Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 9293

Click on a sentence to show its analysis
Keep the mouse pointer over a lemma to show its meanings.

vaiśaṃpāyana uvāca / (1.1) Par.?

tato 'bhiṣecanīye 'hni brāhmaṇā rājabhiḥ saha / (1.2) Par.?

antarvedīṃ praviviśuḥ satkārārthaṃ maharṣayaḥ // (1.3) Par.?

nāradapramukhāstasyām antarvedyāṃ mahātmanaḥ / (2.1) Par.?

samāsīnāḥ śuśubhire saha rājarṣibhistadā // (2.2) Par.?

sametā brahmabhavane devā devarṣayo yathā / (3.1) Par.?

karmāntaram upāsanto jajalpur amitaujasaḥ // (3.2) Par.?

idam evaṃ na cāpyevam evam etanna cānyathā / (4.1) Par.?

ityūcur bahavastatra vitaṇḍānāḥ parasparam // (4.2) Par.?

kṛśān arthāṃstathā kecid akṛśāṃstatra kurvate / (5.1) Par.?

akṛśāṃśca kṛśāṃścakrur hetubhiḥ śāstraniścitaiḥ // (5.2) Par.?

tatra medhāvinaḥ kecid artham anyaiḥ prapūritam / (6.1) Par.?

vicikṣipur yathā śyenā nabhogatam ivāmiṣam // (6.2) Par.?

kecid dharmārthasaṃyuktāḥ kathāstatra mahāvratāḥ / (7.1) Par.?

remire kathayantaśca sarvavedavidāṃ varāḥ // (7.2) Par.?

sā vedir vedasampannair devadvijamaharṣibhiḥ / (8.1) Par.?

ābabhāse samākīrṇā nakṣatrair dyaur ivāmalā // (8.2) Par.?

na tasyāṃ saṃnidhau śūdraḥ kaścid āsīnna cāvrataḥ / (9.1) Par.?

antarvedyāṃ tadā rājan yudhiṣṭhiraniveśane // (9.2) Par.?

tāṃ tu lakṣmīvato lakṣmīṃ tadā yajñavidhānajām / (10.1) Par.?

tutoṣa nāradaḥ paśyan dharmarājasya dhīmataḥ // (10.2) Par.?

atha cintāṃ samāpede sa munir manujādhipa / (11.1) Par.?

nāradastaṃ tadā paśyan sarvakṣatrasamāgamam // (11.2) Par.?

sasmāra ca purāvṛttāṃ kathāṃ tāṃ bharatarṣabha / (12.1) Par.?

aṃśāvataraṇe yāsau brahmaṇo bhavane 'bhavat // (12.2) Par.?

devānāṃ saṃgamaṃ taṃ tu vijñāya kurunandana / (13.1) Par.?

nāradaḥ puṇḍarīkākṣaṃ sasmāra manasā harim // (13.2) Par.?

sākṣāt sa vibudhārighnaḥ kṣatre nārāyaṇo vibhuḥ / (14.1) Par.?

pratijñāṃ pālayan dhīmāñ jātaḥ parapuraṃjayaḥ // (14.2) Par.?

saṃdideśa purā yo 'sau vibudhān bhūtakṛt svayam / (15.1) Par.?

anyonyam abhinighnantaḥ punar lokān avāpsyatha // (15.2) Par.?

iti nārāyaṇaḥ śaṃbhur bhagavāñ jagataḥ prabhuḥ / (16.1) Par.?

ādiśya vibudhān sarvān ajāyata yadukṣaye // (16.2) Par.?

kṣitāvandhakavṛṣṇīnāṃ vaṃśe vaṃśabhṛtāṃ varaḥ / (17.1) Par.?

parayā śuśubhe lakṣmyā nakṣatrāṇām ivoḍurāṭ // (17.2) Par.?

yasya bāhubalaṃ sendrāḥ surāḥ sarva upāsate / (18.1) Par.?

so 'yaṃ mānuṣavannāma harir āste 'rimardanaḥ // (18.2) Par.?

aho bata mahad bhūtaṃ svayaṃbhūr yad idaṃ svayam / (19.1) Par.?

ādāsyati punaḥ kṣatram evaṃ balasamanvitam // (19.2) Par.?

ityetāṃ nāradaścintāṃ cintayāmāsa dharmavit / (20.1) Par.?

hariṃ nārāyaṇaṃ jñātvā yajñair īḍyaṃ tam īśvaram // (20.2) Par.?

tasmin dharmavidāṃ śreṣṭho dharmarājasya dhīmataḥ / (21.1) Par.?

mahādhvare mahābuddhistasthau sa bahumānataḥ // (21.2) Par.?

tato bhīṣmo 'bravīd rājan dharmarājaṃ yudhiṣṭhiram / (22.1) Par.?

kriyatām arhaṇaṃ rājñāṃ yathārham iti bhārata // (22.2) Par.?

ācāryam ṛtvijaṃ caiva saṃyuktaṃ ca yudhiṣṭhira / (23.1) Par.?

snātakaṃ ca priyaṃ cāhuḥ ṣaḍ arghyārhānnṛpaṃ tathā // (23.2) Par.?

etān arhān abhigatān āhuḥ saṃvatsaroṣitān / (24.1) Par.?

ta ime kālapūgasya mahato 'smān upāgatāḥ // (24.2) Par.?

eṣām ekaikaśo rājann arghyam ānīyatām iti / (25.1) Par.?

atha caiṣāṃ variṣṭhāya samarthāyopanīyatām // (25.2) Par.?

yudhiṣṭhira uvāca / (26.1) Par.?

kasmai bhavānmanyate 'rgham ekasmai kurunandana / (26.2) Par.?

upanīyamānaṃ yuktaṃ ca tanme brūhi pitāmaha // (26.3) Par.?

vaiśaṃpāyana uvāca / (27.1) Par.?

tato bhīṣmaḥ śāṃtanavo buddhyā niścitya bhārata / (27.2) Par.?

vārṣṇeyaṃ manyate kṛṣṇam arhaṇīyatamaṃ bhuvi // (27.3) Par.?

eṣa hyeṣāṃ sametānāṃ tejobalaparākramaiḥ / (28.1) Par.?

madhye tapann ivābhāti jyotiṣām iva bhāskaraḥ // (28.2) Par.?

asūryam iva sūryeṇa nivātam iva vāyunā / (29.1) Par.?

bhāsitaṃ hlāditaṃ caiva kṛṣṇenedaṃ sado hi naḥ // (29.2) Par.?

tasmai bhīṣmābhyanujñātaḥ sahadevaḥ pratāpavān / (30.1) Par.?

upajahre 'tha vidhivad vārṣṇeyāyārghyam uttamam // (30.2) Par.?

pratijagrāha tat kṛṣṇaḥ śāstradṛṣṭena karmaṇā / (31.1) Par.?

śiśupālastu tāṃ pūjāṃ vāsudeve na cakṣame // (31.2) Par.?

sa upālabhya bhīṣmaṃ ca dharmarājaṃ ca saṃsadi / (32.1) Par.?

apākṣipad vāsudevaṃ cedirājo mahābalaḥ // (32.2) Par.?

Duration=0.21194696426392 secs.