Texts

tathā vasiṣṭhe bruvati rājā daśarathaḥ sutam / (1.1) Par.?

prahṛṣṭavadano rāmam ājuhāva salakṣmaṇam // (1.2) Par.?

kṛtasvastyayanaṃ mātrā pitrā daśarathena ca / (2.1) Par.?

purodhasā vasiṣṭhena maṅgalair abhimantritam // (2.2) Par.?

sa putraṃ mūrdhny upāghrāya rājā daśarathaḥ priyam / (3.1) Par.?

dadau kuśikaputrāya suprītenāntarātmanā // (3.2) Par.?

tato vāyuḥ sukhasparśo virajasko vavau tadā / (4.1) Par.?

viśvāmitragataṃ rāmaṃ dṛṣṭvā rājīvalocanam // (4.2) Par.?

puṣpavṛṣṭir mahaty āsīd devadundubhinisvanaḥ / (5.1) Par.?

śaṅkhadundubhinirghoṣaḥ prayāte tu mahātmani // (5.2) Par.?

viśvāmitro yayāv agre tato rāmo mahāyaśāḥ / (6.1) Par.?

kākapakṣadharo dhanvī taṃ ca saumitrir anvagāt // (6.2) Par.?

kalāpinau dhanuṣpāṇī śobhayānau diśo daśa / (7.1) Par.?

viśvāmitraṃ mahātmānaṃ triśīrṣāv iva pannagau / (7.2) Par.?

anujagmatur akṣudrau pitāmaham ivāśvinau // (7.3) Par.?

baddhagodhāṅgulitrāṇau khaḍgavantau mahādyutī / (8.1) Par.?

sthāṇuṃ devam ivācintyaṃ kumārāv iva pāvakī // (8.2) Par.?

adhyardhayojanaṃ gatvā sarayvā dakṣiṇe taṭe / (9.1) Par.?

rāmeti madhurāṃ vāṇīṃ viśvāmitro 'bhyabhāṣata // (9.2) Par.?

gṛhāṇa vatsa salilaṃ mā bhūt kālasya paryayaḥ / (10.1) Par.?

mantragrāmaṃ gṛhāṇa tvaṃ balām atibalāṃ tathā // (10.2) Par.?

na śramo na jvaro vā te na rūpasya viparyayaḥ / (11.1) Par.?

na ca suptaṃ pramattaṃ vā dharṣayiṣyanti nairṛtāḥ // (11.2) Par.?

na bāhvoḥ sadṛśo vīrye pṛthivyām asti kaścana / (12.1) Par.?

triṣu lokeṣu vā rāma na bhavet sadṛśas tava // (12.2) Par.?

na saubhāgye na dākṣiṇye na jñāne buddhiniścaye / (13.1) Par.?

nottare pratipattavyaḥ samo loke tavānagha // (13.2) Par.?

etadvidyādvaye labdhe bhavitā nāsti te samaḥ / (14.1) Par.?

balā cātibalā caiva sarvajñānasya mātarau // (14.2) Par.?

kṣutpipāse na te rāma bhaviṣyete narottama / (15.1) Par.?

balām atibalāṃ caiva paṭhataḥ pathi rāghava / (15.2) Par.?

vidyādvayam adhīyāne yaśaś cāpy atulaṃ bhuvi // (15.3) Par.?

pitāmahasute hy ete vidye tejaḥsamanvite / (16.1) Par.?

pradātuṃ tava kākutstha sadṛśas tvaṃ hi dhārmika // (16.2) Par.?

kāmaṃ bahuguṇāḥ sarve tvayy ete nātra saṃśayaḥ / (17.1) Par.?

tapasā saṃbhṛte caite bahurūpe bhaviṣyataḥ // (17.2) Par.?

tato rāmo jalaṃ spṛṣṭvā prahṛṣṭavadanaḥ śuciḥ / (18.1) Par.?

pratijagrāha te vidye maharṣer bhāvitātmanaḥ / (18.2) Par.?

vidyāsamudito rāmaḥ śuśubhe bhūrivikramaḥ // (18.3) Par.?

gurukāryāṇi sarvāṇi niyujya kuśikātmaje / (19.1) Par.?

ūṣus tāṃ rajanīṃ tatra sarayvāṃ susukhaṃ trayaḥ // (19.2) Par.?