Texts

yudhiṣṭhira uvāca / (1.1) Par.?

kathaṃ dharme sthātum icchannaro varteta bhārata / (1.2) Par.?

vidvañ jijñāsamānāya prabrūhi bharatarṣabha // (1.3) Par.?

satyaṃ caivānṛtaṃ cobhe lokān āvṛtya tiṣṭhataḥ / (2.1) Par.?

tayoḥ kim ācared rājan puruṣo dharmaniścitaḥ // (2.2) Par.?

kiṃ svit satyaṃ kim anṛtaṃ kiṃ svid dharmyaṃ sanātanam / (3.1) Par.?

kasmin kāle vadet satyaṃ kasmin kāle 'nṛtaṃ vadet // (3.2) Par.?

bhīṣma uvāca / (4.1) Par.?

satyasya vacanaṃ sādhu na satyād vidyate param / (4.2) Par.?

yad bhūloke sudurjñātaṃ tat te vakṣyāmi bhārata // (4.3) Par.?

bhavet satyaṃ na vaktavyaṃ vaktavyam anṛtaṃ bhavet / (5.1) Par.?

yatrānṛtaṃ bhavet satyaṃ satyaṃ vāpyanṛtaṃ bhavet // (5.2) Par.?

tādṛśe muhyate bālo yatra satyam aniṣṭhitam / (6.1) Par.?

satyānṛte viniścitya tato bhavati dharmavit // (6.2) Par.?

apyanāryo 'kṛtaprajñaḥ puruṣo 'pi sudāruṇaḥ / (7.1) Par.?

sumahat prāpnuyāt puṇyaṃ balāko 'ndhavadhād iva // (7.2) Par.?

kim āścaryaṃ ca yanmūḍho dharmakāmo 'pyadharmavit / (8.1) Par.?

sumahat prāpnuyāt pāpaṃ gaṅgāyām iva kauśikaḥ // (8.2) Par.?

tādṛśo 'yam anupraśno yatra dharmaḥ sudurvacaḥ / (9.1) Par.?

duṣkaraḥ pratisaṃkhyātuṃ tarkeṇātra vyavasyati // (9.2) Par.?

prabhāvārthāya bhūtānāṃ dharmapravacanaṃ kṛtam / (10.1) Par.?

yat syād ahiṃsāsaṃyuktaṃ sa dharma iti niścayaḥ // (10.2) Par.?

dhāraṇād dharma ityāhur dharmeṇa vidhṛtāḥ prajāḥ / (11.1) Par.?

yat syād dhāraṇasaṃyuktaṃ sa dharma iti niścayaḥ // (11.2) Par.?

śrutidharma iti hyeke netyāhur apare janāḥ / (12.1) Par.?

na tu tat pratyasūyāmo na hi sarvaṃ vidhīyate // (12.2) Par.?

ye 'nyāyena jihīrṣanto dhanam icchanti karhicit / (13.1) Par.?

tebhyastanna tad ākhyeyaṃ sa dharma iti niścayaḥ // (13.2) Par.?

akūjanena cenmokṣo nātra kūjet kathaṃcana / (14.1) Par.?

avaśyaṃ kūjitavyaṃ vā śaṅkeran vāpyakūjanāt // (14.2) Par.?

śreyastatrānṛtaṃ vaktuṃ satyād iti vicāritam / (15.1) Par.?

yaḥ pāpaiḥ saha saṃbandhānmucyate śapathād iti // (15.2) Par.?

na ca tebhyo dhanaṃ deyaṃ śakye sati kathaṃcana / (16.1) Par.?

pāpebhyo hi dhanaṃ dattaṃ dātāram api pīḍayet // (16.2) Par.?

svaśarīroparodhena varam ādātum icchataḥ / (17.1) Par.?

satyasaṃpratipattyarthaṃ ye brūyuḥ sākṣiṇaḥ kvacit / (17.2) Par.?

anuktvā tatra tad vācyaṃ sarve te 'nṛtavādinaḥ // (17.3) Par.?

prāṇātyaye vivāhe ca vaktavyam anṛtaṃ bhavet / (18.1) Par.?

arthasya rakṣaṇārthāya pareṣāṃ dharmakāraṇāt / (18.2) Par.?

pareṣāṃ dharmam ākāṅkṣannīcaḥ syād dharmabhikṣukaḥ // (18.3) Par.?

pratiśrutya tu dātavyaṃ śvaḥkāryastu balātkṛtaḥ / (19.1) Par.?

yaḥ kaścid dharmasamayāt pracyuto 'dharmam āsthitaḥ // (19.2) Par.?

śaṭhaḥ svadharmam utsṛjya tam icched upajīvitum / (20.1) Par.?

sarvopāyair nihantavyaḥ pāpo nikṛtijīvanaḥ // (20.2) Par.?

dhanam ityeva pāpānāṃ sarveṣām iha niścayaḥ / (21.1) Par.?

ye 'viṣahyā hyasaṃbhojyā nikṛtyā patanaṃ gatāḥ // (21.2) Par.?

cyutā devamanuṣyebhyo yathā pretāstathaiva te / (22.1) Par.?

dhanādānād duḥkhataraṃ jīvitād viprayojanam // (22.2) Par.?

ayaṃ vo rocatāṃ dharma iti vācyaḥ prayatnataḥ / (23.1) Par.?

na kaścid asti pāpānāṃ dharma ityeṣa niścayaḥ // (23.2) Par.?

tathāgataṃ ca yo hanyānnāsau pāpena lipyate / (24.1) Par.?

svakarmaṇā hataṃ hanti hata eva sa hanyate / (24.2) Par.?

teṣu yaḥ samayaṃ kaścit kurvīta hatabuddhiṣu // (24.3) Par.?

yathā kākaśca gṛdhraśca tathaivopadhijīvinaḥ / (25.1) Par.?

ūrdhvaṃ dehavimokṣānte bhavantyetāsu yoniṣu // (25.2) Par.?

yasmin yathā vartate yo manuṣyas tasmiṃstathā vartitavyaṃ sa dharmaḥ / (26.1) Par.?

māyācāro māyayā vartitavyaḥ sādhvācāraḥ sādhunā pratyudeyaḥ // (26.2) Par.?