Texts

etā ha vai devatā yo 'sti tasmin vasantīndro yamo rājā naḍo naiṣidho 'naśnant sāṃgamano 'san pāṃsavaḥ // (1) Par.?

tad vā eṣa evendro yad āhavanīyaḥ / (2.1) Par.?

athaiṣa eva gārhapatyo yamo rājā / (2.2) Par.?

athaiṣa eva naḍo naiṣidho yad anvāhāryapacanaḥ / (2.3) Par.?

tad yad etam ahar ahar dakṣiṇata āharanti tasmād āhur ahar ahar vai naḍo naiṣidho yamaṃ rājānaṃ dakṣiṇata upanayatīti // (2.4) Par.?

atha ya eṣa sabhāyām agnir eṣa evānaśnant sāṃgamanaḥ / (3.1) Par.?

tad yad etam anaśitvevopasaṃgacchante tasmād eṣo 'naśnan / (3.2) Par.?

atha yad etad bhasmoddhṛtya parāvapanty eṣa evāsan pāṃsavaḥ / (3.3) Par.?

sa yo haivam etad vedaivaṃ mayy etā devatā vasantīti sarvān haivaitāṃl lokāñ jayati sarvāṃl lokān anusaṃcarati // (3.4) Par.?

teṣām upasthānam / (4.1) Par.?

yad eva sāyam prātar āhavanīyam upa ca tiṣṭhata upa cāste tad eva tasyopasthānam / (4.2) Par.?

atha yad eva pratiparetya gārhapatyam āste vā śete vā tad eva tasyopasthānam / (4.3) Par.?

atha yatraiva saṃvrajann anvāhāryapacanam upasmaret tad eva tam manasopatiṣṭheta tad eva tasyopasthānam // (4.4) Par.?

atha prātar anaśitvā muhūrtaṃ sabhāyām āsitvāpi kāmam palyayeta / (5.1) Par.?

tad eva tasyopasthānam / (5.2) Par.?

atha yatraiva bhasmoddhṛtam upanigacchet tad eva tasyopasthānam / (5.3) Par.?

evam u hāsyaitā devatā upasthitā bhavanti // (5.4) Par.?

yajamānadevatyo vai gārhapatyaḥ / (6.1) Par.?

athaiṣa bhrātṛvyadevatyo yad anvāhāryapacanaḥ / (6.2) Par.?

tasmād etaṃ nāhar ahar āhareyuḥ / (6.3) Par.?

na ha vā asya sapatnā bhavanti yasyaivaṃ viduṣa etaṃ nāhar ahar āharanti / (6.4) Par.?

anvāhāryapacano vā eṣaḥ // (6.5) Par.?

upavasatha evainam āhareyur yatraivāsmin yakṣyanto bhavanti / (7.1) Par.?

tatho hāsyaiṣo 'moghāyāhṛto bhavati // (7.2) Par.?

navāvasite vainam āhareyuḥ / (8.1) Par.?

tasmin paceyuḥ / (8.2) Par.?

tad brāhmaṇā aśnīyuḥ / (8.3) Par.?

yady u tan na vinded yat paced api gor eva dugdham adhiśrayitavai brūyāt / (8.4) Par.?

tasmin brāhmaṇān pāyayitavai brūyāt / (8.5) Par.?

pāpīyāṃso ha vā asya sapatnā bhavanti yasyaivaṃ viduṣa evaṃ kurvanti / (8.6) Par.?

tasmād evam eva cikīrṣet // (8.7) Par.?

tad yatraitat prathamaṃ samiddho bhavati dhūpyata iva tarhi haiṣa bhavati rudraḥ / (9.1) Par.?

sa yaḥ kāmayeta yathemā rudraḥ prajā aśraddhayeva tvat sahaseva tvan nighātam iva tvat sacata evam annam adyām iti tarhi ha sa juhuyāt / (9.2) Par.?

prāpnoti haivaitad annādyaṃ ya evaṃ vidvāṃs tarhi juhoti // (9.3) Par.?

atha yatraitat pradīptataro bhavati tarhi haiṣa bhavati varuṇaḥ / (10.1) Par.?

sa yaḥ kāmayeta yathemā varuṇaḥ prajā gṛhṇann iva tvat sahaseva tvan nighātam iva tvat sacata evam annam adyām iti tarhi ha sa juhuyāt / (10.2) Par.?

prāpnoti haivaitad annādyaṃ ya evaṃ vidvāṃs tarhi juhoti // (10.3) Par.?

atha yatraitat pradīpto bhavaty uccair dhūmaḥ paramayā jūtyā balbalīti tarhi haiṣa bhavatīndraḥ / (11.1) Par.?

sa yaḥ kāmayetendra iva śriyā yaśasā syām iti tarhi ha sa juhuyāt / (11.2) Par.?

prāpnoti haivaitad annādyaṃ ya evaṃ vidvāṃs tarhi juhoti // (11.3) Par.?

atha yatraitat pratitarām iva tiraścīvārciḥ saṃśāmyato bhavati tarhi haiṣa bhavati mitraḥ / (12.1) Par.?

sa yaḥ kāmayeta maitreṇedam annam adyām iti yam āhuḥ sarvasya vā ayam brāhmaṇo mitraṃ na vā ayaṃ kaṃ cana hinastīti tarhi ha sa juhuyāt / (12.2) Par.?

prāpnoti haivaitad annādyaṃ ya evaṃ vidvāṃs tarhi juhoti // (12.3) Par.?

atha yatraitad aṅgārāś cākaśyanta iva tarhi haiṣa bhavati brahma / (13.1) Par.?

sa yaḥ kāmayeta brahmavarcasī syām iti tarhi ha sa juhuyāt / (13.2) Par.?

prāpnoti haivaitad annādyaṃ ya evaṃ vidvāṃs tarhi juhoti // (13.3) Par.?

eteṣām ekaṃ saṃvatsaram upertset svayaṃ juhvad yadi vāsyānyo juhuyāt / (14.1) Par.?

atha yo 'nyathānyathā juhoti yathāpo vābhikhanann anyad vānnādyaṃ sa sāmi nivartetaivaṃ tat / (14.2) Par.?

atha yaḥ sārdhaṃ juhoti yathāpo vābhikhanann anyad vānnādyaṃ tat kṣipre 'bhitṛndyād evaṃ tat // (14.3) Par.?

abhrayo ha vā etā annādyasya yad āhutayaḥ / (15.1) Par.?

abhi haivaitad annādyaṃ tṛṇatti ya evaṃ vidvān agnihotraṃ juhoti // (15.2) Par.?

sā yā pūrvāhutis te devāḥ / (16.1) Par.?

atha yottarā te manuṣyāḥ / (16.2) Par.?

atha yat sruci pariśinaṣṭi te paśavaḥ // (16.3) Par.?

sa vai kanīya iva pūrvām āhutiṃ juhoti bhūya ivottarām / (17.1) Par.?

bhūya iva sruci pariśinaṣṭi // (17.2) Par.?

sa yat kanīya iva pūrvām āhutiṃ juhoti kanīyāṃso hi devā manuṣyebhyaḥ / (18.1) Par.?

atha yad bhūya ivottarām bhūyāṃso hi manuṣyā devebhyaḥ / (18.2) Par.?

atha yad bhūya iva sruci pariśinaṣṭi bhūyāṃso hi paśavo manuṣyebhyaḥ / (18.3) Par.?

kanīyāṃso ha vā asya bhāryā bhavanti bhūyāṃsaḥ paśavo ya evaṃ vidvān agnihotraṃ juhoti / (18.4) Par.?

tad vai samṛddhaṃ yasya kanīyāṃso bhāryā asan bhūyāṃsaḥ paśavaḥ // (18.5) Par.?