Texts

anv agnir uṣasām agram akhyad ity anukśātyai // (1) Par.?

āgatya vājy adhvānaṃ sarvā mṛdho vidhūnuta iti mṛdha evaitayāpahate // (2) Par.?

ākramya vājin pṛthivīm agnim iccha rucā tvam iti // (3) Par.?

aicchad vā etaṃ pūrvayā prajāpatiḥ // (4) Par.?

avindad uttarayā // (5) Par.?

icchaty eva pūrvayā // (6) Par.?

vindaty uttarayā // (7) Par.?

dyaus te pṛṣṭhaṃ pṛthivī sadhastham iti // (8) Par.?

vajrī vā aśvaḥ prājāpatyaḥ // (9) Par.?

lomabhir ubhayādataḥ paśūn ati dadbhir anyatodataḥ // (10) Par.?

vajreṇaiva bhrātṛvyam avagṛhṇāti // (11) Par.?

yatra vai yajñasyānurūpaṃ kriyate tat paśavo 'nurūpā jāyante // (12) Par.?

utkrāmodakramīd ity anurūpābhyām utkramayati // (13) Par.?

tasmāt paśavo 'nurūpā jāyante // (14) Par.?

dvābhyām // (15) Par.?

dvipād yajamānaḥ pratiṣṭhityai // (16) Par.?

yāṃ vā anagnā adhvaryur āhutiṃ juhoty andho 'dhvaryur bhavati // (17) Par.?

rakṣāṃsi yajñaṃ ghnanti // (18) Par.?

agnir vai varuṇānīr abhyakāmayata // (19) Par.?

tasya tejaḥ parāpatat // (20) Par.?

taddhiraṇyam abhavat // (21) Par.?

yaddhiraṇyam upāsya juhoty agnimaty eva juhoti samṛddhyai // (22) Par.?

nāndho 'dhvaryur bhavati // (23) Par.?

na rakṣāṃsi yajñaṃ ghnanti // (24) Par.?

jigharmy agniṃ manasā ghṛteneti // (25) Par.?

mano vai vācaḥ kṣepīyaḥ // (26) Par.?

manasaivāhutim āpnoti // (27) Par.?

pratikṣiyantaṃ bhuvanāni viśveti tasmād eṣa sarvāḥ prajāḥ pratyaṅ kṣiyate // (28) Par.?

vyaciṣṭham annaṃ rabhasaṃ vidānam ity annam evāsmai svadayati // (29) Par.?

ā tvā jigharmi vacasā ghṛteneti pūrvam evoditam anuvadati // (30) Par.?

arakṣasā manasā taj juṣethā iti rakṣasām apahatyai // (31) Par.?

maryaśrīs spṛhayadvarṇo agnir ity apacitim evāsmin dadhāti // (32) Par.?

dvābhyāṃ juhoti // (33) Par.?

dvipād yajamānaḥ pratiṣṭhityai // (34) Par.?

yajñamukhe yajñamukhe vai yajñaṃ rakṣāṃsi jighāṃsanti // (35) Par.?

yat parilikhati rakṣasām apahatyai // (36) Par.?

tisṛbhiḥ parilikhati // (37) Par.?

traya ime lokāḥ // (38) Par.?

ebhya eva lokebhyo rakṣāṃsy apahanti // (39) Par.?

pari vājapatiḥ kavir iti gāyatryā parilikhati // (40) Par.?

brahma vai gāyatrī // (41) Par.?

brahmaṇaivainaṃ parigṛhṇāti // (42) Par.?

pari tvāgne puraṃ vayam ity anuṣṭubhā // (43) Par.?

vāg vā anuṣṭup // (44) Par.?

anuṣṭup sarvāṇi chandāṃsi paribhūḥ // (45) Par.?

vācaiva sarvāṇi chandāṃsi parigṛhṇāti // (46) Par.?

tvam agne dyubhir iti triṣṭubhā // (47) Par.?

vīryaṃ vai triṣṭup // (48) Par.?

vīryeṇaivainaṃ parigṛhṇāti // (49) Par.?

anuṣṭubhā madhyataḥ parilikhati // (50) Par.?

vāg vā anuṣṭup // (51) Par.?

vācam eva madhyato dadhāti // (52) Par.?

tasmān madhyato vāg vadati // (53) Par.?

tejo vai gāyatrī // (54) Par.?

yajño 'nuṣṭup // (55) Par.?

indriyaṃ triṣṭup // (56) Par.?

tejasā caivendriyeṇa ca yajñam ubhayata ātman parigṛhṇāti // (57) Par.?