Texts

athātaḥ kṛtyākṛtyavidhimadhyāyaṃ vyākhyāsyāmaḥ // (1.1) Par.?

yathovāca bhagavān dhanvantariḥ // (2.1) Par.?

tatra vayaḥsthānāṃ dṛḍhānāṃ prāṇavatāṃ sattvavatāṃ ca sucikitsyā vraṇāḥ ekasmin vā puruṣe yatraitadguṇacatuṣṭayaṃ tasya sukhasādhanīyatamāḥ / (3.1) Par.?

tatra vayaḥsthānāṃ pratyagradhātutvādāśu vraṇā rohanti dṛḍhānāṃ sthirabahumāṃsatvācchastramavacāryamāṇaṃ sirāsnāyvādiviśeṣānna prāpnoti prāṇavatāṃ vedanābhighātāhārayantraṇādibhir na glānirutpadyate sattvavatāṃ dāruṇair api kriyāviśeṣair na vyathā bhavati tasmād eteṣāṃ sukhasādhanīyatamāḥ // (3.2) Par.?

ta eva viparītaguṇā vṛddhakṛśālpaprāṇabhīruṣu draṣṭavyāḥ // (4.1) Par.?

sphikpāyuprajananalalāṭagaṇḍauṣṭhapṛṣṭhakarṇaphalakośodarajatrumukhābhyantarasaṃsthāḥ sukharopaṇīyā vraṇāḥ // (5.1) Par.?

akṣidantanāsāpāṅgaśrotranābhijaṭharasevanīnitambapārśvakukṣivakṣaḥkakṣāstanasaṃdhibhāgagatāḥ saphenapūyaraktānilavāhino 'ntaḥśalyāś ca duścikitsyāḥ adhobhāgāś cordhvabhāganirvāhiṇo romāntopanakhamarmajaṅghāsthisaṃśritāś ca bhagandaram api cāntarmukhaṃ sevanīkuṭakāsthisaṃśritam // (6.1) Par.?

kuṣṭhināṃ viṣajuṣṭānāṃ śoṣiṇāṃ madhumehinām / (7.1) Par.?

vraṇāḥ kṛcchreṇa sidhyanti yeṣāṃ cāpi vraṇe vraṇāḥ // (7.2) Par.?

avapāṭikāniruddhaprakaśasaṃniruddhagudajaṭharagranthikṣatakrimayaḥ pratiśyāyajāḥ koṣṭhajāś ca tvagdoṣiṇāṃ pramehiṇāṃ vā ye parikṣateṣu dṛśyante śarkarā sikatāmeho vātakuṇḍalikāṣṭhīlā dantaśarkaropakuśaḥ kaṇṭhaśālūkaṃ niṣkoṣaṇadūṣitāś ca dantaveṣṭā visarpāsthikṣatoraḥkṣatavraṇagranthiprabhṛtayaś ca yāpyāḥ // (8.1) Par.?

sādhyā yāpyatvamāyānti yāpyāścāsādhyatāṃ tathā / (9.1) Par.?

ghnanti prāṇānasādhyāstu narāṇāmakriyāvatām // (9.2) Par.?

yāpanīyaṃ vijānīyāt kriyā dhārayate tu yam / (10.1) Par.?

kriyāyāṃ tu nivṛttāyāṃ sadya eva vinaśyati // (10.2) Par.?

prāptā kriyā dhārayati yāpyavyādhitam āturam / (11.1) Par.?

prapatiṣyadivāgāraṃ viṣkambhaḥ sādhuyojitaḥ // (11.2) Par.?

ata ūrdhvamasādhyān vakṣyāmaḥ māṃsapiṇḍavadudgatāḥ prasekino 'ntaḥpūyavedanāvanto 'śvāpānavad udvṛttauṣṭhāḥ kecit kaṭhinā gośṛṅgavad unnatamṛdumāṃsaprarohāḥ apare duṣṭarudhirāsrāviṇas tanuśītapicchilasrāviṇo vā madhyonnatāḥ kecidavasannaśuṣiraparyantāḥ śaṇatūlavat snāyujālavanto durdarśanāḥ vasāmedomajjamastuluṅgasrāviṇaś ca doṣasamutthāḥ pītāsitamūtrapurīṣavātavāhinaś ca koṣṭhasthāḥ ta evobhayatobhāgavraṇamukheṣu pūyaraktanirvāhiṇaḥ kṣīṇamāṃsānāṃ ca sarvatogatayaścāṇumukhā māṃsabudbudavantaḥ saśabdavātavāhinaś ca śiraḥkaṇṭhasthāḥ kṣīṇamāṃsānāṃ ca pūyaraktanirvāhiṇo 'rocakāvipākakāsaśvāsopadravayuktāḥ bhinne vā śiraḥkapāle yatra mastuluṅgadarśanaṃ tridoṣaliṅgaprādurbhāvaḥ kāsaśvāsau vā yasyeti // (12.1) Par.?

bhavanti cātra / (13.1) Par.?

vasāṃ medo 'tha majjānaṃ mastuluṅgaṃ ca yaḥ sravet / (13.2) Par.?

āgantustu vraṇaḥ sidhyenna sidhyeddoṣasaṃbhavaḥ // (13.3) Par.?

amarmopahite deśe sirāsandhyasthivarjite / (14.1) Par.?

vikāro yo 'nuparyeti tadasādhyasya lakṣaṇam // (14.2) Par.?

krameṇopacayaṃ prāpya dhātūnanugataḥ śanaiḥ / (15.1) Par.?

na śakya unmūlayituṃ vṛddho vṛkṣa ivāmayaḥ // (15.2) Par.?

sa sthiratvānmahattvāc ca dhātvanukramaṇena ca / (16.1) Par.?

nihantyauṣadhavīryāṇi mantrān duṣṭagraho yathā // (16.2) Par.?

ato yo viparītaḥ syāt sukhasādhyaḥ sa ucyate / (17.1) Par.?

abaddhamūlaḥ kṣupako yadvadutpāṭane sukhaḥ // (17.2) Par.?

tribhir doṣair anākrāntaḥ śyāvauṣṭhaḥ piḍakī samaḥ / (18.1) Par.?

avedano nirāsrāvo vraṇaḥ śuddha ihocyate // (18.2) Par.?

kapotavarṇapratimā yasyāntāḥ kledavarjitāḥ / (19.1) Par.?

sthirāścipiṭikāvanto rohatīti tamādiśet // (19.2) Par.?

rūḍhavartmānam agranthim aśūnam arujaṃ vraṇam / (20.1) Par.?

tvaksavarṇaṃ samatalaṃ samyagrūḍhaṃ vinirdiśet // (20.2) Par.?

doṣaprakopādvyāyāmādabhighātādajīrṇataḥ / (21.1) Par.?

harṣāt krodhādbhayādvāpi vraṇo rūḍho 'pi dīryate // (21.2) Par.?