Texts

yudhiṣṭhira uvāca / (1.1) Par.?

kimarthaṃ sahasā vindhyaḥ pravṛddhaḥ krodhamūrchitaḥ / (1.2) Par.?

etad icchāmyahaṃ śrotuṃ vistareṇa mahāmune // (1.3) Par.?

lomaśa uvāca / (2.1) Par.?

adrirājaṃ mahāśailaṃ maruṃ kanakaparvatam / (2.2) Par.?

udayāstamaye bhānuḥ pradakṣiṇam avartata // (2.3) Par.?

taṃ tu dṛṣṭvā tathā vindhyaḥ śailaḥ sūryam athābravīt / (3.1) Par.?

yathā hi merur bhavatā nityaśaḥ parigamyate / (3.2) Par.?

pradakṣiṇaṃ ca kriyate mām evaṃ kuru bhāskara // (3.3) Par.?

evam uktas tataḥ sūryaḥ śailendraṃ pratyabhāṣata / (4.1) Par.?

nāham ātmecchayā śaila karomyenaṃ pradakṣiṇam / (4.2) Par.?

eṣa mārgaḥ pradiṣṭo me yenedaṃ nirmitaṃ jagat // (4.3) Par.?

evam uktas tataḥ krodhāt pravṛddhaḥ sahasācalaḥ / (5.1) Par.?

sūryācandramasor mārgaṃ roddhum icchan paraṃtapa // (5.2) Par.?

tato devāḥ sahitāḥ sarva eva sendrāḥ samāgamya mahādrirājam / (6.1) Par.?

nivārayāmāsur upāyatas taṃ na ca sma teṣāṃ vacanaṃ cakāra // (6.2) Par.?

athābhijagmur munim āśramasthaṃ tapasvinaṃ dharmabhṛtāṃ variṣṭham / (7.1) Par.?

agastyam atyadbhutavīryadīptaṃ taṃ cārtham ūcuḥ sahitāḥ surās te // (7.2) Par.?

devā ūcuḥ / (8.1) Par.?

sūryācandramasor mārgaṃ nakṣatrāṇāṃ gatiṃ tathā / (8.2) Par.?

śailarājo vṛṇotyeṣa vindhyaḥ krodhavaśānugaḥ // (8.3) Par.?

taṃ nivārayituṃ śakto nānyaḥ kaścid dvijottama / (9.1) Par.?

ṛte tvāṃ hi mahābhāga tasmād enaṃ nivāraya // (9.2) Par.?

lomaśa uvāca / (10.1) Par.?

tacchrutvā vacanaṃ vipraḥ surāṇāṃ śailam abhyagāt / (10.2) Par.?

so 'bhigamyābravīd vindhyaṃ sadāraḥ samupasthitaḥ // (10.3) Par.?

mārgam icchāmyahaṃ dattaṃ bhavatā parvatottama / (11.1) Par.?

dakṣiṇām abhigantāsmi diśaṃ kāryeṇa kenacit // (11.2) Par.?

yāvadāgamanaṃ mahyaṃ tāvat tvaṃ pratipālaya / (12.1) Par.?

nivṛtte mayi śailendra tato vardhasva kāmataḥ // (12.2) Par.?

evaṃ sa samayaṃ kṛtvā vindhyenāmitrakarśana / (13.1) Par.?

adyāpi dakṣiṇād deśād vāruṇir na nivartate // (13.2) Par.?

etat te sarvam ākhyātaṃ yathā vindhyo na vardhate / (14.1) Par.?

agastyasya prabhāvena yan māṃ tvaṃ paripṛcchasi // (14.2) Par.?

kāleyās tu yathā rājan suraiḥ sarvair niṣūditāḥ / (15.1) Par.?

agastyād varam āsādya tan me nigadataḥ śṛṇu // (15.2) Par.?

tridaśānāṃ vacaḥ śrutvā maitrāvaruṇir abravīt / (16.1) Par.?

kimartham abhiyātāḥ stha varaṃ mattaḥ kim icchatha / (16.2) Par.?

evam uktās tatas tena devās taṃ munim abruvan // (16.3) Par.?

evaṃ tvayecchāma kṛtaṃ maharṣe mahārṇavaṃ pīyamānaṃ mahātman / (17.1) Par.?

tato vadhiṣyāma sahānubandhān kāleyasaṃjñān suravidviṣas tān // (17.2) Par.?

tridaśānāṃ vacaḥ śrutvā tatheti munir abravīt / (18.1) Par.?

kariṣye bhavatāṃ kāmaṃ lokānāṃ ca mahat sukham // (18.2) Par.?

evam uktvā tato 'gacchat samudraṃ saritāṃ patim / (19.1) Par.?

ṛṣibhiśca tapaḥsiddhaiḥ sārdhaṃ devaiś ca suvrataḥ // (19.2) Par.?

manuṣyoragagandharvayakṣakimpuruṣās tathā / (20.1) Par.?

anujagmur mahātmānaṃ draṣṭukāmās tad adbhutam // (20.2) Par.?

tato 'bhyagacchan sahitāḥ samudraṃ bhīmanisvanam / (21.1) Par.?

nṛtyantam iva cormībhir valgantam iva vāyunā // (21.2) Par.?

hasantam iva phenaughaiḥ skhalantaṃ kandareṣu ca / (22.1) Par.?

nānāgrāhasamākīrṇaṃ nānādvijagaṇāyutam // (22.2) Par.?

agastyasahitā devāḥ sagandharvamahoragāḥ / (23.1) Par.?

ṛṣayaś ca mahābhāgāḥ samāsedur mahodadhim // (23.2) Par.?