Texts

sat kāryaṃ kāraṇavyāpārāt prāg iti śeṣaḥ / (1.1) Par.?

tathā ca na siddhasādhanaṃ naiyāyikatanayair udbhāvanīyam / (1.2) Par.?

yadyapi ca bījamṛtpiṇḍādipradhvaṃsānantaram aṅkuraghaṭādyutpattir upalabhyate tathāpi na pradhvaṃsasya kāraṇatvam api tu bhāvasyaiva bījādyavayavasya / (1.3) Par.?

abhāvāt tu bhāvasyotpattau tasya sarvatra sulabhatvāt sarvatra kāryotpādaprasaṅga iti nyāyavārttikatātparyaṭīkāyām upapāditam asmābhiḥ / (1.4) Par.?

prapañcapratyaya evāsati bādhake na śakyo mithyeti vaditum iti kaṇabhakṣākṣacaraṇamatam avaśiṣyate / (1.5) Par.?

tatredaṃ pratijñātaṃ sat kāryam iti / (1.6) Par.?

atra hetum āha asadakaraṇāt / (1.7) Par.?

asaccet kāraṇavyāpārāt pūrvaṃ kāryaṃ nāsya sattvaṃ kartuṃ śakyam / (1.8) Par.?

na hi nīlaṃ śilpisahasreṇāpi pītaṃ kartuṃ śakyate / (1.9) Par.?

sadasattve ghaṭasya dharmāviti cet tathāpyasati dharmiṇi na tasya dharma iti sattvaṃ tadavastham eva tathā ca nāsattvam / (1.10) Par.?

asaṃbaddhenātadātmanāsattvena katham asan ghaṭaḥ / (1.11) Par.?

tasmāt kāraṇavyāpārād ūrdhvam iva prāg api sad eva kāryam iti / (1.12) Par.?

karaṇaṃ cāsya sato 'bhivyaktir avaśiṣyate / (1.13) Par.?

sataścābhivyaktir upapannā yathā pīḍanena tileṣu tailasya avaghātena dhānyeṣu taṇḍulānāṃ dohanena saurabheyīṣu payasaḥ / (1.14) Par.?

asataḥ karaṇe tu na nidarśanaṃ kiṃcid asti no khalvabhivyajyamānam utpadyamānaṃ vā kvacid asad dṛṣṭam / (1.15) Par.?

itaśca kāraṇavyāpārāt prāk sad eva kāryam ityāha upādānagrahaṇāt / (1.16) Par.?

upādānāni kāraṇāni teṣāṃ grahaṇaṃ kāryeṇa upādānaiḥ kāryasya saṃbandhād iti yāvat / (1.17) Par.?

etad uktaṃ bhavati kāryeṇa sambaddhaṃ kāraṇaṃ kāryajanakam / (1.18) Par.?

saṃbandhaśca kāryasyāsato na bhavati / (1.19) Par.?

tasmāt sad iti / (1.20) Par.?

syād etat / (1.21) Par.?

asaṃbaddham eva kasmāt kāraṇaiḥ kāryaṃ na janyate / (1.22) Par.?

tathā cāsad evotpatsyata iti / (1.23) Par.?

ata āha sarvasaṃbhavābhāvāt / (1.24) Par.?

asaṃbaddhasya janyatve 'saṃbaddhatvāviśeṣeṇa sarvaṃ kāryajātaṃ sarvasmāt sambhavet / (1.25) Par.?

na caitad asti / (1.26) Par.?

tasmāt sambaddhaṃ sambaddhena janyate yathāhuḥ sāṃkhyavṛddhāḥ / (1.27) Par.?

asattve nāsti saṃbandhaḥ kāraṇaiḥ sattvasaṅgibhiḥ / (1.28) Par.?

asaṃbaddhasya cotpattim icchato na vyavasthitiḥ // (1.29) Par.?

iti / (2.1) Par.?

syād etat / (2.2) Par.?

asaṃbaddham api tad eva karoti yatra yat kāraṇaṃ śaktam / (2.3) Par.?

śaktiśca kāryadarśanād avagamyate / (2.4) Par.?

tena nāvyavastheti / (2.5) Par.?

ata āha śaktasya śakyakaraṇāt / (2.6) Par.?

sā śaktiḥ śaktakāraṇāśrayā sarvatra vā syācchakye vā / (2.7) Par.?

sarvatra cet tadavasthaivāvyavasthā / (2.8) Par.?

śakye cet katham asati śakye tatreti vaktavyam / (2.9) Par.?

śaktibheda eva tādṛśo yataḥ kiṃcid eva kāryaṃ na sarvam iti cet / (2.10) Par.?

hanta bhoḥ śaktiviśeṣaḥ kāryasambaddho 'saṃbaddho vā / (2.11) Par.?

sambaddhatve nāsatā saṃbandha iti sat kāryam / (2.12) Par.?

asaṃbaddhatve saivāvyavastheti suṣṭhūktaṃ śaktasya śakyakaraṇād iti / (2.13) Par.?

itaśca sat kāryam ityāha kāraṇabhāvācca kāryasya kāraṇātmakatvāt / (2.14) Par.?

na hi kāraṇād bhinnaṃ kāryaṃ kāraṇaṃ ca sad iti kathaṃ tadabhinnaṃ kāryam asad bhavet / (2.15) Par.?

kāryasya kāraṇābhedasādhakāni ca pramāṇāni paṭas tantubhyo 'bhidyate / (2.16) Par.?

taddharmatvāt / (2.17) Par.?

iha yad yato bhidyate tat tasya dharmo 'bhavati yathā gaur aśvasya / (2.18) Par.?

dharmaś ca paṭas tantūnām / (2.19) Par.?

tasmān nārthāntaram / (2.20) Par.?

upādānopādeyabhāvācca nārthāntaratvaṃ tantupaṭayoḥ / (2.21) Par.?

yayor arthāntaratvaṃ na tayor upādānopādeyabhāvo yathā ghaṭapaṭayoḥ / (2.22) Par.?

upādānopādeyabhāvaśca tantupaṭayoḥ / (2.23) Par.?

tasmānnārthāntaratvam iti / (2.24) Par.?

itaśca nārthāntaratvaṃ tantupaṭayoḥ / (2.25) Par.?

saṃyogāprāptyabhāvāt / (2.26) Par.?

arthāntaratve hi saṃyogo dṛṣṭo yathā kuṇḍabadarayoḥ / (2.27) Par.?

aprāptir vā yathā himavadvindhyayoḥ / (2.28) Par.?

na ceha saṃyogāprāptī / (2.29) Par.?

tasmānnārthāntaratvam iti / (2.30) Par.?

itaśca tantubhyaḥ paṭo 'bhidyate / (2.31) Par.?

gurutvāntarakāryāgrahaṇāt / (2.32) Par.?

iha yad yasmād bhinnaṃ tasya gurutvāntaraṃ kāryaṃ gṛhyate yathā palikasya rucakasya gurutvakāryo yo 'vanativiśeṣastato dvipalikasya svastikasya gurutvakāryo 'vanatibhedo 'dhikaḥ / (2.33) Par.?

na ca tathā tantugurutvakāryāt paṭagurutvasya kāryāntaraṃ dṛśyate / (2.34) Par.?

tasmād abhinnaḥ paṭa iti / (2.35) Par.?

tānyetānyavītānyabhedasādhakāni / (2.36) Par.?

tad evam abhede siddhe tantava eva tena tena saṃsthānaviśeṣeṇa pariṇatāḥ paṭo na tantubhyo 'rthāntaram / (2.37) Par.?

svātmani kriyāvirodhasaṃbandhabuddhivyapadeśārthakriyābhedāśca naikāntikaṃ bhedaṃ sādhayitum arhanti / (2.38) Par.?

ekasminn api tattadviśeṣāvirbhāvatirobhāvābhyām eteṣām avirodhāt / (2.39) Par.?

yathā kūrmasyāṅgāni kūrmaśarīre niviśamānāni tirobhavanti niḥsaranti cāvirbhavanti na ca kūrmatas tadaṅgānyutpadyante dhvaṃsante vā evam ekasyā mṛdaḥ suvarṇasya vā kuṭakaṭakādayo niḥsaranta āvirbhavanta utpadyanta ityucyate niviśamānās tirobhavanto naśyantītyucyate / (2.40) Par.?

na punar asatām utpādaḥ satāṃ vā nirodho yathāha bhagavān kṛṣṇadvaipāyanaḥ nāsato vidyate bhāvo nābhāvo vidyate sata iti / (2.41) Par.?

yathā kūrmaḥ svāvayavebhyaḥ saṃkocivikāsibhyo na bhinna evaṃ kuṭakaṭakādayo 'pi mṛtsuvarṇādibhyo na bhinnāḥ / (2.42) Par.?

evaṃ ca tantuṣu paṭa iti vyapadeśo yatheha vane tilakā ityupapannaḥ / (2.43) Par.?

na cārthakriyābhedo bhedam āpādayati / (2.44) Par.?

ekasyāpi nānārthakriyādarśanād yathaika eva vahnir dāhakaḥ pācakaśca / (2.45) Par.?

nāpyarthakriyāvyavasthā vastubhede hetuḥ / (2.46) Par.?

teṣām eva samastavyastānām arthakriyāvyavasthādarśanāt / (2.47) Par.?

yathā pratyekaṃ viṣṭayo darśanalakṣaṇām arthakriyāṃ kurvanti na śibikāvahanaṃ militāstu śibikāṃ vahantyevaṃ tantavaḥ pratyekaṃ prāvaraṇam akurvāṇā api militā āvirbhūtapaṭabhāvāḥ prāvariṣyanti / (2.48) Par.?

syād etat / (2.49) Par.?

āvirbhāvaḥ paṭasya kāraṇavyāpārāt prāk sann asan vā / (2.50) Par.?

saced asan prāptam asata utpādanam / (2.51) Par.?

atha san kṛtaṃ tarhi karaṇena / (2.52) Par.?

na hi sati kāraṇāṇāṃ vyāpāraṃ paśyāmaḥ / (2.53) Par.?

āvirbhāve cāvirbhāvāntarakalpanenānavasthāprasaṅgaḥ / (2.54) Par.?

tasmād āvirbhūtapaṭabhāvās tantavaḥ kriyanta iti riktaṃ vacaḥ / (2.55) Par.?

athāsad utpadyata iti keyam asata utpattiḥ satī asatī vā / (2.56) Par.?

satī cet kṛtaṃ karaṇena asatī cet tatrāpyutpattyantaram ityanavasthā / (2.57) Par.?

athotpattiḥ paṭānnārthāntaram api tu paṭa evāsau tathāpi yāvad uktaṃ bhavati paṭa iti tāvad uktaṃ bhavatyutpadyata iti / (2.58) Par.?

tataśca paṭa ityukta utpadyata iti na vācyaṃ paunaruktyād vinaśyatītyapi na vācyaṃ virodhāt / (2.59) Par.?

tasmād iyaṃ paṭotpattiḥ svakāraṇasamavāyo vā svasattāsamavāyo vā ubhayathāpi notpadyate / (2.60) Par.?

atha ca tadarthāni kāraṇāni vyāpriyanta evaṃ paṭādeḥ sata evāvirbhāvāya kāraṇāpekṣetyupapannam / (2.61) Par.?

na ca paṭarūpeṇa kāraṇānāṃ saṃbandhaḥ / (2.62) Par.?

tadrūpasyākriyātvāt kriyāsaṃbandhitvācca kāraṇānām anyathā kāraṇatvābhāvāt / (2.63) Par.?

tasmāt satkāryam iti puṣkalam / (2.64) Par.?

tad evaṃ pradhānasādhanānuguṇaṃ satkāryam upapādya yādṛśaṃ tat pradhānaṃ sādhanīyaṃ tādṛśam ādarśayituṃ vivekajñānopayogi vyaktāvyaktavairūpyaṃ tāvad āha // (2.65) Par.?