Texts

yathāvitānaṃ yajñavāstv adhyavaset // (1.1) Par.?

vedir yajñasyāgner uttaravediḥ // (2.1) Par.?

ubhe prāgāyate kiṃcidprathīyasyau paścād udyatatare // (3.1) Par.?

apṛthusaṃmitāṃ vediṃ vidadhyāt // (4.1) Par.?

ṣaṭśamīṃ prāgāyatāṃ catuḥśamīṃ śroṇyām // (5.1) Par.?

trīn madhye ardhacaturthān agrataḥ // (6.1) Par.?

trayāṇāṃ purastād uttaravediṃ vidadhyāt // (7.1) Par.?

dviḥśamīṃ prāgāyatām ṛjvīm adhyardhaśamīṃ śroṇyām // (8.1) Par.?

grīṣmas te bhūma ity upasthāya // (9.1) Par.?

vi mimīṣva payasvatīm iti mimānam anumantrayate // (10.1) Par.?

bṛhaspate pari gṛhāṇa vediṃ sugā vo devāḥ sadanāni santu / (11.1) Par.?

asyāṃ barhiḥ prathatāṃ sādhv antarahiṃsrā ṇaḥ pṛthivī devy astv iti parigṛhṇāti // (11.2) Par.?

yat te bhūma iti vikhanati // (12.1) Par.?

yat te ūnam iti saṃvapati // (13.1) Par.?

tvam asy āvapanī janānām iti tataḥ pāṃsūn anyatodāhārya // (14.1) Par.?

bṛhaspate pari gṛhāṇa vedim ity uttaravedim opyamānāṃ parigṛhṇāti // (15.1) Par.?

asaṃbādhaṃ badhyato mānavānām iti prathayati // (16.1) Par.?

yasyāś catasraḥ pradiśaḥ pṛthivyā iti caturasrāṃ karoti // (17.1) Par.?

devasya tvā savituḥ prasave aśvinor bāhubhyāṃ pūṣṇo hastābhyām ā dada iti lekhanam ādāya yatrāgniṃ nidhāsyan bhavati tatra lakṣaṇaṃ karoti // (18.1) Par.?

indraḥ sītāṃ ni gṛhṇātv iti dakṣiṇata ārabhyottarata ālikhati // (19.1) Par.?

prācīm āvṛtya dakṣiṇataḥ prācīm // (20.1) Par.?

aparās tisro madhye // (21.1) Par.?

tasyāṃ vrīhiyavāv opya // (22.1) Par.?

varṣeṇa bhūmiḥ pṛthivī vṛtāvṛtety adbhiḥ samprokṣya // (23.1) Par.?

yasyām annaṃ vrīhiyavāv iti bhūmiṃ namaskṛtya // (24.1) Par.?

athāgniṃ praṇayet / (25.1) Par.?

tvām agne bhṛgavo nayantām aṅgirasaḥ sadanaṃ śreya ehi / (25.2) Par.?

viśvakarmā pura etu prajānan dhiṣṇyaṃ panthām anu te diśāmeti // (25.3) Par.?

bhadraśreyaḥsvastyā vā // (26.1) Par.?

agne prehīti vā // (27.1) Par.?

viśvaṃbharā vasudhānī pratiṣṭheti lakṣaṇe pratiṣṭhāpya // (28.1) Par.?

athedhmam upasamādadhāti // (29.1) Par.?

agnir bhūmyām oṣadhīṣv agnir diva ā tapaty agnivāsāḥ pṛthivy asitajñūr etam idhmaṃ samāhitaṃ juṣāṇo 'smai kṣatrāṇi dhārayantam agna iti pañcabhi staraṇam // (30.1) Par.?

ata ūrdhvaṃ barhiṣaḥ // (31.1) Par.?

tvaṃ bhūmim aty eṣy ojaseti darbhān samprokṣya // (32.1) Par.?

ṛṣīṇāṃ prastaro 'sīti dakṣiṇato 'gner brahmāsanaṃ nidadhāti // (33.1) Par.?

purastād agner udak saṃstṛṇāti // (34.1) Par.?

tathā pratyak // (35.1) Par.?

pradakṣiṇaṃ barhiṣāṃ mūlāni chādayantottarasyā vediśroṇeḥ pūrvottarataḥ saṃsthāpya // (36.1) Par.?

ahe daidhiṣavyod atas tiṣṭhāny asya sadane sīda yo 'smat pākatara iti brahmāsanam anvīkṣate // (37.1) Par.?

nirastaḥ parāgvasuḥ saha pāpmanā nirastaḥ so 'stu yo 'smān dveṣṭi yaṃ ca vayaṃ dviṣma iti dakṣiṇā tṛṇaṃ nirasyati // (38.1) Par.?

tad anvālabhya japatīdam aham arvāgvasoḥ sadane sīdāmy ṛtasya sadane sīdāmi satyasya sadane sīdāmīṣṭasya sadane sīdāmi pūrtasya sadane sīdāmi māmṛṣad eva barhiḥ svāsasthaṃ tvādhyāsadeyam ūrṇamradam anabhiśokam // (39.1) Par.?

vimṛgvarīm ity upaviśyāsanīyaṃ brahmajapaṃ japati bṛhaspatir brahmā brahmasadana āsiṣyate bṛhaspate yajñaṃ gopāya yad ud udvata un nivataḥ śakeyam // (40.1) Par.?

pātaṃ mā dyāvāpṛthivī aghān na iti dyāvāpṛthivyau samīkṣate // (41.1) Par.?

savitā prasavānām iti karmaṇi karmaṇy abhito 'bhyātānair ājyaṃ juhuyāt // (42.1) Par.?

vyākhyātaṃ sarvapākayajñiyaṃ tantram // (43.1) Par.?