Texts

vyāsa uvāca / (1.1) Par.?

eṣā pūrvatarā vṛttir brāhmaṇasya vidhīyate / (1.2) Par.?

jñānavān eva karmāṇi kurvan sarvatra sidhyati // (1.3) Par.?

tatra cenna bhaved evaṃ saṃśayaḥ karmaniścaye / (2.1) Par.?

kiṃ nu karma svabhāvo 'yaṃ jñānaṃ karmeti vā punaḥ // (2.2) Par.?

tatra ceha vivitsā syājjñānaṃ cet puruṣaṃ prati / (3.1) Par.?

upapattyupalabdhibhyāṃ varṇayiṣyāmi tacchṛṇu // (3.2) Par.?

pauruṣaṃ kāraṇaṃ kecid āhuḥ karmasu mānavāḥ / (4.1) Par.?

daivam eke praśaṃsanti svabhāvaṃ cāpare janāḥ // (4.2) Par.?

pauruṣaṃ karma daivaṃ ca phalavṛttisvabhāvataḥ / (5.1) Par.?

trayam etat pṛthagbhūtam avivekaṃ tu kecana // (5.2) Par.?

evam etanna cāpyevam ubhe cāpi na cāpyubhe / (6.1) Par.?

karmasthā viṣamaṃ brūyuḥ sattvasthāḥ samadarśinaḥ // (6.2) Par.?

tretāyāṃ dvāpare caiva kalijāśca sasaṃśayāḥ / (7.1) Par.?

tapasvinaḥ praśāntāśca sattvasthāśca kṛte yuge // (7.2) Par.?

apṛthagdarśinaḥ sarve ṛksāmasu yajuḥṣu ca / (8.1) Par.?

kāmadveṣau pṛthag dṛṣṭvā tapaḥ kṛta upāsate // (8.2) Par.?

tapodharmeṇa saṃyuktastaponityaḥ susaṃśitaḥ / (9.1) Par.?

tena sarvān avāpnoti kāmān yānmanasecchati // (9.2) Par.?

tapasā tad avāpnoti yad bhūtvā sṛjate jagat / (10.1) Par.?

tadbhūtaśca tataḥ sarvo bhūtānāṃ bhavati prabhuḥ // (10.2) Par.?

tad uktaṃ vedavādeṣu gahanaṃ vedadarśibhiḥ / (11.1) Par.?

vedānteṣu punar vyaktaṃ kramayogena lakṣyate // (11.2) Par.?

ārambhayajñāḥ kṣatrasya haviryajñā viśaḥ smṛtāḥ / (12.1) Par.?

paricārayajñāḥ śūdrāśca japayajñā dvijātayaḥ // (12.2) Par.?

pariniṣṭhitakāryo hi svādhyāyena dvijo bhavet / (13.1) Par.?

kuryād anyanna vā kuryānmaitro brāhmaṇa ucyate // (13.2) Par.?

tretādau sakalā vedā yajñā varṇāśramāstathā / (14.1) Par.?

saṃrodhād āyuṣastvete vyasyante dvāpare yuge // (14.2) Par.?

dvāpare viplavaṃ yānti vedāḥ kaliyuge tathā / (15.1) Par.?

dṛśyante nāpi dṛśyante kaler ante punaḥ punaḥ // (15.2) Par.?

utsīdanti svadharmāśca tatrādharmeṇa pīḍitāḥ / (16.1) Par.?

gavāṃ bhūmeśca ye cāpām oṣadhīnāṃ ca ye rasāḥ // (16.2) Par.?

adharmāntarhitā vedā vedadharmāstathāśramāḥ / (17.1) Par.?

vikriyante svadharmasthāḥ sthāvarāṇi carāṇi ca // (17.2) Par.?

yathā sarvāṇi bhūtāni vṛṣṭir bhaumāni varṣati / (18.1) Par.?

sṛjate sarvato 'ṅgāni tathā vedā yuge yuge // (18.2) Par.?

visṛtaṃ kālanānātvam anādinidhanaṃ ca yat / (19.1) Par.?

kīrtitaṃ tat purastānme yataḥ saṃyānti yānti ca // (19.2) Par.?

dhātedaṃ prabhavasthānaṃ bhūtānāṃ saṃyamo yamaḥ / (20.1) Par.?

svabhāvena pravartante dvaṃdvasṛṣṭāni bhūriśaḥ // (20.2) Par.?

sargaḥ kālo dhṛtir vedāḥ kartā kāryaṃ kriyā phalam / (21.1) Par.?

etat te kathitaṃ tāta yanmāṃ tvaṃ paripṛcchasi // (21.2) Par.?