Texts

codaneti kriyāyāḥ pravartakaṃ vacanam āhuḥ // (1) Par.?

ācāryacoditaḥ karomīti hi dṛśyate // (2) Par.?

lakṣyate yena tal lakṣaṇam // (3) Par.?

dhūmo lakṣaṇam agner iti hi vadanti // (4) Par.?

tayā yo lakṣyate so 'rthaḥ puruṣaṃ niḥśreyasena saṃyunaktīti pratijānīmahe // (5) Par.?

codanā hi bhūtaṃ bhavantaṃ bhaviṣyantaṃ sūkṣmaṃ vyavahitaṃ viprakṛṣṭam ity evaṃjātīyakam arthaṃ śaknoty avagamayituṃ nānyat kiṃcanendriyam // (6) Par.?

nanv atathābhūtam apy arthaṃ brūyāc codanā yathā yatkiṃcana laukikaṃ vacanaṃ nadyās tīre phalāni santīti // (7) Par.?

tat tathyam api bhavati vitatham api bhavatīti // (8) Par.?

ucyate vipratiṣiddham idam abhidhīyate bravīti ca vitathaṃ ceti // (9) Par.?

bravītīty ucyate 'vabodhayati budhyamānasya nimittaṃ bhavatīti // (10) Par.?

yasmiṃś ca nimittabhūte saty avabudhyate so 'vabodhayati // (11) Par.?

yadi ca codanāyāṃ satyām agnihotrāt svargo bhavatīty avagamyate katham ucyate na tathā bhavatīti // (12) Par.?

atha na tathā bhavati katham avabudhyate // (13) Par.?

asantam artham avabudhyata iti vipratiṣiddham // (14) Par.?

na ca svargakāmo yajetety ato vacanāt saṃdigdham avagamyate bhavati vā svargo na vā bhavatīti // (15) Par.?

na ca niścitam avagamyamānam idaṃ mithyā syāt // (16) Par.?

yo hi janitvā pradhvaṃsate naitad evam iti sa mithyāpratyayaḥ // (17) Par.?

na caiṣa kālāntare puruṣāntare 'vasthāntare deśāntare vā viparyeti // (18) Par.?

tasmād avitathaḥ // (19) Par.?

yat tu laukikaṃ vacanaṃ tac cet pratyayitāt puruṣād indriyaviṣayaṃ vāvitatham eva tat // (20) Par.?

athāpratyayitāt puruṣād anindriyaviṣayaṃ vā tat puruṣabuddhiprabhavam apramāṇam // (21) Par.?

aśakyaṃ hi tat puruṣeṇa jñātum ṛte vacanāt // (22) Par.?

aparasmāt pauruṣeyād vacanād avagatam iti cet tad api tenaiva tulyam // (23) Par.?

naivaṃjātīyakeṣv artheṣu puruṣavacanaṃ prāmāṇyam upaiti jātyandhānām iva vacanaṃ rūpaviśeṣeṣu // (24) Par.?

nanv aviduṣām upadeśo nāvakalpate // (25) Par.?

upadiṣṭavantaś ca manvādayaḥ // (26) Par.?

tasmāt puruṣāḥ santo viditavantaś ca // (27) Par.?

yathā cakṣuṣā rūpam upalabhyata iti darśanād evāvagatam // (28) Par.?

ucyata upadeśo hi vyāmohād api bhavati // (29) Par.?

asati vyāmohe vedād api bhavati // (30) Par.?

api ca pauruṣeyād vacanād evam ayaṃ puruṣaḥ vedeti bhavati pratyayo na evam ayam artha iti // (31) Par.?

viplavate khalv api kaścit puruṣakṛtād vacanāt pratyayaḥ // (32) Par.?

na tu vedavacanasya mithyātve kiṃcana pramāṇam asti // (33) Par.?

nanu sāmānyato dṛṣṭaṃ bhaviṣyati // (34) Par.?

pauruṣeyaṃ vacanaṃ vitatham upalabhya vacanasāmānyād vedavacanaṃ mithyety anumīyate // (35) Par.?

nānyatvāt // (36) Par.?

na hy anyasya vitathabhāve 'nyasya vaitathyaṃ bhavitum arhaty anyatvād eva // (37) Par.?

na hi devadattasya śyāmatve yajñadattasyāpi śyāmatvaṃ bhavitum arhati // (38) Par.?

api ca puruṣavacanasādharmyād vedavacanaṃ vitatham ity anumānam // (39) Par.?

pratyakṣas tu vedavacane pratyayaḥ // (40) Par.?

na cānumānaṃ pratyakṣavirodhi pramāṇaṃ bhavati // (41) Par.?

tasmāc codanālakṣaṇo 'rthaḥ śreyaskaraḥ // (42) Par.?

evaṃ tarhi śreyaskaro jijñāsitavyaḥ // (43) Par.?

kiṃ dharmajijñāsayocyate ya eva śreyaskaraḥ sa eva dharmaśabdenocyate // (44) Par.?

katham avagamyate yo hi yāgam anutiṣṭhati taṃ dhārmika iti samācakṣate // (45) Par.?

yaś ca yasya kartā sa tena vyapadiśyate yathā pācako lāvaka iti // (46) Par.?

tena yaḥ puruṣaṃ niḥśreyasena saṃyunakti sa eva dharmaśabdenocyate // (47) Par.?

na kevalaṃ loke vede 'pi // (48) Par.?

yajñena yajñam ayajanta devāḥ // (49) Par.?

tāni dharmāṇi prathamāny āsan / (50.1) Par.?

iti yajatiśabdavācyam eva dharmaṃ samāmananti // (50.2) Par.?

ubhayam iha codanayā lakṣyate 'rtho 'narthaś ca // (51) Par.?

ko 'rtho yo niḥśreyasāya jyotiṣṭomādiḥ // (52) Par.?

ko 'nartho yaḥ pratyavāyāya śyeno vajra iṣur ity evamādiḥ // (53) Par.?

tatrānartho dharma ukto mā bhūd ity arthagrahaṇam // (54) Par.?

kathaṃ punar asāv anartho hiṃsā hi sā sā ca pratiṣiddhā // (55) Par.?

kathaṃ punar asāv anarthaḥ kartavyatayopadiśyata ucyate naiva śyenādayaḥ kartavyatayā vijñāyante // (56) Par.?

yo hi hiṃsitum icchet tasyāyam abhyupāya iti hi teṣām upadeśaḥ // (57) Par.?

śyenenābhicaran yajeteti hi samāmananti nābhicaritavyam iti // (58) Par.?

nanv aśaktam idaṃ sūtram imāv arthāv abhivadituṃ codanālakṣaṇo dharmo nendriyādilakṣaṇo 'rthaś ca dharmo nānartha iti // (59) Par.?

ekaṃ hīdaṃ vākyam // (60) Par.?

tad evaṃ sati bhidyeta // (61) Par.?

ucyate yatra vākyād evārtho 'vagamyate tatraivam // (62) Par.?

tat tu vaidikeṣu na sūtreṣu // (63) Par.?

anyato 'vagate 'rthe sūtram evamartham ity avagamyate tena caikadeśaḥ sūtryata iti sūtram // (64) Par.?

tatra bhinnayor eva vākyayor imāv ekadeśāv ity avagantavyam // (65) Par.?

athavārthasya sataś codanālakṣaṇasya dharmatvam ucyata ity ekārtham eveti // (66) Par.?