Texts

ghanarahitabījacāraṇasamprāptadalādilābhakṛtakṛtyāḥ / (1.1) Par.?

kṛpaṇāḥ prāpya samudraṃ varāṭikālābhasaṃtuṣṭāḥ // (1.2) Par.?

anye punarmahānto lakṣmīkarirājakaustubhādīni / (2.1) Par.?

avadhīrya labdhavantaḥ parāmṛtaṃ cāmarā jātāḥ // (2.2) Par.?

kṣārauṣadhipaṭvamlaiḥ kṣudbodho rāgabandhane svedāt / (3.1) Par.?

na punaḥ pakṣacchedo dravatvaṃ vā vinā gaganam // (3.2) Par.?

abhrakajīrṇo balavān bhavati rasastasya cāraṇe proktāḥ / (4.1) Par.?

saṃdhānavāsanauṣadhinirmukhasamukhā mahāyogāḥ // (4.2) Par.?

niścandrikaṃ hi gaganaṃ kṣārāmlairbhāvitaṃ tathā rudhiraiḥ / (5.1) Par.?

sṛṣṭitrayanīrakaṇātumbarurasamarditaṃ carati // (5.2) Par.?

yavaciñcikāmbupuṭitaṃ tanmūlaśatāvarīgadākulitam / (6.1) Par.?

ghanaravaśigrupunarnavarasabhāvitamabhrakaṃ carati // (6.2) Par.?

sarjīkṣitikhagaṭaṅkaṇalavaṇānvitam arkabhājane tridinam / (7.1) Par.?

paryuṣitamāranālaṃ gaganādiṣu bhāvane śastam // (7.2) Par.?

tasminnāgaṃ śuddhaṃ pradrāvya niṣecayecchataṃ vārān / (8.1) Par.?

vaṅgaṃ vā tāravidhau rasāyane naiva tadyojyam // (8.2) Par.?

gaganarasoparasāmṛtaloharasāyasādicūrṇāni / (9.1) Par.?

sarvamanena ha bhāvyaṃ yatkiṃcit cāraṇāvastu // (9.2) Par.?

ādau khalve mṛditāṃ piṣṭīṃ hemnaśca tāṃ rasaścarati / (10.1) Par.?

tārasya tārakarmaṇi dattvā sūte tato gaganam // (10.2) Par.?

truṭiśo dattvā mṛditaṃ sāre khalve 'bhrahemalohādi / (11.1) Par.?

carati rasendraḥ kṣitikhagavetasabījapūrāmlaiḥ // (11.2) Par.?

samukhaṃ nirmukhamathavā tulyaṃ dviguṇaṃ caturguṇaṃ vāpi / (12.1) Par.?

aṣṭaguṇaṃ ṣoḍaśaguṇamathavā dvātriṃśatāguṇitam // (12.2) Par.?

iti pattrābhrakam uktaṃ tena vidhānena cārayetsūtam / (13.1) Par.?

grāsaḥ piṣṭī garbhastrilakṣaṇā cāraṇā bhavati // (13.2) Par.?

dolanavidhinā yair api nānāvidhabhaṅgasaṃskṛtaṃ gaganam / (14.1) Par.?

cāraṇavidhau pradiṣṭaṃ dṛṣṭaṃ noddhūyamānaṃ taiḥ // (14.2) Par.?

anye 'pi tucchamatayo gandhakaniṣpiṣṭiśulbapiṣṭirajaḥ / (15.1) Par.?

dolanavidhinoddhūtaṃ rasajīrṇaṃ taditi manyante // (15.2) Par.?

tailādikataptarase hāṭakatārādigolakamukhena / (16.1) Par.?

carati ghanaṃ rasarājo hemādibhir eti piṇḍatvam // (16.2) Par.?

anye svacchaṃ kṛtvā śukapicchamukhena cārayanti ghanam / (17.1) Par.?

siddhopadeśavidhinā āśitagrāse na śuṣkeṇa // (17.2) Par.?

athavā mākṣikagaganaṃ samabhāgaṃ paṭuyutaṃ pakvam / (18.1) Par.?

prakṣipya lohapātre svedāntaścarati kṛṣṇābhram // (18.2) Par.?

taṃ pravakṣyāmyupadeśaṃ gandhābhrakasaṃpraveśanaṃ yena / (19.1) Par.?

pakṣachinnaś ca raso yogyaḥ syād rasarasāyanayoḥ // (19.2) Par.?

rasarājarāgadāyī bījānāṃ pākajāraṇasamarthaḥ / (20.1) Par.?

sūtakapakṣacchedī rasabandhe gandhako 'bhihitaḥ // (20.2) Par.?

dattvā khalve truṭiśo gandhakam ādau rasaṃ ca truṭiśo'pi / (21.1) Par.?

tāvacca mardanīyaṃ yāvatsā piṣṭikā bhavati // (21.2) Par.?

tadanu ca drutabalivasayā samabhāganiyojitaṃ tathā gaganam / (22.1) Par.?

truṭiśo rasaṃ ca dattvā kurvīta yathepsitāṃ piṣṭim // (22.2) Par.?

sāpi ca dīptairupalairnipātyate 'dho 'tha dīpikāyantre / (23.1) Par.?

tadanu ca nirmuktamalo nikṛntapakṣo 'bhragandhābhyām // (23.2) Par.?

bhasmākāraś ca raso hemnā saha yujyate sa ca dvaṃdve / (24.1) Par.?

athavā gandhakapiṣṭiṃ paktvā drutagandhakasya madhye tu // (24.2) Par.?

sā cāpi hemapiṣṭirvipacyate gandhake bhūyaḥ / (25.1) Par.?

itthaṃ hemnā sūto milati dvaṃdve tathā kṣaṇānmriyate // (25.2) Par.?

itare pakṣacchedaṃ dvaṃdve rasamāraṇaṃ na vāñchanti / (26.1) Par.?

bījānāmapi pākaṃ hṛṣyanti ca tadanu tapyanti // (26.2) Par.?

itthamanekadoṣairbahuśramairgaganacāraṇaṃ matvā / (27.1) Par.?

nirdiśyate prakāraḥ karmaṇi śāstre'pi saṃvādī // (27.2) Par.?

agrāhyo nirlepaḥ sūkṣmagatirvyāpako'kṣayo jīvaḥ / (28.1) Par.?

yāvadviśati na yonau tāvadbandhaṃ kuto bhajate // (28.2) Par.?

iti paramahaṃsaparivrājakācāryaśrīmadgovindabhagavatpādaviracite rasahṛdayākhye tantre nirmukhavāsanāmukhāntarbhūtasamukhapattrābhrakacaraṇātmakas tṛtīyo 'vabodhaḥ // (29.1) Par.?