Texts

śrīmārkaṇḍeya uvāca / (1.1) Par.?

gīrvāṇāśca tataḥ sarve brahmāṇaṃ śaraṇaṃ gatāḥ / (1.2) Par.?

gajair girivarākārair hayaiścaiva gajopamaiḥ // (1.3) Par.?

syandanairnagarākāraiḥ siṃhaśārdūlayojitaiḥ / (2.1) Par.?

kacchapair mahiṣaiścānyair makaraiśca tathāpare // (2.2) Par.?

brahmalokamanuprāptā devāḥ śakrapurogamāḥ / (3.1) Par.?

dṛṣṭvā padmodbhavaṃ devaṃ sāṣṭāṅgaṃ praṇatāḥ surāḥ // (3.2) Par.?

devā ūcuḥ / (4.1) Par.?

jaya deva jagadvandya jaya saṃsṛtikāraka / (4.2) Par.?

padmayone suraśreṣṭha tvāmeva śaraṇaṃ gatāḥ // (4.3) Par.?

sodvegaṃ bhāṣitaṃ śrutvā devānāṃ bhāvitātmanām / (5.1) Par.?

meghagambhīrayā vācā devarājamuvāca ha // (5.2) Par.?

kimatrāgamanaṃ devāḥ sarveṣāṃ vai vivarṇatā / (6.1) Par.?

kenāpamānitāḥ sarve śīghraṃ me kathyatāṃ svayam // (6.2) Par.?

devā ūcuḥ / (7.1) Par.?

andhakākhyo mahādaityo balavān padmasambhava / (7.2) Par.?

tena devagaṇāḥ sarve dhanaratnair viyojitāḥ // (7.3) Par.?

hatvā devagaṇāṃs tāvad asicakraparaddviśvadhaiḥ / (8.1) Par.?

gṛhītvā śakrabhāryāṃ sa dānavo 'pi gato balāt // (8.2) Par.?

devānāṃ vacanaṃ śrutvā brahmā lokapitāmahaḥ / (9.1) Par.?

cintayāmāsa rājendra vadhārthaṃ dānavasya ha // (9.2) Par.?

avadhyo dānavaḥ pāpaḥ sarveṣāṃ vo divaukasām / (10.1) Par.?

sa trātā sarvajagatāṃ nānyo vidyeta kutracit // (10.2) Par.?

evamuktāḥ surāḥ sarve brahmaṇā tadanantaram / (11.1) Par.?

brahmāṇaṃ te puraskṛtya gatā yatra sa keśavaḥ / (11.2) Par.?

tuṣṭuvurvividhaiḥ stotrair brahmādyāś cakrapāṇinam // (11.3) Par.?

devā ūcuḥ / (12.1) Par.?

jaya tvaṃ devadeveśa lakṣmyā vakṣaḥsthalāśritaḥ / (12.2) Par.?

asurakṣaya deveśa vayaṃ te śaraṇaṃ gatāḥ // (12.3) Par.?

stūyamānaḥ suraiḥ sarvairbrahmādyaiśca janārdanaḥ / (13.1) Par.?

samprahṛṣṭamanā bhūtvā surasaṅghamuvāca ha // (13.2) Par.?

śrīvāsudeva uvāca / (14.1) Par.?

svāgataṃ devaviprāṇāṃ suprabhātādya śarvarī / (14.2) Par.?

kiṃ kāryaṃ procyatāṃ kṣipraṃ kasya ruṣṭā divaukasaḥ // (14.3) Par.?

kiṃ duḥkhaṃ kaśca saṃtāpaḥ kuto vā bhayam āgatam / (15.1) Par.?

kathayantu mahābhāgāḥ kāraṇaṃ yanmanogatam // (15.2) Par.?

parābhavaḥ kṛto yena so 'dya yātu yamālayam / (16.1) Par.?

evamuktāstu kṛṣṇena kathayāmāsurasya tat // (16.2) Par.?

darśayantaḥ svakāndehān lajjamānā hyadhomukhāḥ / (17.1) Par.?

hṛtarājyā hyandhakena kṛtā nistejasaḥ prabho // (17.2) Par.?

piteva putraṃ parirakṣa deva jahīndraśatruṃ saha putrapautraiḥ / (18.1) Par.?

tatheti coktaḥ kamalāsanena surāsurair vanditapādapadmaḥ // (18.2) Par.?

śaṅkhaṃ cakraṃ gadāṃ cāpaṃ saṃgṛhya parameśvaraḥ / (19.1) Par.?

utthito bhogaparyaṅkād devānāṃ puratastadā // (19.2) Par.?

śrīvāsudeva uvāca / (20.1) Par.?

pātāle yadi vā martye nāke vā yadi tiṣṭhati / (20.2) Par.?

taṃ haniṣyāmyahaṃ pāpaṃ yena saṃtāpitāḥ surāḥ // (20.3) Par.?

svaṃ sthānaṃ yāntu gīrvāṇāḥ saṃtuṣṭā bhāvitaujasaḥ / (21.1) Par.?

viṣṇostadvacanaṃ śrutvā brahmādyāste savāsavāḥ // (21.2) Par.?

svayānaistu hariṃ natvā hṛdi tuṣṭā divaṃ yayuḥ // (22.1) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe gīrvāṇasvargamanavarṇanaṃ nāma saptacatvāriṃśo 'dhyāyaḥ // (23.1) Par.?