Texts

indrāgnī avyathamānām iti svayamātṛṇṇām upadadhāti // (1.1) Par.?

indrāgnibhyāṃ vā imau lokau vidhṛtāv anayor lokayor vidhṛtyai // (2.1) Par.?

adhṛteva vā eṣā yan madhyamā citiḥ // (3.1) Par.?

antarikṣam iva vā eṣā // (4.1) Par.?

indrāgnī ity āha // (5.1) Par.?

indrāgnī vai devānām ojobhṛtau // (6.1) Par.?

ojasaivainām antarikṣe cinute dhṛtyai // (7.1) Par.?

svayamātṛṇṇām upadadhāti // (8.1) Par.?

antarikṣaṃ vai svayamātṛṇṇā // (9.1) Par.?

antarikṣam evopadhatte // (10.1) Par.?

aśvam upaghrāpayati // (11.1) Par.?

prāṇam evāsyāṃ dadhāti // (12.1) Par.?

atho prājāpatyo vā aśvaḥ // (13.1) Par.?

prajāpatinaivāgniṃ cinute // (14.1) Par.?

svayamātṛṇṇā bhavati prāṇānām utsṛṣṭyā atho suvargasya lokasyānukhyātyai // (15.1) Par.?

devānāṃ vai suvargaṃ lokaṃ yatāṃ diśaḥ samavlīyanta // (16.1) Par.?

ta etā diśyā apaśyan // (17.1) Par.?

tā upādadhata // (18.1) Par.?

tābhir vai te diśo 'dṛṃhan // (19.1) Par.?

yad diśyā upadadhāti diśāṃ vidhṛtyai // (20.1) Par.?

daśa prāṇabhṛtaḥ purastād upadadhāti // (21.1) Par.?

nava vai puruṣe prāṇāḥ // (22.1) Par.?

nābhir daśamī // (23.1) Par.?

prāṇān eva purastād dhatte // (24.1) Par.?

tasmāt purastāt prāṇāḥ // (25.1) Par.?

jyotiṣmatīm uttamām upadadhāti // (26.1) Par.?

tasmāt prāṇānāṃ vāg jyotir uttamāḥ // (27.1) Par.?

daśopadadhāti // (28.1) Par.?

daśākṣarā virāṭ // (29.1) Par.?

virāṭ chandasāṃ jyotiḥ // (30.1) Par.?

jyotir eva purastād dhatte // (31.1) Par.?

tasmāt purastāj jyotir upāsmahe // (32.1) Par.?

chandāṃsi paśuṣv ājim ayuḥ // (33.1) Par.?

tān bṛhaty udajayat // (34.1) Par.?

tasmād bārhatāḥ paśava ucyante // (35.1) Par.?

mā chanda iti dakṣiṇata upadadhāti // (36.1) Par.?

tasmād dakṣiṇāvṛto māṣāḥ // (37.1) Par.?

pṛthivī chanda iti paścāt pratiṣṭhityai // (38.1) Par.?

agnir devateti uttarataḥ // (39.1) Par.?

ojo vā agniḥ // (40.1) Par.?

oja evottarato dhatte // (41.1) Par.?

tasmād uttarato 'bhiprayāyī jayati // (42.1) Par.?

ṣaṭtriṃśat sampadyante // (43.1) Par.?

ṣaṭtriṃśadakṣarā bṛhatī // (44.1) Par.?

bārhatāḥ paśavaḥ // (45.1) Par.?

bṛhatyaivāsmai paśūn avarunddhe // (46.1) Par.?

bṛhatī chandasāṃ svārājyam parīyāya // (47.1) Par.?

yasyaitā upadhīyante gacchati svārājyam // (48.1) Par.?

sapta vālakhilyāḥ purastād upadadhāti sapta paścāt // (49.1) Par.?

sapta vai śīrṣaṇyāḥ prāṇāḥ dvāv avāñcau prāṇānāṃ savīryatvāya // (50.1) Par.?

mūrdhāsi rāḍ iti purastād upadadhāti yantrī rāḍ iti paścāt // (51.1) Par.?

prāṇān evāsmai samīco dadhāti // (52.1) Par.?