Texts

maitreya uvāca / (1.1) Par.?

sadā vidviṣator evaṃ kālo vai dhriyamāṇayoḥ / (1.2) Par.?

jāmātuḥ śvaśurasyāpi sumahān aticakrame // (1.3) Par.?

yadābhiṣikto dakṣas tu brahmaṇā parameṣṭhinā / (2.1) Par.?

prajāpatīnāṃ sarveṣām ādhipatye smayo 'bhavat // (2.2) Par.?

iṣṭvā sa vājapeyena brahmiṣṭhān abhibhūya ca / (3.1) Par.?

bṛhaspatisavaṃ nāma samārebhe kratūttamam // (3.2) Par.?

tasmin brahmarṣayaḥ sarve devarṣipitṛdevatāḥ / (4.1) Par.?

āsan kṛtasvastyayanās tatpatnyaś ca sabhartṛkāḥ // (4.2) Par.?

tad upaśrutya nabhasi khecarāṇāṃ prajalpatām / (5.1) Par.?

satī dākṣāyaṇī devī pitṛyajñamahotsavam // (5.2) Par.?

vrajantīḥ sarvato digbhya upadevavarastriyaḥ / (6.1) Par.?

vimānayānāḥ sapreṣṭhā niṣkakaṇṭhīḥ suvāsasaḥ // (6.2) Par.?

dṛṣṭvā svanilayābhyāśe lolākṣīr mṛṣṭakuṇḍalāḥ / (7.1) Par.?

patiṃ bhūtapatiṃ devam autsukyād abhyabhāṣata // (7.2) Par.?

saty uvāca / (8.1) Par.?

prajāpates te śvaśurasya sāmprataṃ niryāpito yajñamahotsavaḥ kila / (8.2) Par.?

vayaṃ ca tatrābhisarāma vāma te yady arthitāmī vibudhā vrajanti hi // (8.3) Par.?

tasmin bhaginyo mama bhartṛbhiḥ svakair dhruvaṃ gamiṣyanti suhṛddidṛkṣavaḥ / (9.1) Par.?

ahaṃ ca tasmin bhavatābhikāmaye sahopanītaṃ paribarham arhitum // (9.2) Par.?

tatra svasṝr me nanu bhartṛsaṃmitā mātṛṣvasṝḥ klinnadhiyaṃ ca mātaram / (10.1) Par.?

drakṣye cirotkaṇṭhamanā maharṣibhir unnīyamānaṃ ca mṛḍādhvaradhvajam // (10.2) Par.?

tvayy etad āścaryam ajātmamāyayā vinirmitaṃ bhāti guṇatrayātmakam / (11.1) Par.?

tathāpy ahaṃ yoṣid atattvavic ca te dīnā didṛkṣe bhava me bhavakṣitim // (11.2) Par.?

paśya prayāntīr abhavānyayoṣito 'py alaṃkṛtāḥ kāntasakhā varūthaśaḥ / (12.1) Par.?

yāsāṃ vrajadbhiḥ śitikaṇṭha maṇḍitaṃ nabho vimānaiḥ kalahaṃsapāṇḍubhiḥ // (12.2) Par.?

kathaṃ sutāyāḥ pitṛgehakautukaṃ niśamya dehaḥ suravarya neṅgate / (13.1) Par.?

anāhutā apy abhiyanti sauhṛdaṃ bhartur guror dehakṛtaś ca ketanam // (13.2) Par.?

tan me prasīdedam amartya vāñchitaṃ kartuṃ bhavān kāruṇiko batārhati / (14.1) Par.?

tvayātmano 'rdhe 'ham adabhracakṣuṣā nirūpitā mānugṛhāṇa yācitaḥ // (14.2) Par.?

ṛṣir uvāca / (15.1) Par.?

evaṃ giritraḥ priyayābhibhāṣitaḥ pratyabhyadhatta prahasan suhṛtpriyaḥ / (15.2) Par.?

saṃsmārito marmabhidaḥ kuvāgiṣūn yān āha ko viśvasṛjāṃ samakṣataḥ // (15.3) Par.?

śrībhagavān uvāca / (16.1) Par.?

tvayoditaṃ śobhanam eva śobhane anāhutā apy abhiyanti bandhuṣu / (16.2) Par.?

te yady anutpāditadoṣadṛṣṭayo balīyasānātmyamadena manyunā // (16.3) Par.?

vidyātapovittavapurvayaḥkulaiḥ satāṃ guṇaiḥ ṣaḍbhir asattametaraiḥ / (17.1) Par.?

smṛtau hatāyāṃ bhṛtamānadurdṛśaḥ stabdhā na paśyanti hi dhāma bhūyasām // (17.2) Par.?

naitādṛśānāṃ svajanavyapekṣayā gṛhān pratīyād anavasthitātmanām / (18.1) Par.?

ye 'bhyāgatān vakradhiyābhicakṣate āropitabhrūbhir amarṣaṇākṣibhiḥ // (18.2) Par.?

tathāribhir na vyathate śilīmukhaiḥ śete 'rditāṅgo hṛdayena dūyatā / (19.1) Par.?

svānāṃ yathā vakradhiyāṃ duruktibhir divāniśaṃ tapyati marmatāḍitaḥ // (19.2) Par.?

vyaktaṃ tvam utkṛṣṭagateḥ prajāpateḥ priyātmajānām asi subhru me matā / (20.1) Par.?

tathāpi mānaṃ na pituḥ prapatsyase madāśrayāt kaḥ paritapyate yataḥ // (20.2) Par.?

pāpacyamānena hṛdāturendriyaḥ samṛddhibhiḥ pūruṣabuddhisākṣiṇām / (21.1) Par.?

akalpa eṣām adhiroḍhum añjasā paraṃ padaṃ dveṣṭi yathāsurā harim // (21.2) Par.?

pratyudgamapraśrayaṇābhivādanaṃ vidhīyate sādhu mithaḥ sumadhyame / (22.1) Par.?

prājñaiḥ parasmai puruṣāya cetasā guhāśayāyaiva na dehamānine // (22.2) Par.?

sattvaṃ viśuddhaṃ vasudevaśabditaṃ yad īyate tatra pumān apāvṛtaḥ / (23.1) Par.?

sattve ca tasmin bhagavān vāsudevo hy adhokṣajo me namasā vidhīyate // (23.2) Par.?

tat te nirīkṣyo na pitāpi dehakṛd dakṣo mama dviṭ tadanuvratāś ca ye / (24.1) Par.?

yo viśvasṛgyajñagataṃ varoru mām anāgasaṃ durvacasākarot tiraḥ // (24.2) Par.?

yadi vrajiṣyasy atihāya madvaco bhadraṃ bhavatyā na tato bhaviṣyati / (25.1) Par.?

saṃbhāvitasya svajanāt parābhavo yadā sa sadyo maraṇāya kalpate // (25.2) Par.?