Texts

atha yatra śrutivirodhas tatra katham // (1) Par.?

yathaudumbaryāḥ sarvaveṣṭanam audumbarīṃ spṛṣṭvodgāyed iti śrutyā viruddham // (2) Par.?

aṣṭācatvāriṃśadvarṣāṇi vedabrahmacaryacaraṇaṃ jātaputraḥ kṛṣṇakeśo 'gnīn ādadhītety anena viruddham // (3) Par.?

krītarājako bhojyānna iti tasmād agnīṣomīye saṃsthite yajamānasya gṛhe 'śitavyam ity anena viruddham // (4) Par.?

tat pramāṇaṃ kartṛsāmānyād ityevaṃ prāpte brūmo 'śakyatvād vyāmoha ity avagamyate // (5) Par.?

katham aśakyatā // (6) Par.?

sparśavidhānān na sarvā śakyā veṣṭayitum udgāyatā spraṣṭuṃ ca // (7) Par.?

tām udgāyatā spraṣṭavyām avagacchantaḥ kenemaṃ saṃpratyayaṃ bādhemahi sarvaveṣṭanasmaraṇeneti brūmaḥ // (8) Par.?

nanu nirmūlatvād vyāmohas tat smaraṇam iti vaidikaṃ vacanaṃ mūlaṃ bhaviṣyatīti // (9) Par.?

bhaved vaidikaṃ vacanaṃ mūlaṃ yadi sparśanaṃ vyāmohaḥ // (10) Par.?

avyāmohe tv aśakyatvād anupapannam // (11) Par.?

yathānubhavanam anupapannam iti na kalpyate tathā vaidikam api vacanam // (12) Par.?

kathaṃ tarhi sarvaveṣṭanasmaraṇam // (13) Par.?

vyāmohaḥ // (14) Par.?

kathaṃ vyāmohakalpanā // (15) Par.?

śrautavijñānavirodhāt // (16) Par.?

atha kimarthaṃ nemau vidhī vikalpye te vrīhiyavavad bṛhadrathantaravad vā // (17) Par.?

nāsati vyāmohavijñāne vikalpo bhavati // (18) Par.?

yadi sarvaveṣṭanavijñānaṃ pramāṇaṃ sparśanaṃ vyāmohaḥ // (19) Par.?

yadi sparśanaṃ pramāṇaṃ smṛtir vyāmohaḥ // (20) Par.?

vikalpaṃ tu vadan sparśanasya pakṣe tāvat prāmāṇyam anumanyate // (21) Par.?

tasya ca mūlaṃ śrutiḥ // (22) Par.?

sā cet pramāṇam anumatā na pākṣikī // (23) Par.?

pākṣikaṃ ca sarvaveṣṭanasmaraṇaṃ pakṣe tāvan na śaknoti śrutiṃ parikalpayituṃ sparśavijñānena bādhitatvāt // (24) Par.?

tataś cāvyāmohe ca tasminn aśakyā śrutiḥ kalpayitum // (25) Par.?

na cāsāv avyāmohaḥ pakṣe pakṣe vyāmoho bhaviṣyatīti // (26) Par.?

yad eva hi tasyaikasmin pakṣe mūlaṃ tad evetarasminn api // (27) Par.?

ekasmiṃś cet pakṣe na vyāmohaḥ śrutiprāmāṇyatulyatvād itaratrāpy avyāmohaḥ // (28) Par.?

na cāsāv ekasmin pakṣe śrutir nibaddhākṣarā hi sā na pramādapāṭha iti śakyā gaditum // (29) Par.?

tena naitat pakṣe vijñānaṃ vyāmohāt pakṣāntaraṃ saṃkrāntam ity avagamyate // (30) Par.?

tatra duḥśrutasvapnādivijñānamūlatvaṃ tu sarvaveṣṭanasyeti virodhāt kalpyate // (31) Par.?

na hi tasya sati virodhe prāmāṇyam abhyupagantavyam iti kiṃcid asti pramāṇam // (32) Par.?

tasmād yathaivaikasmin pakṣe na śakyā śrutiḥ kalpayitum evam aparasmin pakṣe tulyakāraṇatvāt // (33) Par.?

api cetaretarāśraye 'nyataḥ paricchedāt // (34) Par.?

keyam itaretarāśrayatā // (35) Par.?

pramāṇāyāṃ smṛtau sparśanaṃ vyāmohaḥ sparśane pramāṇe smṛtir vyāmohas tad etad itaretarāśrayaṃ bhavati // (36) Par.?

tatra sparśanasya kﾱptaṃ mūlaṃ kalpyaṃ smṛteḥ so 'sāv anyataḥ paricchedaḥ // (37) Par.?

kalpyamūlatvāt smṛtiprāmāṇyam anavakﾱptaṃ // (38) Par.?

tadaprāmāṇyāt sparśanaṃ na vyāmohaḥ // (39) Par.?

tadavyāmohāt smārtaśrutikalpanānupapannā pramāṇābhāvāt // (40) Par.?

nanv evaṃ sati vrīhisādhanatvavijñānasyāpy avyāmohād yavaśrutir nopapadyeta // (41) Par.?

satyaṃ nopapadyate yady apratyakṣā syāt // (42) Par.?

pratyakṣā tv eṣā // (43) Par.?

na hi pratyakṣam anupapannaṃ nāmāsti // (44) Par.?

dvayos tu śrutyor bhāvāt // (45) Par.?

dve hy ete vākye // (46) Par.?

tatraikena kevalayavasādhanatā gamyata ekena kevalavrīhisādhanatā // (47) Par.?

na ca vākyenāvagato 'rtho 'pahnūyate // (48) Par.?

tasmād vrīhiyavayor upapanno vikalpo bṛhadrathantarayoś ca // (49) Par.?

tasmād uktaṃ śrutiviruddhā smṛtir apramāṇam iti // (50) Par.?

ataś ca sarvaveṣṭanādi nādaraṇīyam // (51) Par.?