Texts

ṛṣaya ūcuḥ / (1.1) Par.?

abhyaṣiñcatkathaṃ brahmā cādhipatye prajāpatiḥ / (1.2) Par.?

devadaityamukhān sarvān sarvātmā vada sāṃpratam // (1.3) Par.?

sūta uvāca / (2.1) Par.?

grahādhipatye bhagavānabhyaṣiñcaddivākaram / (2.2) Par.?

ṛkṣāṇāmoṣadhīnāṃ ca somaṃ brahmā prajāpatiḥ // (2.3) Par.?

apāṃ ca varuṇaṃ devaṃ dhanānāṃ yakṣapuṅgavam / (3.1) Par.?

ādityānāṃ tathā viṣṇuṃ vasūnāṃ pāvakaṃ tathā // (3.2) Par.?

prajāpatīnāṃ dakṣaṃ ca marutāṃ śakrameva ca / (4.1) Par.?

daityānāṃ dānavānāṃ ca prahlādaṃ daityapuṅgavam // (4.2) Par.?

dharmaṃ pitṝṇām adhipaṃ nirṛtiṃ piśitāśinām / (5.1) Par.?

rudraṃ paśūnāṃ bhūtānāṃ nandinaṃ gaṇanāyakam // (5.2) Par.?

vīrāṇāṃ vīrabhadraṃ ca piśācānāṃ bhayaṃkaram / (6.1) Par.?

mātṝṇāṃ caiva cāmuṇḍāṃ sarvadevanamaskṛtām // (6.2) Par.?

rudrāṇāṃ devadeveśaṃ nīlalohitamīśvaram / (7.1) Par.?

vighnānāṃ vyomajaṃ devaṃ gajāsyaṃ tu vināyakam // (7.2) Par.?

strīṇāṃ devīmumāṃ devīṃ vacasāṃ ca sarasvatīm / (8.1) Par.?

viṣṇuṃ māyāvināṃ caiva svātmānaṃ jagatāṃ tathā // (8.2) Par.?

himavantaṃ girīṇāṃ tu nadīnāṃ caiva jāhnavīm / (9.1) Par.?

samudrāṇāṃ ca sarveṣāmadhipaṃ payasāṃ nidhim // (9.2) Par.?

vṛkṣāṇāṃ caiva cāśvatthaṃ plakṣaṃ ca prapitāmahaḥ // (10.1) Par.?

gandharvavidyādharakinnarāṇām īśaṃ punaś citrarathaṃ cakāra / (11.1) Par.?

nāgādhipaṃ vāsukimugravīryaṃ sarpādhipaṃ takṣakamugravīryam // (11.2) Par.?

digvāraṇānāmadhipaṃ cakāra gajendram airāvatam ugravīryam / (12.1) Par.?

suparṇamīśaṃ patatāmathāśvarājānamuccaiḥśravasaṃ cakāra // (12.2) Par.?

siṃhaṃ mṛgāṇāṃ vṛṣabhaṃ gavāṃ ca mṛgādhipānāṃ śarabhaṃ cakāra / (13.1) Par.?

senādhipānāṃ guhamaprameyaṃ śrutismṛtīnāṃ lakulīśamīśam // (13.2) Par.?

abhyaṣiñcatsudharmāṇaṃ tathā śaṅkhapadaṃ diśām / (14.1) Par.?

ketumantaṃ krameṇaiva hemaromāṇameva ca // (14.2) Par.?

pṛthivyāṃ pṛthumīśānaṃ sarveṣāṃ tu maheśvaram / (15.1) Par.?

caturmūrtiṣu sarvajñaṃ śaṅkaraṃ vṛṣabhadhvajam // (15.2) Par.?

prasādādbhagavāñchambhoścābhyaṣiñcadyathākramam / (16.1) Par.?

purābhiṣicya puṇyātmā rarāja bhuvaneśvaraḥ // (16.2) Par.?

etadvo vistareṇaiva kathitaṃ munipuṅgavāḥ / (17.1) Par.?

abhiṣiktāstatastvete viśiṣṭā viśvayoninā // (17.2) Par.?

iti śrīliṅgamahāpurāṇe sūryādyabhiṣekakathanaṃ nāmāṣṭapañcāśattamo 'dhyāyaḥ // (18.1) Par.?