṇuṃ dhyātvā jitendriyaḥ // (2.4) Par.?

yājñavalkya uvāca / (3.1) Par.?

yasmindeśe mṛgaḥ kṛṣṇastasmindharmānnibodhata / (3.2) Par.?

purāṇanyāyamīmāṃsādharmaśāstrāṅgamiśritāḥ // (3.3) Par.?

vedāḥ sthānāni vidyānāṃ dharmasya ca caturdaśa / (4.1) Par.?

vaktāro dharmaśāstrāṇāṃ manurviṣṇuryamo 'ṅgirāḥ // (4.2) Par.?

vasiṣṭhadakṣasaṃvartaśātātapaparāśarāḥ / (5.1) Par.?

āpastambośanovyāsāḥ kātyāyanabṛhaspatī // (5.2) Par.?

gautamaḥ śaṅkhalikhito hārīto 'trirahaṃ tathā / (6.1) Par.?

ete viṣṇuṃ samārādhya jātā dharmopadeśakāḥ // (6.2) Par.?

deśakāla upāyena dravyaṃ śraddhāsamanvitam / (7.1) Par.?

pātre pradīyate yattatsakalaṃ dharmalakṣaṇam // (7.2) Par.?

ijyācāro damo 'hiṃsā dānaṃ svādhyāyakarma ca / (8.1) Par.?

ayaṃ ca paramo dharmo yadyogenātmadarśanam // (8.2) Par.?

catvāro vedadharmajñāḥ parṣattraividyameva vā / (9.1) Par.?

sā brūte yatsvadharmaḥ syādeko vādhyātmavittamaḥ // (9.2) Par.?

brahmakṣatriyaviṭśūdrā varṇāstvādyāstrayo dvijāḥ / (10.1) Par.?

niṣekādyāḥ śmaśānāntās teṣāṃ vai mantrataḥ kriyāḥ // (10.2) Par.?

garbhādhānamṛtau puṃsaḥ savanaṃ spandanātpurā / (11.1) Par.?

ṣaṣṭhe 'ṣṭame vā sīmantaḥ prasave jātakarma ca // (11.2) Par.?

ahanyekādaśe nāma caturthe māsi niṣkramaḥ / (12.1) Par.?

ṣaṣṭhe 'nnaprāśanaṃ māsi cūḍāṃ kuryādyathākulam // (12.2) Par.?

evamenaḥ śamaṃ yāti bījagarbhasamudbhavam / (13.1) Par.?

tūṣṇīm etāḥ kriyāḥ strīṇāṃ vivāhaśca samantrakaḥ // (13.2) Par.?

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe yājñavalkyoktavarṇadharmanirūpaṇaṃ nāma trinavatitamo 'dhyāyaḥ // (14.1) Par.?