Texts

vaiśaṃpāyana uvāca / (1.1) Par.?

tataste pāṇḍavā dūrād avatīrya padātayaḥ / (1.2) Par.?

abhijagmur narapater āśramaṃ vinayānatāḥ // (1.3) Par.?

sa ca paurajanaḥ sarvo ye ca rāṣṭranivāsinaḥ / (2.1) Par.?

striyaśca kurumukhyānāṃ padbhir evānvayustadā // (2.2) Par.?

āśramaṃ te tato jagmur dhṛtarāṣṭrasya pāṇḍavāḥ / (3.1) Par.?

śūnyaṃ mṛgagaṇākīrṇaṃ kadalīvanaśobhitam // (3.2) Par.?

tatastatra samājagmustāpasā vividhavratāḥ / (4.1) Par.?

pāṇḍavān āgatān draṣṭuṃ kautūhalasamanvitāḥ // (4.2) Par.?

tān apṛcchat tato rājā kvāsau kauravavaṃśabhṛt / (5.1) Par.?

pitā jyeṣṭho gato 'smākam iti bāṣpapariplutaḥ // (5.2) Par.?

tam ūcuste tato vākyaṃ yamunām avagāhitum / (6.1) Par.?

puṣpāṇām udakumbhasya cārthe gata iti prabho // (6.2) Par.?

tair ākhyātena mārgeṇa tataste prayayustadā / (7.1) Par.?

dadṛśuścāvidūre tān sarvān atha padātayaḥ // (7.2) Par.?

tataste satvarā jagmuḥ pitur darśanakāṅkṣiṇaḥ / (8.1) Par.?

sahadevastu vegena prādhāvad yena sā pṛthā // (8.2) Par.?

sasvanaṃ prarudan dhīmānmātuḥ pādāvupaspṛśan / (9.1) Par.?

sā ca bāṣpāvilamukhī pradadarśa priyaṃ sutam // (9.2) Par.?

bāhubhyāṃ sampariṣvajya samunnāmya ca putrakam / (10.1) Par.?

gāndhāryāḥ kathayāmāsa sahadevam upasthitam // (10.2) Par.?

anantaraṃ ca rājānaṃ bhīmasenam athārjunam / (11.1) Par.?

nakulaṃ ca pṛthā dṛṣṭvā tvaramāṇopacakrame // (11.2) Par.?

sā hyagre 'gacchata tayor daṃpatyor hataputrayoḥ / (12.1) Par.?

karṣantī tau tataste tāṃ dṛṣṭvā saṃnyapatan bhuvi // (12.2) Par.?

tān rājā svarayogena sparśena ca mahāmanāḥ / (13.1) Par.?

pratyabhijñāya medhāvī samāśvāsayata prabhuḥ // (13.2) Par.?

tataste bāṣpam utsṛjya gāndhārīsahitaṃ nṛpam / (14.1) Par.?

upatasthur mahātmāno mātaraṃ ca yathāvidhi // (14.2) Par.?

sarveṣāṃ toyakalaśāñjagṛhuste svayaṃ tadā / (15.1) Par.?

pāṇḍavā labdhasaṃjñāste mātrā cāśvāsitāḥ punaḥ // (15.2) Par.?

tato nāryo nṛsiṃhānāṃ sa ca yodhajanastadā / (16.1) Par.?

paurajānapadāścaiva dadṛśustaṃ narādhipam // (16.2) Par.?

nivedayāmāsa tadā janaṃ taṃ nāmagotrataḥ / (17.1) Par.?

yudhiṣṭhiro narapatiḥ sa cainān pratyapūjayat // (17.2) Par.?

sa taiḥ parivṛto mene harṣabāṣpāvilekṣaṇaḥ / (18.1) Par.?

rājātmānaṃ gṛhagataṃ pureva gajasāhvaye // (18.2) Par.?

abhivādito vadhūbhiśca kṛṣṇādyābhiḥ sa pārthivaḥ / (19.1) Par.?

gāndhāryā sahito dhīmān kuntyā ca pratyanandata // (19.2) Par.?

tataścāśramam āgacchat siddhacāraṇasevitam / (20.1) Par.?

didṛkṣubhiḥ samākīrṇaṃ nabhastārāgaṇair iva // (20.2) Par.?