Texts

tasya tadvacanaṃ śrutvā vānarasya mahātmanaḥ / (1.1) Par.?

ājñāpayad vadhaṃ tasya rāvaṇaḥ krodhamūrchitaḥ // (1.2) Par.?

vadhe tasya samājñapte rāvaṇena durātmanā / (2.1) Par.?

niveditavato dautyaṃ nānumene vibhīṣaṇaḥ // (2.2) Par.?

taṃ rakṣo'dhipatiṃ kruddhaṃ tacca kāryam upasthitam / (3.1) Par.?

viditvā cintayāmāsa kāryaṃ kāryavidhau sthitaḥ // (3.2) Par.?

niścitārthastataḥ sāmnāpūjya śatrujidagrajam / (4.1) Par.?

uvāca hitam atyarthaṃ vākyaṃ vākyaviśāradaḥ // (4.2) Par.?

rājan dharmaviruddhaṃ ca lokavṛtteśca garhitam / (5.1) Par.?

tava cāsadṛśaṃ vīra kaper asya pramāpaṇam // (5.2) Par.?

asaṃśayaṃ śatrur ayaṃ pravṛddhaḥ kṛtaṃ hyanenāpriyam aprameyam / (6.1) Par.?

na dūtavadhyāṃ pravadanti santo dūtasya dṛṣṭā bahavo hi daṇḍāḥ // (6.2) Par.?

vairūpyam aṅgeṣu kaśābhighāto mauṇḍyaṃ tathā lakṣaṇasaṃnipātaḥ / (7.1) Par.?

etān hi dūte pravadanti daṇḍān vadhastu dūtasya na naḥ śruto 'pi // (7.2) Par.?

kathaṃ ca dharmārthavinītabuddhiḥ parāvarapratyayaniścitārthaḥ / (8.1) Par.?

bhavadvidhaḥ kopavaśe hi tiṣṭhet kopaṃ niyacchanti hi sattvavantaḥ // (8.2) Par.?

na dharmavāde na ca lokavṛtte na śāstrabuddhigrahaṇeṣu vāpi / (9.1) Par.?

vidyeta kaścit tava vīra tulyas tvaṃ hyuttamaḥ sarvasurāsurāṇām // (9.2) Par.?

na cāpyasya kaper ghāte kaṃcit paśyāmyahaṃ guṇam / (10.1) Par.?

teṣvayaṃ pātyatāṃ daṇḍo yair ayaṃ preṣitaḥ kapiḥ // (10.2) Par.?

sādhur vā yadi vāsādhuḥ parair eṣa samarpitaḥ / (11.1) Par.?

bruvan parārthaṃ paravānna dūto vadham arhati // (11.2) Par.?

api cāsmin hate rājannānyaṃ paśyāmi khecaram / (12.1) Par.?

iha yaḥ punar āgacchet paraṃ pāraṃ mahodadhiḥ // (12.2) Par.?

tasmānnāsya vadhe yatnaḥ kāryaḥ parapuraṃjaya / (13.1) Par.?

bhavān sendreṣu deveṣu yatnam āsthātum arhati // (13.2) Par.?

asmin vinaṣṭe na hi dūtam anyaṃ paśyāmi yastau nararājaputrau / (14.1) Par.?

yuddhāya yuddhapriyadurvinītāv udyojayed dīrghapathāvaruddhau // (14.2) Par.?

parākramotsāhamanasvināṃ ca surāsurāṇām api durjayena / (15.1) Par.?

tvayā manonandana nairṛtānāṃ yuddhāyatir nāśayituṃ na yuktā // (15.2) Par.?

hitāśca śūrāśca samāhitāśca kuleṣu jātāśca mahāguṇeṣu / (16.1) Par.?

manasvinaḥ śastrabhṛtāṃ variṣṭhāḥ koṭyagraśaste subhṛtāśca yodhāḥ // (16.2) Par.?

tad ekadeśena balasya tāvat kecit tavādeśakṛto 'payāntu / (17.1) Par.?

tau rājaputrau vinigṛhya mūḍhau pareṣu te bhāvayituṃ prabhāvam // (17.2) Par.?