Texts

yā āgneyīr gāyatrīr mūrdhanvatīs tābhis tisṛbhis tisraḥ pūrvārdha upadadhāti // (1) Par.?

atha triṣṭubbhir atha jagatībhir athānuṣṭubbhir atha paṅktibhir atha yat kiñcāgneyaṃ chandaḥ // (2) Par.?

tisra ekena chandasā // (3) Par.?

tisra ekena // (4) Par.?

sarvam agnim anūpadadhāti // (5) Par.?

etāṃ ha vai yajñasenaś caitraś citiṃ vidāṃcakāra // (6) Par.?

tayā ha vai sa ānardha // (7) Par.?

ṛdhnoti ya evaṃ vidvān etā upadhatte // (8) Par.?

paśavo vai chandāṃsi // (9) Par.?

vāmaṃ devānām // (10) Par.?

paśūn eva vāmaṃ bhrātṛvyasya vṛṅkte // (11) Par.?

ātmā vā āhavanīyaḥ // (12) Par.?

bhrātṛvyo dhiṣṇyaḥ // (13) Par.?

yad gārhapatya upadadhyād bhrātṛvye vāmaṃ paśūn dadhyāt // (14) Par.?

āhavanīya upadadhāti // (15) Par.?

ātmann eva vāmaṃ paśūn dhatte // (16) Par.?

saiṣottaravedir nāma citiḥ // (17) Par.?

tasmād etā uttamāyāṃ cityām upadhīyante // (18) Par.?

uttamas samānānāṃ bhavati ya evaṃ vidvān etā upadhatte // (19) Par.?

paśur vā agniḥ // (20) Par.?

agnimukhān prajāpatiḥ paśūn asṛjata // (21) Par.?

yat pañca citayaḥ tasmāt pāṅktāḥ paśava ucyante // (22) Par.?

yat tisraḥ trivṛddhy agniḥ // (23) Par.?

yad dve dvipād yajamānaḥ pratiṣṭhityai // (24) Par.?

dvyakṣaraṃ loma // (25) Par.?

dvyakṣaraṃ carma // (26) Par.?

dvyakṣaraṃ māṃsam // (27) Par.?

dvyakṣaram asthi // (28) Par.?

dvyakṣaro majjā // (29) Par.?

tad daśa // (30) Par.?

daśākṣarā virāṭ // (31) Par.?

tasmād vairājāḥ paśava ucyante // (32) Par.?

yo jānudaghnas sa gāyatracit // (33) Par.?

yo nābhidaghnas sa triṣṭupcit // (34) Par.?

yaḥ puruṣamātras sa jagaccit // (35) Par.?

śyenacitaṃ pakṣiṇaṃ cinvīta svargakāmaḥ // (36) Par.?

śyeno vai vayasāṃ kṣepiṣṭhaḥ svargasya lokasya samaṣṭyai // (37) Par.?

alajacitaṃ pakṣiṇaṃ catussītaṃ cinvīta pratiṣṭhākāmaḥ // (38) Par.?

catasro diśaḥ // (39) Par.?

dikṣv eva pratitiṣṭhati // (40) Par.?

kaṅkacitaṃ śīrṣaṇvantaṃ cinvīta yaḥ kāmayeta saśīrṣāmuṣmiṃl loke syām iti // (41) Par.?

saśīrṣaivāmuṣmiṃl loke bhavati // (42) Par.?

praugacitaṃ cinvīta yadi manyeta pūrvo mātikrānto bhrātṛvya iti // (43) Par.?

praugacitā vai devā asurān prāṇudanta ya enān pūrve 'tikrāntā āsan // (44) Par.?

ya evainaṃ pūrvo 'tikrānto bhrātṛvyas taṃ tena praṇudate // (45) Par.?

ubhayataḥpraugaṃ cinvīta yadi manyeta paścān me bhrātṛvya iti // (46) Par.?

ya evāsya paścād bhrātṛvyas taṃ tenāpanudate // (47) Par.?

pra śreyāṃsaṃ bhrātṛvyaṃ nudate // (48) Par.?

prati pāpīyāṃsaṃ nudate // (49) Par.?

rathacakracitaṃ cinvītābhicaran // (50) Par.?

rathacakracitaṃ ha sma vai devā asurebhyo vajram iyadbhyas tvety abhyavasṛjanti // (51) Par.?

vajram eva bhrātṛvyāya praharati // (52) Par.?

stṛṇuta enam // (53) Par.?

samūhyaṃ cinvīta paśukāmaḥ // (54) Par.?

paśavo vai purīṣam // (55) Par.?

paśūn evāsmai samūhati // (56) Par.?

sarvata uttaravediṃ nivapati // (57) Par.?

paśavo vā uttaravediḥ // (58) Par.?

paśūn evāvarunddhe // (59) Par.?

paricāyyaṃ cinvīta sajātakāmaḥ // (60) Par.?

parīva vai sajātā viśanti // (61) Par.?

sajātair evainaṃ paricinoti // (62) Par.?

droṇacitaṃ cinvītānnakāmaḥ // (63) Par.?

pātreṇa vā annam adyate // (64) Par.?

tenaiva mukhenānnam atti // (65) Par.?

śmaśānacitaṃ cinvīta yaḥ kāmayeta pitṛloka ṛdhnuyām iti // (66) Par.?

śmaśānacitā vai yamo 'muṣmiṃl loka ārdhnot // (67) Par.?

pitṛloka evardhnoti // (68) Par.?

gāyatracitaṃ pakṣiṇaṃ cinvīta svargakāmaḥ // (69) Par.?

agnir vai tat pakṣī bhūtvā svargaṃ lokam apatat // (70) Par.?

yad āhur gāyatrī pakṣiṇī bhūtvā svargaṃ lokam apatad iti svargasya lokasya samaṣṭyai // (71) Par.?

anye 'gnaya ūrdhvāś cīyante nyañco 'nye // (72) Par.?

ya ūrdhvāś cīyante te 'muṣmai lokāya ye nyañcas te 'smai // (73) Par.?

yad ūrdhvas tiṣṭhan hiraṇyaśalkaiḥ prokṣati tenaivainam ūrdhvaṃ cinute svargasya lokasya samaṣṭyai // (74) Par.?