Texts

athaitad vātsapram // (1) Par.?

etena vai vatsaprīr bhālandano 'gneḥ priyaṃ dhāmāvārunddha // (2) Par.?

agner evaitena priyaṃ dhāmāvarunddhe // (3) Par.?

etena vai sa ṛṣīṇām adhivādam apājayat // (4) Par.?

pāpmānam evaitenādhivādam apajayati // (5) Par.?

etena vai so 'bhiśastīr ajayat // (6) Par.?

abhiśastīr eva jayati ya evaṃ vidvān etenopatiṣṭhate // (7) Par.?

yat prakramān prakrāmati yāmaṃ tena dādhāra yad upatiṣṭhate kṣemaṃ tena // (8) Par.?

pūrvedyuḥ prakrāmati // (9) Par.?

aparedyur upatiṣṭhate // (10) Par.?

tasmād yāme 'nyāsāṃ prajānāṃ manaḥ kṣeme 'nyāsām // (11) Par.?

tasmād yāyāvaraḥ kṣemasyeśe // (12) Par.?

tasmād yāyāvaraḥ kṣemyam adhyavasyati // (13) Par.?

ekādaśaṃ bhavati // (14) Par.?

ekādaśākṣarā triṣṭup // (15) Par.?

vīryaṃ triṣṭup // (16) Par.?

vīryam evāvarunddhe // (17) Par.?

ekeṣaṃ vai purā na āsīt // (18) Par.?

tata etad ṛṣayo 'gnaye dvīṣam ādhānam apaśyan // (19) Par.?

tasmād dvīṣam agnaya ādhānaṃ kurvanti // (20) Par.?

tām idam anukṛtiṃ dvīṣam anaḥ kriyate // (21) Par.?

ud u tvā viśve devā iti prāṇā vai viśve devāḥ // (22) Par.?

prāṇair evainam udyacchate // (23) Par.?

manuṣyā vai viśve devāḥ // (24) Par.?

manuṣyair evainam udyacchate // (25) Par.?

agne bharantu cittibhir iti yasmā evainaṃ cittāyodyacchate tenainaṃ samardhayati // (26) Par.?

pred agne jyotiṣmān yāhīty abhi vā eṣa etarhi prajāś śocayati śāntyai // (27) Par.?

akrandad agnir ity anumantrayeta yadi kṣvedet // (28) Par.?

krandataiva hy anasā vahanti // (29) Par.?

tasmād anasvī ca rathī cātithīnām apacitatamau // (30) Par.?

annapate annasya no dehīty annam evāsmai svadayati // (31) Par.?

anamīvasya śuṣmiṇa iti // (32) Par.?

ayakṣmasyety evaitad āha // (33) Par.?

prapra dātāraṃ tāriṣa ūrjaṃ no dhehi dvipade catuṣpada ity āśiṣam evāśāste // (34) Par.?

samidhāgniṃ duvasyateti ghṛtenāktvā samidham ādadhāti // (35) Par.?

yathā brāhmaṇāyātithaye sarpiṣvantaṃ pacaty evam eva tat // (36) Par.?

gāyatryā brāhmaṇasyādadhyāt // (37) Par.?

gāyatro hi brāhmaṇaḥ // (38) Par.?

triṣṭubhā rājanyasya // (39) Par.?

traiṣṭubho hi rājanyaḥ // (40) Par.?

jagatyā vaiśyasya // (41) Par.?

jāgato hi vaiśyaḥ // (42) Par.?

yathāchandasam eva // (43) Par.?

āpo devīḥ pratigṛhṇīta bhasmaitad ity apsu bhasma pravapati // (44) Par.?

āpo vā agner yoniḥ // (45) Par.?

svam evainaṃ yoniṃ gamayati // (46) Par.?

tisṛbhiḥ // (47) Par.?

trivṛd vā agniḥ // (48) Par.?

yāvān evāgnis taṃ pratiṣṭhāṃ gamayati // (49) Par.?

parā vā eṣo 'gniṃ vapati yo 'psu bhasma pravapati // (50) Par.?

saṃsṛjya mātṛbhiṣ ṭvaṃ jyotiṣmān punar āsada iti jyotir evāsmin dadhāti // (51) Par.?

ūrjā vā eṣa paśubhir vyṛdhyate yo 'psu bhasma pravapati // (52) Par.?

punar ūrjā saha rayyeti punar evorjaṃ paśūn avarunddhe // (53) Par.?

bodhā me asya vacaso yaviṣṭheti tasmāt prajās suṣupuṣīḥ prabudhyante // (54) Par.?

sa bodhi sūrir maghaveti tasmāt paśavaḥ prertvānaś caritvā punar etya yathālokaṃ niṣīdanti // (55) Par.?

dvābhyām // (56) Par.?

dvipād yajamānaḥ pratiṣṭhityai // (57) Par.?