Texts

mārīcena tu tad vākyaṃ kṣamaṃ yuktaṃ ca rāvaṇaḥ / (1.1) Par.?

ukto na pratijagrāha martukāma ivauṣadham // (1.2) Par.?

taṃ pathyahitavaktāraṃ mārīcaṃ rākṣasādhipaḥ / (2.1) Par.?

abravīt paruṣaṃ vākyam ayuktaṃ kālacoditaḥ // (2.2) Par.?

yat kilaitad ayuktārthaṃ mārīca mayi kathyate / (3.1) Par.?

vākyaṃ niṣphalam atyarthaṃ bījam uptam ivoṣare // (3.2) Par.?

tvadvākyair na tu māṃ śakyaṃ bhettuṃ rāmasya saṃyuge / (4.1) Par.?

pāpaśīlasya mūrkhasya mānuṣasya viśeṣataḥ // (4.2) Par.?

yas tyaktvā suhṛdo rājyaṃ mātaraṃ pitaraṃ tathā / (5.1) Par.?

strīvākyaṃ prākṛtaṃ śrutvā vanam ekapade gataḥ // (5.2) Par.?

avaśyaṃ tu mayā tasya saṃyuge kharaghātinaḥ / (6.1) Par.?

prāṇaiḥ priyatarā sītā hartavyā tava saṃnidhau // (6.2) Par.?

evaṃ me niścitā buddhir hṛdi mārīca vartate / (7.1) Par.?

na vyāvartayituṃ śakyā sendrair api surāsuraiḥ // (7.2) Par.?

doṣaṃ guṇaṃ vā saṃpṛṣṭas tvam evaṃ vaktum arhasi / (8.1) Par.?

apāyaṃ vāpy upāyaṃ vā kāryasyāsya viniścaye // (8.2) Par.?

saṃpṛṣṭena tu vaktavyaṃ sacivena vipaścitā / (9.1) Par.?

udyatāñjalinā rājño ya icched bhūtim ātmanaḥ // (9.2) Par.?

vākyam apratikūlaṃ tu mṛdupūrvaṃ śubhaṃ hitam / (10.1) Par.?

upacāreṇa yuktaṃ ca vaktavyo vasudhādhipaḥ // (10.2) Par.?

sāvamardaṃ tu yad vākyaṃ mārīca hitam ucyate / (11.1) Par.?

nābhinandati tad rājā mānārho mānavarjitam // (11.2) Par.?

pañcarūpāṇi rājāno dhārayanty amitaujasaḥ / (12.1) Par.?

agner indrasya somasya yamasya varuṇasya ca / (12.2) Par.?

auṣṇyaṃ tathā vikramaṃ ca saumyaṃ daṇḍaṃ prasannatām // (12.3) Par.?

tasmāt sarvāsv avasthāsu mānyāḥ pūjyāś ca pārthivāḥ / (13.1) Par.?

tvaṃ tu dharmam avijñāya kevalaṃ moham āsthitaḥ // (13.2) Par.?

abhyāgataṃ māṃ daurātmyāt paruṣaṃ vadasīdṛśam / (14.1) Par.?

guṇadoṣau na pṛcchāmi kṣamaṃ cātmani rākṣasa / (14.2) Par.?

asmiṃs tu sa bhavān kṛtye sāhāyyaṃ kartum arhasi // (14.3) Par.?

sauvarṇas tvaṃ mṛgo bhūtvā citro rajatabindubhiḥ / (15.1) Par.?

pralobhayitvā vaidehīṃ yatheṣṭaṃ gantum arhasi // (15.2) Par.?

tvāṃ tu māyāmṛgaṃ dṛṣṭvā kāñcanaṃ jātavismayā / (16.1) Par.?

ānayainam iti kṣipraṃ rāmaṃ vakṣyati maithilī // (16.2) Par.?

apakrānte ca kākutsthe lakṣmaṇe ca yathāsukham / (17.1) Par.?

ānayiṣyāmi vaidehīṃ sahasrākṣaḥ śacīm iva // (17.2) Par.?

evaṃ kṛtvā tv idaṃ kāryaṃ yatheṣṭaṃ gaccha rākṣasa / (18.1) Par.?

rājyasyārdhaṃ pradāsyāmi mārīca tava suvrata // (18.2) Par.?

gaccha saumya śivaṃ mārgaṃ kāryasyāsya vivṛddhaye / (19.1) Par.?

prāpya sītām ayuddhena vañcayitvā tu rāghavam / (19.2) Par.?

laṅkāṃ prati gamiṣyāmi kṛtakāryaḥ saha tvayā // (19.3) Par.?

etat kāryam avaśyaṃ me balād api kariṣyasi / (20.1) Par.?

rājño hi pratikūlastho na jātu sukham edhate // (20.2) Par.?

āsādya taṃ jīvitasaṃśayas te mṛtyur dhruvo hy adya mayā virudhya / (21.1) Par.?

etad yathāvat parigṛhya buddhyā yad atra pathyaṃ kuru tat tathā tvam // (21.2) Par.?