Texts

Help

Select a text:
Bibliography
Select a chapter:
 (no revisions)
Associated topic(s): agniṣṭoma

Show parallels  Show headlines
Use dependency labeler
Chapter id: 16180
  • Click on a sentence to show its analysis
  • Keep the mouse pointer over a lemma to show its meanings.
yajamānaṃ ha vā etad udgātā reto bhūtaṃ siñcati yad bahiṣpavamānaṃ gāyati // (1) Par.?
mana eva retasyayā samīrayati prāṇaṃ gāyatryā cakṣus triṣṭubhā śrotraṃ jagatyā vācam anuṣṭubhā // (2) Par.?
ātmānam eva paṅktyā pratyupadadhāti // (3) Par.?
atha yad etad uttamaṃ tṛcaṃ janmaiva tat // (4) Par.?
praiva tena janayati // (5) Par.?
yasmād etad ghoṣīvopabdimad iva gīyate tasmād ghoṣīvopabdimad iva garbhā jāyante // (6) Par.?
tad u vā āhur aghoṣam eva geyam // (7) Par.?
yadā vai vijāyamānā krūrīkurute 'tha sā ghoṣaṃ karoti // (8) Par.?
atho śanair iva vā aghoṣam iva mahāsṛṣṭir vijāyate // (9) Par.?
atho haitat satyaṃ yad gāyatram // (10) Par.?
tasya sampadaṃ lobhayed yad rathantaravarṇām abhyasyet // (11) Par.?
tasmād aghoṣam eva geyam iti // (12) Par.?
athāgneyam ājyam ekadevatyam // (13) Par.?
pretir eva sā // (14) Par.?
athaindrāgnaṃ dvidevatyam // (15) Par.?
pratiṣṭhitir eva sā // (16) Par.?
sā vā eṣā pretiś caiva pratiṣṭhitiś ca // (17) Par.?
pratitiṣṭhati ya evaṃ veda // (18) Par.?
trivṛtpañcadaśābhyāṃ puruṣo 'smin loke pratiṣṭhitaḥ // (19) Par.?
sa yam eva harati sa trivṛt // (20) Par.?
yena pratitiṣṭhati sa pañcadaśaḥ // (21) Par.?
tau vā etāv ubhāv eva trivṛtāv ubhau pañcadaśau // (22) Par.?
tejo vai brahmavarcasaṃ trivṛt stoma ojo vīryaṃ pañcadaśaḥ // (23) Par.?
ojasaiva tad vīryeṇa pratiṣṭhāya tejo brahmavarcasaṃ harati ya evaṃ veda // (24) Par.?
Duration=0.099560022354126 secs.