Texts

sa vai rājānam paṇate / (1.1) Par.?

sa yad rājānam paṇate tasmād idaṃ sakṛt sarvam paṇyam / (1.2) Par.?

sa āha somavikrayin krayyas te somo rājā3 iti / (1.3) Par.?

krayya ity āha somavikrayī / (1.4) Par.?

taṃ vai te krīṇānīti / (1.5) Par.?

krīṇīhīty āha somavikrayī / (1.6) Par.?

kalayā te krīṇānīti / (1.7) Par.?

bhūyo vā ataḥ somo rājārhatīty āha somavikrayī / (1.8) Par.?

bhūya evātaḥ somo rājārhati / (1.9) Par.?

mahāṃs tv eva gor mahimety adhvaryuḥ // (1.10) Par.?

gor vai pratidhuk tasyai śṛtaṃ tasyai śaras tasyai dadhi tasyai mastu tasyā ātañcanaṃ tasyai navanītaṃ tasyai ghṛtaṃ tasyā āmikṣā tasyai vājinam // (2.1) Par.?

śaphena te krīṇānīti / (3.1) Par.?

bhūyo vā ataḥ somo rājārhatīty āha somavikrayī / (3.2) Par.?

bhūya evātaḥ somo rājārhati / (3.3) Par.?

mahāṃs tv eva gor mahimety adhvaryuḥ / (3.4) Par.?

etāny eva daśa vīryāṇy udākhyāyāha padā te 'rdhena te gavā te krīṇāmīti / (3.5) Par.?

krītaḥ somo rājety āha somavikrayī / (3.6) Par.?

vayāṃsi prabrūhīti // (3.7) Par.?

sa āha candraṃ te vastraṃ te chāgā te dhenus te mithunau te gāvau tisras te 'nyā iti / (4.1) Par.?

sa yad arvāk paṇante paraḥ sampādayanti tasmād idaṃ sakṛt sarvam paṇyam / (4.2) Par.?

arvāk paṇante paraḥ sampādayanti / (4.3) Par.?

atha yad adhvaryur eva gor vīryāṇy udācaṣṭe na somasya somavikrayī mahito vai somo devo hi somaḥ / (4.4) Par.?

atha tad adhvaryur gām mahayati tasyai paśyan vīryāṇi krīṇād iti / (4.5) Par.?

tasmād adhvaryur eva gor vīryāṇy udācaṣṭe na somasya somavikrayī // (4.6) Par.?

atha yat pañca kṛtvaḥ paṇate / (5.1) Par.?

saṃvatsarasaṃmito vai yajñaḥ / (5.2) Par.?

pañca vā ṛtavaḥ saṃvatsarasya / (5.3) Par.?

tam pañcabhir āpnoti / (5.4) Par.?

tasmāt pañca kṛtvaḥ paṇate // (5.5) Par.?

atha hiraṇye vācayati śukraṃ tvā śukreṇa krīṇāmīti / (6.1) Par.?

śukraṃ hy etacchukreṇa krīṇāti yat somaṃ hiraṇyena / (6.2) Par.?

candraṃ candreṇeti / (6.3) Par.?

candraṃ hy etac candreṇa krīṇāti yat somaṃ hiraṇyena / (6.4) Par.?

amṛtam amṛteneti / (6.5) Par.?

amṛtaṃ hy etad amṛtena krīṇāti yat somaṃ hiraṇyena // (6.6) Par.?

atha somavikrayiṇam abhiprakampayati sagme te gor iti / (7.1) Par.?

yajamāne te gaur ity evaitad āha / (7.2) Par.?

tad yajamānam abhyāhṛtya nyasyaty asme te candrāṇīti / (7.3) Par.?

sa ātmany eva vīryaṃ dhatte / (7.4) Par.?

śarīram eva somavikrayī harate / (7.5) Par.?

tat tataḥ somavikrayy ādatte // (7.6) Par.?

athājāyām pratīcīnamukhyāṃ vācayati tapasas tanūr asīti / (8.1) Par.?

tapaso ha vā eṣā prajāpateḥ sambhūtā yad ajā / (8.2) Par.?

tasmād āha tapasas tanūr asīti / (8.3) Par.?

prajāpater varṇa iti / (8.4) Par.?

sā yat triḥ saṃvatsarasya vijāyate tena prajāpater varṇaḥ / (8.5) Par.?

parameṇa paśunā krīyasa iti / (8.6) Par.?

sā yat triḥ saṃvatsarasya vijāyate tena paramaḥ paśuḥ / (8.7) Par.?

sahasrapoṣam puṣeyam ity āśiṣam evaitad āśāste / (8.8) Par.?

bhūmā vai sahasram / (8.9) Par.?

bhūmānaṃ gacchānīty evaitad āha // (8.10) Par.?

sa vā anenaivājām prayacchati / (9.1) Par.?

anena rājānam ādatte / (9.2) Par.?

ājā ha vai nāmaiṣā yad ajā / (9.3) Par.?

etayā hy enam antata ājati / (9.4) Par.?

tām etat parokṣam ajety ācakṣate // (9.5) Par.?

atha rājānam ādatte mitro na ehi sumitradha iti / (10.1) Par.?

śivo naḥ śānta ehīty evaitad āha / (10.2) Par.?

taṃ yajamānasya dakṣiṇa ūrau pratyuhya vāso nidadhātīndrasyorum āviśa dakṣiṇam iti / (10.3) Par.?

eṣa vā atrendro bhavati yad yajamānaḥ / (10.4) Par.?

tasmād āhendrasyorum āviśa dakṣiṇam iti / (10.5) Par.?

uśann uśantam iti priyaḥ priyam ity evaitad āha / (10.6) Par.?

syonaḥ syonam iti śivaḥ śivam ity evaitad āha // (10.7) Par.?

atha somakrayaṇān anudiśati svāna bhrājāṅghare bambhāre hasta suhasta kṛśānav ete vaḥ somakrayaṇās tān rakṣadhvam mā vo dabhann iti / (11.1) Par.?

dhiṣṇyānāṃ vā ete bhājanena / (11.2) Par.?

etāni vai dhiṣṇyānāṃ nāmāni / (11.3) Par.?

tāny evaibhya etad anvadikṣata // (11.4) Par.?

athātrāporṇute / (12.1) Par.?

garbho vā eṣa bhavati yo dīkṣate / (12.2) Par.?

prāvṛtā vai garbhā ulbeneva jarāyuṇeva / (12.3) Par.?

tam atrājījanata / (12.4) Par.?

tasmād aporṇute / (12.5) Par.?

eṣa vā atra garbho bhavati / (12.6) Par.?

tasmāt parivṛto bhavati / (12.7) Par.?

parivṛtā iva hi garbhā ulbeneva jarāyuṇeva // (12.8) Par.?

atha vācayati pari māgne duścaritād bādhasvā mā sucarite bhajeti / (13.1) Par.?

āsīnaṃ vā enam eṣa āgacchati / (13.2) Par.?

sa āgata uttiṣṭhati / (13.3) Par.?

tan mithyākaroti vratam pramīṇāti / (13.4) Par.?

tasyo haiṣā prāyaścittiḥ / (13.5) Par.?

tatho hāsyaitan na mithyākṛtam bhavati / (13.6) Par.?

na vratam pramīṇāti / (13.7) Par.?

tasmād āha pari māgne duścaritād bādhasvā mā sucarite bhajeti // (13.8) Par.?

atha rājānam ādāyottiṣṭhaty ud āyuṣā svāyuṣodasthām amṛtāṁ anv iti / (14.1) Par.?

amṛtaṃ vā eṣo 'nūttiṣṭhati yaḥ somaṃ krītam / (14.2) Par.?

tasmād āhod āyuṣā svāyuṣodasthām amṛtāṁ anv iti // (14.3) Par.?

atha rājānam ādāyārohaṇam abhipraiti prati panthām apadmahi svastigām anehasam yena viśvāḥ pari dviṣo vṛṇakti vindate vasv iti // (15.1) Par.?

devā ha vai yajñaṃ tanvānās te 'surarakṣasebhya āsaṅgād bibhayāṃcakruḥ / (16.1) Par.?

ta etad yajuḥ svastyayanaṃ dadṛśuḥ / (16.2) Par.?

ta etena yajuṣā nāṣṭrā rakṣāṃsy apahatyaitasya yajuṣo 'bhaye 'nāṣṭre nivāte svasti samāśnuvata / (16.3) Par.?

tatho evaiṣa etena yajuṣā nāṣṭrā rakṣāṃsy apahatyaitasya yajuṣo 'bhaye 'nāṣṭre nivāte svasti samaśnute / (16.4) Par.?

tasmād āha prati panthām apadmahi svastigām anehasam yena viśvāḥ pari dviṣo vṛṇakti vindate vasv iti // (16.5) Par.?

taṃ vā iti haranti / (17.1) Par.?

anasā parivahanti / (17.2) Par.?

mahayanty evainam etat / (17.3) Par.?

tasmācchīrṣṇā bījaṃ haranti / (17.4) Par.?

anasodāvahanti // (17.5) Par.?

atha yad apām ante krīṇāti / (18.1) Par.?

raso vā āpaḥ / (18.2) Par.?

sarasam evaitat krīṇāti / (18.3) Par.?

atha yaddhiraṇyam bhavati saśukram evaitat krīṇāti / (18.4) Par.?

atha yad vāso bhavati satvacasam evaitat krīṇāti / (18.5) Par.?

atha yad ajā bhavati satapasam evaitat krīṇāti / (18.6) Par.?

atha yad dhenur bhavati sāśiram evaitat krīṇāti / (18.7) Par.?

atha yan mithunau bhavataḥ samithunam evaitat krīṇāti / (18.8) Par.?

taṃ vai daśabhir eva krīṇīyān nādaśabhiḥ / (18.9) Par.?

daśākṣarā vai virāṭ / (18.10) Par.?

vairājaḥ somaḥ / (18.11) Par.?

tasmād daśabhir eva krīṇīyān nādaśabhiḥ // (18.12) Par.?