Texts

śrīmārkaṇḍeya uvāca / (1.1) Par.?

tasyaivānantaraṃ tīrthaṃ liṅgeśvaramiti śrutam / (1.2) Par.?

darśanād devadevasya yatra pāpaṃ praṇaśyati // (1.3) Par.?

kṛtvā tu kadanaṃ ghoraṃ dānavānāṃ yudhiṣṭhira / (2.1) Par.?

vārāhaṃ rūpamāsthāya narmadāyāṃ vyavasthitaḥ // (2.2) Par.?

tatra tīrthe tu yaḥ snānaṃ kṛtvā devaṃ namasyati / (3.1) Par.?

sa mucyate nṛpaśreṣṭha mahāpāpaiḥ purākṛtaiḥ // (3.2) Par.?

dvādaśyāṃ kṛṣṇapakṣasya śukle ca samupoṣitaḥ / (4.1) Par.?

gandhamālyairjagannāthaṃ pūjayet pāṇḍunandana // (4.2) Par.?

brāhmaṇāṃśca mahābhāga dānasaṃmānabhojanaiḥ / (5.1) Par.?

pūjayetparayā bhaktyā tasya puṇyaphalaṃ śṛṇu // (5.2) Par.?

satrayājiphalaṃ jantur labhate dvādaśābdakaiḥ / (6.1) Par.?

brāhmaṇānbhojayaṃstatra tadeva labhate phalam // (6.2) Par.?

tarpayitvā pitṝn devān snātvā tadgatamānasaḥ / (7.1) Par.?

japed dvādaśanāmāni devasya purataḥ sthitaḥ // (7.2) Par.?

māsi māsi nirāhāro dvādaśyāṃ kurunandana / (8.1) Par.?

keśavaṃ pūjayen nityaṃ māsi mārgaśire budhaḥ // (8.2) Par.?

pauṣe nārāyaṇaṃ devaṃ māghamāse tu mādhavam / (9.1) Par.?

govindaṃ phālgune māsi viṣṇuṃ caitre samarcayet // (9.2) Par.?

vaiśākhe madhuhantāraṃ jyeṣṭhe devaṃ trivikramam / (10.1) Par.?

vāmanaṃ tu tathāṣāḍhe śrāvaṇe śrīdharaṃ smaret // (10.2) Par.?

hṛṣīkeśaṃ bhādrapade padmanābhaṃ tathāśvine / (11.1) Par.?

dāmodaraṃ kārttike tu kīrtayan nāvasīdati // (11.2) Par.?

vācikaṃ mānasaṃ pāpaṃ karmajaṃ yatpurā kṛtam / (12.1) Par.?

tannaśyati na sandeho māsanāmānukīrtanāt // (12.2) Par.?

svayaṃ vinuddhaḥ satatamunmiṣannimiṣaṃstathā / (13.1) Par.?

śīghraṃ prapaśya bhuñjāno mantrahīnaṃ samudgiret // (13.2) Par.?

paramāpadgatasyāpi jantoreṣā pratikriyā / (14.1) Par.?

yanmāsādhipater viṣṇor māsanāmānukīrtanam // (14.2) Par.?

tā niśāste ca divasāste māsāste ca vatsarāḥ / (15.1) Par.?

narāṇāṃ saphalā yeṣu cintito bhagavānhariḥ // (15.2) Par.?

paramāpadgatasyāpi yasya devo janārdanaḥ / (16.1) Par.?

nāvasarpati hṛtpadmātsa yogī nātra saṃśayaḥ // (16.2) Par.?

te bhāgyahīnā manujāḥ suśocyāste bhūmibhārāya kṛtāvatārāḥ / (17.1) Par.?

acetanāste paśubhiḥ samānā ye bhaktihīnā bhagavatyanante // (17.2) Par.?

te pūrṇakāryāḥ puruṣāḥ pṛthivyāṃ te svāṅgapātādbhuvanaṃ punanti / (18.1) Par.?

vicakṣaṇā viśvavibhūṣaṇāste ye bhaktiyuktā bhagavatyanante // (18.2) Par.?

sa eva sukṛtī tena labdhaṃ janmataroḥ phalam / (19.1) Par.?

citte vacasi kāye ca yasya devo janārdanaḥ // (19.2) Par.?

etattīrthavaraṃ puṇyaṃ liṅgo yatra janārdanaḥ / (20.1) Par.?

vañcayitvā ripūnsaṃkhye krodho bhūtvā sanātanaḥ // (20.2) Par.?

upaplave candramaso raveśca yo hyaṣṭakānāmayanadvaye ca / (21.1) Par.?

pānīyamapyatra tilairvimiśraṃ dadyāt pitṛbhyaḥ prayato manuṣyaḥ // (21.2) Par.?

ghoṇonmīlitamerurandhranivaho duḥkhābdhimajjatplavaḥ prādurbhūtarasātalodarabṛhatpaṅkārdhamagnakṣuraḥ / (22.1) Par.?

phūtkārotkaranunnavātavidaladdigdantinādaśrutinyastastabdhavapuḥ śrutirbhavatu vaḥ kroḍo hariḥ śāntaye // (22.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe liṅgavārāhatīrthamāhātmyavarṇanaṃ nāmaikonapañcāśadadhikaśatatamo 'dhyāyaḥ // (23.1) Par.?