Texts

he bhasmāṅgaviraktirūpaguṇadaṃ taṃ preraṇādaṃ śivaṃ gaṅgābhūṣitaśekharaṃ smaraharaṃ śaktisvarūpaṃ prabho / (1.1) Par.?

tvāmīśaṃ karuṇārṇavaṃ śaraṇadaṃ vidyānidhiṃ nirguṇaṃ bhūteśaṃ girijāpatiṃ śaśidharaṃ māṅgalyadevaṃ namaḥ / (1.2) Par.?

namāmi devaṃ suravṛndapūjitaṃ gaṇādhipaṃ vighnavināśakārakam / (1.3) Par.?

smaranti ye nityam udāracetasaḥ kaṣṭāni te nānubhavanti satyam / (1.4) Par.?

siddhinandanamiśreṇa śuddhāṃ ca sāragarbhitām / (1.5) Par.?

rasendracintāmaṇeśca ṭīkāṃ kurve śivājñayā / (1.6) Par.?

idānīṃ kālanāthaśiṣyaḥ śrīḍhuṇḍhukanāthāhvayo rasendracintāmaṇigrantham ārabhamāṇas tanmūladevate śrīmadambikāmaheśvarau sakalajagadutpattisthitipralayanidānaṃ viśeṣasiddhāntagarbhavācā varīvasyati // (1.7) Par.?

arthaprakāśakāsāravimarśāmbujinīmayam / (2.1) Par.?

saccidānandavibhavaṃ śivayorvapurāśraye // (2.2) Par.?

laghīyaḥ parimāṇatayā nikhilarasajñānadāyitvāccintāmaṇiriva cintāmaṇiḥ // (3) Par.?

aśrauṣaṃ bahuviduṣāṃ mukhād apaśyaṃ śāstreṣu sthitam akṛtaṃ na tallikhāmi / (4.1) Par.?

yatkarma vyaracayamagrato gurūṇāṃ prauḍhānāṃ tadiha vadāmi vītaśaṅkaḥ // (4.2) Par.?

adhyāpayanti yad darśayituṃ kṣamante sūtendrakarma guravo guravasta eva / (5.1) Par.?

śiṣyāsta eva racayanti guroḥpuro ye śeṣāḥ punastadubhayābhinayaṃ bhajante // (5.2) Par.?

saṃskārāḥ paratantreṣu ye gūḍhāḥ siddhisūcitāḥ / (6.1) Par.?

tāneva prakaṭīkartum udyamaṃ kila kurmahe // (6.2) Par.?

granthād asmādāharanti prayogān svīyaṃ vāsminnāma ye nikṣipanti / (7.1) Par.?

gotrāṇyeṣām asmadīyaśramoṣmā bhasmīkurvannāyugaṃ bobhavītu // (7.2) Par.?

saṃskārāḥ śivajanuṣo bahuprakārās tulyā ye laghubahulaprayāsaṃsādhyāḥ / (8.1) Par.?

yadyekaṃ sukaram udāharāmi teṣāṃ vyāhāraiḥ kimihaphalaṃ tataḥ pareṣām // (8.2) Par.?

iha khalu puruṣeṇa duḥkhasya nirupādhidveṣaviṣayatvāt tadabhāvaścikīrṣitavyo bhavati sukhamapi nirupādhipremāspadatayā gaveṣaṇīyam tadetatpuruṣārthadvayam / (9.1) Par.?

abhāvasyānyatvāt // (9.2) Par.?

kiṃca srakcandanavanitādiviṣayāṇāṃ satyapi tatkāraṇatve nāntarīyakaduḥkhasambhedād anarthaparamparāparicitatvān mūrkhāṇāṃ kośāṇḍakavad ābhāsamānatvād anaikāntikatvād virodhināṃ yugapadadṛśyamānatvād atyantatāvirahitatvācca pariharaṇīyatvam // (10) Par.?

ekāntātyantataśca punaste hyupāyāḥ khalu hariharabrahmāṇa iva tulyā eva sambhavanti / (11.1) Par.?

jñānayogaḥ pavanayogo rasayogaśceti // (11.2) Par.?

nanu kathameṣāṃ tulyatetyapekṣāyāṃ brūmaḥ mokṣopāye bṛhadvāsiṣṭhādau bhuśuṇḍopākhyāne vasiṣṭhavākyam / (12.1) Par.?

asādhyaḥ kasyacidyogaḥ kasyacijjñānaniścayaḥ / (12.2) Par.?

dvau prakārau tato devo jagāda paramaḥ śivaḥ / (12.3) Par.?

prāṇānāṃ vā nirodhena vāsanānodanena vā / (12.4) Par.?

no cetsaṃvidam ucchāṇāṃ karoṣi tadayogavān / (12.5) Par.?

dvāveva hi samau rāma jñānayogāvimau smṛtau // (12.6) Par.?

tatrādyayoḥ kevalaṃ pakvakaṣāyāṇāmapi kathañcana sādhyatvāccarame tu punarbhogalolupānām apyadhikāritvāttābhyāṃ samīcīno'yamiti kasya na pratibhāti // (13) Par.?

kiṃca asya bhagavanniryāsatayā sevakānāṃ svasambhūtasakaladhātutvāpādakasya bhagavato rasarājasya guṇasindhoḥ kiyantaḥ pṛṣatāḥ prasaṅgāllikhyante // (14) Par.?

acirājjāyate devi śarīramajarāmaram / (15.1) Par.?

manasaśca samādhānaṃ rasayogādavāpyate // (15.2) Par.?

sattvaṃ ca labhate devi vijñānaṃ jñānapūrvakam / (16.1) Par.?

satyaṃ mantrāśca sidhyanti yo'śnāti mṛtasūtakam // (16.2) Par.?

yāvanna śaktipātastu na yāvatpāśakṛntanam / (17.1) Par.?

tāvattasya kutaḥ śuddhirjāyate mṛtasūtake // (17.2) Par.?

yāvanna harabījaṃ tu bhakṣayetpāradaṃ rasam / (18.1) Par.?

tāvattasya kuto muktiḥ kutaḥ piṇḍasya dhāraṇam // (18.2) Par.?

svadehe khecaratvaṃ vai śivatvaṃ yena labhyate / (19.1) Par.?

tādṛśe tu rasajñāne nityābhyāsaṃ kuru priye // (19.2) Par.?

tvaṃ mātā sarvabhūtānāṃ pitā cāhaṃ sanātanaḥ / (20.1) Par.?

dvayośca yo raso devi mahāmaithunasambhavaḥ // (20.2) Par.?

darśanāt sparśanāt tasya bhakṣaṇāt maraṇātpriye / (21.1) Par.?

pūjanādrasadānācca dṛśyate ṣaḍvidhaṃ phalam // (21.2) Par.?

kedārādīni liṅgāni pṛthivyāṃ yāni kānicit / (22.1) Par.?

tāni dṛṣṭvā ca yatpuṇyaṃ tatpuṇyaṃ rasadarśanāt // (22.2) Par.?

candanāgurukarpūrakuṅkumāntargato rasaḥ / (23.1) Par.?

mūrchitaḥ śivapūjā sā śivasāṃnidhyasiddhaye // (23.2) Par.?

bhakṣaṇātparameśāni hanti tāpatrayaṃ rasaḥ / (24.1) Par.?

durlabhaṃ brahmaviṣṇvādyaiḥ prāpyate paramaṃ padam // (24.2) Par.?

hṛtpadmakarṇikāntaḥsthaṃ rasendraṃ parameśvari / (25.1) Par.?

smaranvimucyate pāpaiḥ sadyo janmāntarārjitaiḥ // (25.2) Par.?

svayambhūliṅgasāhasrairyatphalaṃ samyagarcanāt / (26.1) Par.?

tatphalaṃ koṭiguṇitaṃ rasaliṅgārcanādbhavet // (26.2) Par.?

rogibhyo yo rasaṃ datte śuddhipākasamanvitam / (27.1) Par.?

tulādānāśvamedhānāṃ phalaṃ prāpnoti śāśvatam // (27.2) Par.?

rasavidyā parā vidyā trailokye'pi ca durlabhā / (28.1) Par.?

bhuktimuktikarī yasmāttasmājjñeyā guṇānvitā // (28.2) Par.?

brahmajñānena so'yukto yaḥ pāpī rasanindakaḥ / (29.1) Par.?

nāhaṃ trātā bhave tasya janmakoṭiśatairapi // (29.2) Par.?

ālāpaṃ gātrasaṃsparśaṃ yaḥ kuryādrasanindakaiḥ / (30.1) Par.?

yāvajjanmasahasrāṇi sa bhavetpāpapīḍitaḥ // (30.2) Par.?

hemajīrṇo bhasmasūto rudratvaṃ bhakṣito diśet / (31.1) Par.?

viṣṇutvaṃ tārajīrṇastu brahmatvaṃ bhāskareṇa tu // (31.2) Par.?

tīkṣṇajīrṇo dhaneśatvaṃ sūryatvaṃ cāpi tālake / (32.1) Par.?

rājare tu śaśāṅkatvamamaratvaṃ ca rohaṇe // (32.2) Par.?

sāmānyena tu tīkṣṇena naraḥ śakratvamāpnuyāt // (33.1) Par.?

doṣahīno raso brahmā mūrchitastu janārdanaḥ / (34.1) Par.?

mārito rudrarūpī syād baddhaḥ sākṣāt sadāśivaḥ // (34.2) Par.?

īdṛśasya guṇānāṃ paryavasānamambujasambhavo'pi mahākalpairapi vacobhirnāsādayitumalamityalaṃ bahunā // (35) Par.?

yadyanmayākriyata kārayituṃ ca śakyaṃ sūtendrakarma tadiha prathayāṃbabhūve / (36.1) Par.?

adhyāpayanti ya idaṃ natu kārayanti kurvanti nedamadhiyantyubhaye mṛṣārthāḥ // (36.2) Par.?