Texts

īśvara uvāca / (1.1) Par.?

aliṅgamekamavyaktaṃ liṅgaṃ brahmeti niścitam / (1.2) Par.?

svayaṃjyotiḥ paraṃ tattvaṃ pare vyomni vyavasthitam // (1.3) Par.?

avyaktaṃ kāraṇaṃ yattadakṣaraṃ paramaṃ padam / (2.1) Par.?

nirguṇaṃ śuddhavijñānaṃ tad vai paśyanti sūrayaḥ // (2.2) Par.?

tanniṣṭhāḥ śāntasaṃkalpā nityaṃ tadbhāvabhāvitāḥ / (3.1) Par.?

paśyanti tat paraṃ brahma yattalliṅgamiti śrutiḥ // (3.2) Par.?

anyathā nahi māṃ draṣṭuṃ śakyaṃ vai munipuṅgavāḥ / (4.1) Par.?

nahi tad vidyate jñānaṃ yatastajjñāyate param // (4.2) Par.?

etattatparamaṃ jñānaṃ kevalaṃ kavayo viduḥ / (5.1) Par.?

ajñānamitarat sarvaṃ yasmān māyāmayaṃ jagat // (5.2) Par.?

yajjñānaṃ nirmalaṃ sūkṣmaṃ nirvikalpaṃ yadavyayam / (6.1) Par.?

mamātmāsau tadevam iti prāhurvipaścitaḥ // (6.2) Par.?

ye 'pyanekaṃ prapaśyanti te 'pi paśyanti tatparam / (7.1) Par.?

āśritāḥ paramāṃ niṣṭhāṃ buddhvaikaṃ tattvamavyayam // (7.2) Par.?

ye punaḥ paramaṃ tattvamekaṃ vānekamīśvaram / (8.1) Par.?

bhaktyā māṃ samprapaśyanti vijñeyāste tadātmakāḥ // (8.2) Par.?

sākṣādeva prapaśyanti svātmānaṃ parameśvaram / (9.1) Par.?

nityānandaṃ nirvikalpaṃ satyarūpamiti sthitiḥ // (9.2) Par.?

bhajante paramānandaṃ sarvagaṃ yattadātmakam / (10.1) Par.?

svātmanyavasthitāḥ śāntāḥ pare 'vyakte parasya tu // (10.2) Par.?

eṣā vimuktiḥ paramā mama sāyujyamuttamam / (11.1) Par.?

nirvāṇaṃ brahmaṇā caikyaṃ kaivalyaṃ kavayo viduḥ // (11.2) Par.?

tasmād anādimadhyāntaṃ vastvekaṃ paramaṃ śivam / (12.1) Par.?

sa īśvaro mahādevas taṃ vijñāya vimucyate // (12.2) Par.?

na tatra sūryaḥ pravibhātīha candro na nakṣatrāṇi tapano nota vidyut / (13.1) Par.?

tadbhāsedamakhilaṃ bhāti nityaṃ tannityabhāsamacalaṃ sadvibhāti // (13.2) Par.?

nityoditaṃ saṃvidā nirvikalpaṃ śuddhaṃ bṛhantaṃ paramaṃ yadvibhāti / (14.1) Par.?

atrāntaraṃ brahmavido 'tha nityaṃ paśyanti tattvamacalaṃ yat sa īśaḥ // (14.2) Par.?

nityānandamamṛtaṃ satyarūpaṃ śuddhaṃ vadanti puruṣaṃ sarvavedāḥ / (15.1) Par.?

tamomiti praṇaveneśitāraṃ dhyāyanti vedārthaviniścitārthāḥ // (15.2) Par.?

na bhūmirāpo na mano na vahniḥ prāṇo 'nilo gaganaṃ nota buddhiḥ / (16.1) Par.?

na cetano 'nyat paramākāśamadhye vibhāti devaḥ śiva eva kevalaḥ // (16.2) Par.?

ityetaduktaṃ paramaṃ rahasyaṃ jñānāmṛtaṃ sarvavedeṣu gūḍham / (17.1) Par.?

jānāti yogī vijane 'tha deśe yuñjīta yogaṃ prayato hyajasram // (17.2) Par.?

iti śrīkūrmapurāṇe ṣaṭsāhasryāṃ saṃhitāyāmuparivibhāge īśvaragītāsu daśamo 'dhyāyaḥ // (18.1) Par.?