Texts

evaṃ bruvatyāṃ sītāyāṃ saṃrabdhaḥ paruṣākṣaram / (1.1) Par.?

lalāṭe bhrukuṭīṃ kṛtvā rāvaṇaḥ pratyuvāca ha // (1.2) Par.?

bhrātā vaiśravaṇasyāhaṃ sāpatnyo varavarṇini / (2.1) Par.?

rāvaṇo nāma bhadraṃ te daśagrīvaḥ pratāpavān // (2.2) Par.?

yasya devāḥ sagandharvāḥ piśācapatagoragāḥ / (3.1) Par.?

vidravanti bhayād bhītā mṛtyor iva sadā prajāḥ // (3.2) Par.?

yena vaiśravaṇo bhrātā vaimātraḥ kāraṇāntare / (4.1) Par.?

dvaṃdvam āsāditaḥ krodhād raṇe vikramya nirjitaḥ // (4.2) Par.?

madbhayārtaḥ parityajya svam adhiṣṭhānam ṛddhimat / (5.1) Par.?

kailāsaṃ parvataśreṣṭham adhyāste naravāhanaḥ // (5.2) Par.?

yasya tat puṣpakaṃ nāma vimānaṃ kāmagaṃ śubham / (6.1) Par.?

vīryād āvarjitaṃ bhadre yena yāmi vihāyasam // (6.2) Par.?

mama saṃjātaroṣasya mukhaṃ dṛṣṭvaiva maithili / (7.1) Par.?

vidravanti paritrastāḥ surāḥ śakrapurogamāḥ // (7.2) Par.?

yatra tiṣṭhāmy ahaṃ tatra māruto vāti śaṅkitaḥ / (8.1) Par.?

tīvrāṃśuḥ śiśirāṃśuś ca bhayāt sampadyate raviḥ // (8.2) Par.?

niṣkampapattrās taravo nadyaś ca stimitodakāḥ / (9.1) Par.?

bhavanti yatra yatrāhaṃ tiṣṭhāmi ca carāmi ca // (9.2) Par.?

mama pāre samudrasya laṅkā nāma purī śubhā / (10.1) Par.?

sampūrṇā rākṣasair ghorair yathendrasyāmarāvatī // (10.2) Par.?

prākāreṇa parikṣiptā pāṇḍureṇa virājitā / (11.1) Par.?

hemakakṣyā purī ramyā vaiḍūryamayatoraṇā // (11.2) Par.?

hastyaśvarathasambādhā tūryanādavināditā / (12.1) Par.?

sarvakāmaphalair vṛkṣaiḥ saṃkulodyānaśobhitā // (12.2) Par.?

tatra tvaṃ vasatī sīte rājaputri mayā saha / (13.1) Par.?

na smariṣyasi nārīṇāṃ mānuṣīṇāṃ manasvini // (13.2) Par.?

bhuñjānā mānuṣān bhogān divyāṃś ca varavarṇini / (14.1) Par.?

na smariṣyasi rāmasya mānuṣasya gatāyuṣaḥ // (14.2) Par.?

sthāpayitvā priyaṃ putraṃ rājñā daśarathena yaḥ / (15.1) Par.?

mandavīryaḥ suto jyeṣṭhas tataḥ prasthāpito vanam // (15.2) Par.?

tena kiṃ bhraṣṭarājyena rāmeṇa gatacetasā / (16.1) Par.?

kariṣyasi viśālākṣi tāpasena tapasvinā // (16.2) Par.?

sarvarākṣasabhartāraṃ kāmāt svayam ihāgatam / (17.1) Par.?

na manmathaśarāviṣṭaṃ pratyākhyātuṃ tvam arhasi // (17.2) Par.?

pratyākhyāya hi māṃ bhīruparitāpaṃ gamiṣyasi / (18.1) Par.?

caraṇenābhihatyeva purūravasam urvaśī // (18.2) Par.?

evam uktā tu vaidehī kruddhā saṃraktalocanā / (19.1) Par.?

abravīt paruṣaṃ vākyaṃ rahite rākṣasādhipam // (19.2) Par.?

kathaṃ vaiśravaṇaṃ devaṃ sarvabhūtanamaskṛtam / (20.1) Par.?

bhrātaraṃ vyapadiśya tvam aśubhaṃ kartum icchasi // (20.2) Par.?

avaśyaṃ vinaśiṣyanti sarve rāvaṇa rākṣasāḥ / (21.1) Par.?

yeṣāṃ tvaṃ karkaśo rājā durbuddhir ajitendriyaḥ // (21.2) Par.?

apahṛtya śacīṃ bhāryāṃ śakyam indrasya jīvitum / (22.1) Par.?

na tu rāmasya bhāryāṃ mām apanīyāsti jīvitam // (22.2) Par.?

jīvec ciraṃ vajradharasya hastāc chacīṃ pradhṛṣyāpratirūparūpām / (23.1) Par.?

na mādṛśīṃ rākṣasa dharṣayitvā pītāmṛtasyāpi tavāsti mokṣaḥ // (23.2) Par.?