Texts

athāta āsiktakṣīrikaṃ vājīkaraṇapādaṃ vyākhyāsyāmaḥ // (1) Par.?

iti ha smāha bhagavānātreyaḥ // (2) Par.?

āsiktakṣīram āpūrṇam aśuṣkaṃ śuddhaṣaṣṭikam / (3.1) Par.?

udūkhale samāpothya pīḍayet kṣīramarditam // (3.2) Par.?

gṛhītvā taṃ rasaṃ pūtaṃ gavyena payasā saha / (4.1) Par.?

bījānāmātmaguptāyā dhānyamāṣarasena ca // (4.2) Par.?

balāyāḥ śūrpaparṇyāśca jīvantyā jīvakasya ca / (5.1) Par.?

ṛddhyarṣabhakakākolīśvadaṃṣṭrāmadhukasya ca // (5.2) Par.?

śatāvaryā vidāryāśca drākṣākharjūrayor api / (6.1) Par.?

saṃyuktaṃ mātrayā vaidyaḥ sādhayettatra cāvapet // (6.2) Par.?

tugākṣīryāḥ samāṣāṇāṃ śālīnāṃ ṣaṣṭikasya ca / (7.1) Par.?

godhūmānāṃ ca cūrṇāni yaiḥ sa sāndrībhavedrasaḥ // (7.2) Par.?

sāndrībhūtaṃ ca kuryāt prabhūtamadhuśarkaram / (8.1) Par.?

guṭikā badaraistulyāstāś ca sarpiṣi bharjayet // (8.2) Par.?

tā yathāgni prayuñjānaḥ kṣīramāṃsarasāśanaḥ / (9.1) Par.?

paśyatyapatyaṃ vipulaṃ vṛddho 'pyātmajamakṣayam // (9.2) Par.?

caṭakānāṃ sahaṃsānāṃ dakṣāṇāṃ śikhināṃ tathā / (10.1) Par.?

śiśumārasya nakrasya bhiṣakśukrāṇi saṃharet // (10.2) Par.?

gavyaṃ sarpir varāhasya kuliṅgasya vasāmapi / (11.1) Par.?

ṣaṣṭikānāṃ ca cūrṇāni cūrṇaṃ godhūmakasya ca // (11.2) Par.?

ebhiḥ pūpalikāḥ kāryāḥ śaṣkulyo vartikāstathā / (12.1) Par.?

pūpā dhānāś ca vividhā bhakṣyāścānye pṛthagvidhāḥ // (12.2) Par.?

eṣāṃ prayogādbhakṣyāṇāṃ stabdhenāpūrṇaretasā / (13.1) Par.?

śephasā vājivadyāti yāvadicchaṃ striyo naraḥ // (13.2) Par.?

ātmaguptāphalaṃ māṣān kharjūrāṇi śatāvarīm / (14.1) Par.?

śṛṅgāṭakāni mṛdvīkāṃ sādhayetprasṛtonmitam // (14.2) Par.?

kṣīraprasthaṃ jalaprasthametat prasthāvaśeṣitam / (15.1) Par.?

śuddhena vāsasā pūtaṃ yojayet prasṛtais tribhiḥ // (15.2) Par.?

śarkarāyāstugākṣīryāḥ sarpiṣo 'bhinavasya ca / (16.1) Par.?

tat pāyayet sakṣaudraṃ ṣaṣṭikānnaṃ ca bhojayet // (16.2) Par.?

jarāparīto'pyabalo yogenānena vindati / (17.1) Par.?

naro'patyaṃ suvipulaṃ yuveva ca sa hṛṣyati // (17.2) Par.?

kharjūrīmastakaṃ māṣān payasyāṃ ca śatāvarīm / (18.1) Par.?

kharjūrāṇi madhūkāni mṛdvīkāmajaḍāphalam // (18.2) Par.?

palonmitāni matimān sādhayet salilāḍhake / (19.1) Par.?

tena pādāvaśeṣeṇa kṣīraprasthaṃ vipācayet // (19.2) Par.?

kṣīraśeṣeṇa tenādyād ghṛtāḍhyaṃ ṣaṣṭikaudanam / (20.1) Par.?

saśarkareṇa saṃyoga eṣa vṛṣyaḥ paraṃ smṛtaḥ // (20.2) Par.?

jīvakarṣabhakau medāṃ jīvantīṃ śrāvaṇīdvayam / (21.1) Par.?

kharjūraṃ madhukaṃ drākṣāṃ pippalīṃ viśvabheṣajam // (21.2) Par.?

śṛṅgāṭakaṃ vidārīṃ ca navaṃ sarpiḥ payo jalam / (22.1) Par.?

siddhaṃ ghṛtāvaśeṣaṃ taccharkarākṣaudrapādikam // (22.2) Par.?

ṣaṣṭikānnena saṃyuktamupayojyaṃ yathābalam / (23.1) Par.?

vṛṣyaṃ balyaṃ ca varṇyaṃ ca kaṇṭhyaṃ bṛṃhaṇam uttamam // (23.2) Par.?

dadhnaḥ saraṃ śaraccandrasaṃnibhaṃ doṣavarjitam / (24.1) Par.?

śarkarākṣaudramaricais tugākṣīryā ca buddhimān // (24.2) Par.?

yuktyā yuktaṃ sasūkṣmailaṃ nave kumbhe śucau paṭe / (25.1) Par.?

mārjitaṃ prakṣipecchīte ghṛtāḍhye ṣaṣṭikaudane // (25.2) Par.?

pibenmātrāṃ rasālāyāstaṃ bhuktvā ṣaṣṭikaudanam / (26.1) Par.?

varṇasvarabalopetaḥ pumāṃstena vṛṣāyate // (26.2) Par.?

candrāṃśukalpaṃ payasā ghṛtāḍhyaṃ ṣaṣṭikaudanam / (27.1) Par.?

śarkarāmadhusaṃyuktaṃ prayuñjāno vṛṣāyate // (27.2) Par.?

tapte sarpiṣi nakrāṇḍaṃ tāmracūḍāṇḍamiśritam / (28.1) Par.?

yuktaṃ ṣaṣṭikacūrṇena sarpiṣābhinavena ca // (28.2) Par.?

paktvā pūpalikāḥ khādedvāruṇīmaṇḍapo naraḥ / (29.1) Par.?

ya icchedaśvavad gantuṃ prasektuṃ gajavac ca yaḥ // (29.2) Par.?

etaiḥ prayogairvidhivadvapuṣmān vīryopapanno balavarṇayuktaḥ / (30.1) Par.?

harṣānvito vājivad aṣṭavarṣo bhavet samarthaśca varāṅganāsu // (30.2) Par.?

yadyacca kiṃcin manasaḥ priyaṃ syādramyā vanāntāḥ pulināni śailāḥ / (31.1) Par.?

iṣṭāḥ striyo bhūṣaṇagandhamālyaṃ priyā vayasyāśca tadatra yogyam // (31.2) Par.?

āsiktakṣīrike pāde ye yogāḥ parikīrtitāḥ / (32.1) Par.?

aṣṭāv apatyakāmaiste prayojyāḥ pauruṣārthibhiḥ // (32.2) Par.?

ityagniveśakṛte tantre carakapratisaṃskṛte cikitsāsthāne vājīkaraṇādhyāye āsiktakṣīriko nāma vājīkaraṇapādo dvitīyaḥ // (33) Par.?