Texts

Help

Select a text:
Bibliography
Select a chapter:
 1 revision
Show parallels  Show headlines
Use dependency labeler
Chapter id: 1150
  • Click on a sentence to show its analysis
  • Keep the mouse pointer over a lemma to show its meanings.
tam uktavantaṃ vaidehaṃ viśvāmitro mahāmuniḥ / (1.1) Par.?
uvāca vacanaṃ vīraṃ vasiṣṭhasahito nṛpam // (1.2) Par.?
acintyāny aprameyāni kulāni narapuṃgava / (2.1) Par.?
ikṣvākūṇāṃ videhānāṃ naiṣāṃ tulyo 'sti kaścana // (2.2) Par.?
sadṛśo dharmasambandhaḥ sadṛśo rūpasampadā / (3.1) Par.?
rāmalakṣmaṇayo rājan sītā cormilayā saha // (3.2) Par.?
vaktavyaṃ na naraśreṣṭha śrūyatāṃ vacanaṃ mama // (4.1) Par.?
bhrātā yavīyān dharmajña eṣa rājā kuśadhvajaḥ / (5.1) Par.?
asya dharmātmano rājan rūpeṇāpratimaṃ bhuvi / (5.2) Par.?
sutādvayaṃ naraśreṣṭha patnyarthaṃ varayāmahe // (5.3) Par.?
bharatasya kumārasya śatrughnasya ca dhīmataḥ / (6.1) Par.?
varayema sute rājaṃs tayor arthe mahātmanoḥ // (6.2) Par.?
putrā daśarathasyeme rūpayauvanaśālinaḥ / (7.1) Par.?
lokapālopamāḥ sarve devatulyaparākramāḥ // (7.2) Par.?
ubhayor api rājendra sambandhenānubadhyatām / (8.1) Par.?
ikṣvākukulam avyagraṃ bhavataḥ puṇyakarmaṇaḥ // (8.2) Par.?
viśvāmitravacaḥ śrutvā vasiṣṭhasya mate tadā / (9.1) Par.?
janakaḥ prāñjalir vākyam uvāca munipuṃgavau // (9.2) Par.?
sadṛśaṃ kulasambandhaṃ yad ājñāpayathaḥ svayam / (10.1) Par.?
evaṃ bhavatu bhadraṃ vaḥ kuśadhvajasute ime / (10.2) Par.?
patnyau bhajetāṃ sahitau śatrughnabharatāv ubhau // (10.3) Par.?
ekāhnā rājaputrīṇāṃ catasṛṇāṃ mahāmune / (11.1) Par.?
pāṇīn gṛhṇantu catvāro rājaputrā mahābalāḥ // (11.2) Par.?
uttare divase brahman phalgunībhyāṃ manīṣiṇaḥ / (12.1) Par.?
vaivāhikaṃ praśaṃsanti bhago yatra prajāpatiḥ // (12.2) Par.?
evam uktvā vacaḥ saumyaṃ pratyutthāya kṛtāñjaliḥ / (13.1) Par.?
ubhau munivarau rājā janako vākyam abravīt // (13.2) Par.?
paro dharmaḥ kṛto mahyaṃ śiṣyo 'smi bhavatoḥ sadā / (14.1) Par.?
imāny āsanamukhyāni āsātāṃ munipuṃgavau // (14.2) Par.?
yathā daśarathasyeyaṃ tathāyodhyā purī mama / (15.1) Par.?
prabhutve nāsīt saṃdeho yathārhaṃ kartum arhathaḥ // (15.2) Par.?
tathā bruvati vaidehe janake raghunandanaḥ / (16.1) Par.?
rājā daśaratho hṛṣṭaḥ pratyuvāca mahīpatim // (16.2) Par.?
yuvām asaṃkhyeyaguṇau bhrātarau mithileśvarau / (17.1) Par.?
ṛṣayo rājasaṃghāś ca bhavadbhyām abhipūjitāḥ // (17.2) Par.?
svasti prāpnuhi bhadraṃ te gamiṣyāmi svam ālayam / (18.1) Par.?
śrāddhakarmāṇi sarvāṇi vidhāsya iti cābravīt // (18.2) Par.?
tam āpṛṣṭvā narapatiṃ rājā daśarathas tadā / (19.1) Par.?
munīndrau tau puraskṛtya jagāmāśu mahāyaśāḥ // (19.2) Par.?
sa gatvā nilayaṃ rājā śrāddhaṃ kṛtvā vidhānataḥ / (20.1) Par.?
prabhāte kālyam utthāya cakre godānam uttamam // (20.2) Par.?
gavāṃ śatasahasrāṇi brāhmaṇebhyo narādhipaḥ / (21.1) Par.?
ekaikaśo dadau rājā putrān uddiśya dharmataḥ // (21.2) Par.?
suvarṇaśṛṅgāḥ sampannāḥ savatsāḥ kāṃsyadohanāḥ / (22.1) Par.?
gavāṃ śatasahasrāṇi catvāri puruṣarṣabhaḥ // (22.2) Par.?
vittam anyac ca subahu dvijebhyo raghunandanaḥ / (23.1) Par.?
dadau godānam uddiśya putrāṇāṃ putravatsalaḥ // (23.2) Par.?
sa sutaiḥ kṛtagodānair vṛtaś ca nṛpatis tadā / (24.1) Par.?
lokapālair ivābhāti vṛtaḥ saumyaḥ prajāpatiḥ // (24.2) Par.?
Duration=0.21434378623962 secs.