Texts

vaiśampāyana uvāca / (1.1) Par.?

gandharvais tu mahārāja bhagne karṇe mahārathe / (1.2) Par.?

samprādravaccamūḥ sarvā dhārtarāṣṭrasya paśyataḥ // (1.3) Par.?

tān dṛṣṭvā dravataḥ sarvān dhārtarāṣṭrān parāṅmukhān / (2.1) Par.?

duryodhano mahārāja nāsīt tatra parāṅmukhaḥ // (2.2) Par.?

tām āpatantīṃ samprekṣya gandharvāṇāṃ mahācamūm / (3.1) Par.?

mahatā śaravarṣeṇa so 'bhyavarṣad ariṃdamaḥ // (3.2) Par.?

acintya śaravarṣaṃ tu gandharvās tasya taṃ ratham / (4.1) Par.?

duryodhanaṃ jighāṃsantaḥ samantāt paryavārayan // (4.2) Par.?

yugam īṣāṃ varūthaṃ ca tathaiva dhvajasārathī / (5.1) Par.?

aśvāṃs triveṇuṃ talpaṃ ca tilaśo 'bhyahanan ratham // (5.2) Par.?

duryodhanaṃ citraseno virathaṃ patitaṃ bhuvi / (6.1) Par.?

abhidrutya mahābāhur jīvagrāham athāgrahīt // (6.2) Par.?

tasmin gṛhīte rājendra sthitaṃ duḥśāsanaṃ rathe / (7.1) Par.?

paryagṛhṇanta gandharvāḥ parivārya samantataḥ // (7.2) Par.?

viviṃśatiṃ citrasenam ādāyānye pradudruvuḥ / (8.1) Par.?

vindānuvindāvapare rājadārāṃś ca sarvaśaḥ // (8.2) Par.?

sainyās tu dhārtarāṣṭrasya gandharvaiḥ samabhidrutāḥ / (9.1) Par.?

pūrvaṃ prabhagnaiḥ sahitāḥ pāṇḍavān abhyayus tadā // (9.2) Par.?

śakaṭāpaṇaveśyāś ca yānayugyaṃ ca sarvaśaḥ / (10.1) Par.?

śaraṇaṃ pāṇḍavāñjagmur hriyamāṇe mahīpatau // (10.2) Par.?

priyadarśano mahābāhur dhārtarāṣṭro mahābalaḥ / (11.1) Par.?

gandharvair hriyate rājā pārthās tam anudhāvata // (11.2) Par.?

duḥśāsano durviṣaho durmukho durjayas tathā / (12.1) Par.?

baddhvā hriyante gandharvai rājadārāś ca sarvaśaḥ // (12.2) Par.?

iti duryodhanāmātyāḥ krośanto rājagṛddhinaḥ / (13.1) Par.?

ārtā dīnasvarāḥ sarve yudhiṣṭhiram upāgaman // (13.2) Par.?

tāṃs tathā vyathitān dīnān bhikṣamāṇān yudhiṣṭhiram / (14.1) Par.?

vṛddhān duryodhanāmātyān bhīmaseno 'bhyabhāṣata // (14.2) Par.?

anyathā vartamānānām artho jāto 'yam anyathā / (15.1) Par.?

asmābhir yad anuṣṭheyaṃ gandharvais tad anuṣṭhitam // (15.2) Par.?

durmantritam idaṃ tāta rājño durdyūtadevinaḥ / (16.1) Par.?

dveṣṭāram anye klībasya pātayantīti naḥ śrutam // (16.2) Par.?

tad idaṃ kṛtaṃ naḥ pratyakṣaṃ gandharvair atimānuṣam / (17.1) Par.?

diṣṭyā loke pumān asti kaścid asmatpriye sthitaḥ / (17.2) Par.?

yenāsmākaṃ hṛto bhāra āsīnānāṃ sukhāvahaḥ // (17.3) Par.?

śītavātātapasahāṃs tapasā caiva karśitān / (18.1) Par.?

samastho viṣamasthān hi draṣṭum icchati durmatiḥ // (18.2) Par.?

adharmacāriṇas tasya kauravyasya durātmanaḥ / (19.1) Par.?

ye śīlam anuvartante te paśyanti parābhavam // (19.2) Par.?

adharmo hi kṛtas tena yenaitad upaśikṣitam / (20.1) Par.?

anṛśaṃsās tu kaunteyās tasyādhyakṣān bravīmi vaḥ // (20.2) Par.?

evaṃ bruvāṇaṃ kaunteyaṃ bhīmasenam amarṣaṇam / (21.1) Par.?

na kālaḥ paruṣasyāyam iti rājābhyabhāṣata // (21.2) Par.?