Texts

tat tu mālyavato vākyaṃ hitam uktaṃ daśānanaḥ / (1.1) Par.?

na marṣayati duṣṭātmā kālasya vaśam āgataḥ // (1.2) Par.?

sa baddhvā bhrukuṭiṃ vaktre krodhasya vaśam āgataḥ / (2.1) Par.?

amarṣāt parivṛttākṣo mālyavantam athābravīt // (2.2) Par.?

hitabuddhyā yad ahitaṃ vacaḥ paruṣam ucyate / (3.1) Par.?

parapakṣaṃ praviśyaiva naitacchrotragataṃ mama // (3.2) Par.?

mānuṣaṃ kṛpaṇaṃ rāmam ekaṃ śākhāmṛgāśrayam / (4.1) Par.?

samarthaṃ manyase kena tyaktaṃ pitrā vanālayam // (4.2) Par.?

rakṣasām īśvaraṃ māṃ ca devatānāṃ bhayaṃkaram / (5.1) Par.?

hīnaṃ māṃ manyase kena ahīnaṃ sarvavikramaiḥ // (5.2) Par.?

vīradveṣeṇa vā śaṅke pakṣapātena vā ripoḥ / (6.1) Par.?

tvayāhaṃ paruṣāṇyuktaḥ paraprotsāhanena vā // (6.2) Par.?

prabhavantaṃ padasthaṃ hi paruṣaṃ ko 'bhidhāsyati / (7.1) Par.?

paṇḍitaḥ śāstratattvajño vinā protsāhanād ripoḥ // (7.2) Par.?

ānīya ca vanāt sītāṃ padmahīnām iva śriyam / (8.1) Par.?

kimarthaṃ pratidāsyāmi rāghavasya bhayād aham // (8.2) Par.?

vṛtaṃ vānarakoṭībhiḥ sasugrīvaṃ salakṣmaṇam / (9.1) Par.?

paśya kaiścid ahobhistvaṃ rāghavaṃ nihataṃ mayā // (9.2) Par.?

dvandve yasya na tiṣṭhanti daivatānyapi saṃyuge / (10.1) Par.?

sa kasmād rāvaṇo yuddhe bhayam āhārayiṣyati // (10.2) Par.?

dvidhā bhajyeyam apyevaṃ na nameyaṃ tu kasyacit / (11.1) Par.?

eṣa me sahajo doṣaḥ svabhāvo duratikramaḥ // (11.2) Par.?

yadi tāvat samudre tu setur baddho yadṛcchayā / (12.1) Par.?

rāmeṇa vismayaḥ ko 'tra yena te bhayam āgatam // (12.2) Par.?

sa tu tīrtvārṇavaṃ rāmaḥ saha vānarasenayā / (13.1) Par.?

pratijānāmi te satyaṃ na jīvan pratiyāsyati // (13.2) Par.?

evaṃ bruvāṇaṃ saṃrabdhaṃ ruṣṭaṃ vijñāya rāvaṇam / (14.1) Par.?

vrīḍito mālyavān vākyaṃ nottaraṃ pratyapadyata // (14.2) Par.?

jayāśiṣā ca rājānaṃ vardhayitvā yathocitam / (15.1) Par.?

mālyavān abhyanujñāto jagāma svaṃ niveśanam // (15.2) Par.?

rāvaṇastu sahāmātyo mantrayitvā vimṛśya ca / (16.1) Par.?

laṅkāyām atulāṃ guptiṃ kārayāmāsa rākṣasaḥ // (16.2) Par.?

vyādideśa ca pūrvasyāṃ prahastaṃ dvāri rākṣasam / (17.1) Par.?

dakṣiṇasyāṃ mahāvīryau mahāpārśvamahodarau // (17.2) Par.?

paścimāyām atho dvāri putram indrajitaṃ tathā / (18.1) Par.?

vyādideśa mahāmāyaṃ rākṣasair bahubhir vṛtam // (18.2) Par.?

uttarasyāṃ puradvāri vyādiśya śukasāraṇau / (19.1) Par.?

svayaṃ cātra bhaviṣyāmi mantriṇastān uvāca ha // (19.2) Par.?

rākṣasaṃ tu virūpākṣaṃ mahāvīryaparākramam / (20.1) Par.?

madhyame 'sthāpayad gulme bahubhiḥ saha rākṣasaiḥ // (20.2) Par.?

evaṃvidhānaṃ laṅkāyāṃ kṛtvā rākṣasapuṃgavaḥ / (21.1) Par.?

mene kṛtārtham ātmānaṃ kṛtāntavaśam āgataḥ // (21.2) Par.?

visarjayāmāsa tataḥ sa mantriṇo vidhānam ājñāpya purasya puṣkalam / (22.1) Par.?

jayāśiṣā mantragaṇena pūjito viveśa so 'ntaḥpuram ṛddhimanmahat // (22.2) Par.?