Texts

mārkaṇḍeya uvāca / (1.1) Par.?

tato gacchecca rājendra dārutīrthamanuttamam / (1.2) Par.?

dāruko yatra saṃsiddha indrasya dayitaḥ purā // (1.3) Par.?

yudhiṣṭhira uvāca / (2.1) Par.?

dārukeṇa kathaṃ tāta tapaścīrṇaṃ purānagha / (2.2) Par.?

vidhānaṃ śrotumicchāmi tvatsakāśāddvijottama // (2.3) Par.?

śrīmārkaṇḍeya uvāca / (3.1) Par.?

hanta te kathayiṣyāmi vicitraṃ yatpurātanam / (3.2) Par.?

vṛttaṃ svargasabhāmadhye ṛṣīṇāṃ bhāvitātmanām // (3.3) Par.?

sūto vajradharasyeṣṭo mātalirnāma nāmataḥ / (4.1) Par.?

sa putraṃ śaptavānpūrvaṃ kasmiṃścitkāraṇāntare // (4.2) Par.?

śāpāhato vepamāna indrasya caraṇau śubhau / (5.1) Par.?

prapīḍya mūrdhnā deveśaṃ vijñāpayati bhārata // (5.2) Par.?

tamuvācābhiśaptaṃ cāpyanāthaṃ ca sureśvaraḥ / (6.1) Par.?

karmaṇā kena śāpasya ghorasyānto bhaviṣyati // (6.2) Par.?

narmadātaṭamāśritya toṣayanvai maheśvaram / (7.1) Par.?

tiṣṭha yāvad yugasyāntaṃ punarjanma hyavāpsyasi // (7.2) Par.?

punarbhūtvā tu pūtastvaṃ dāruko nāma viśrutaḥ / (8.1) Par.?

saṃsevya paramaṃ devaṃ śaṅkhacakragadādharam // (8.2) Par.?

mānuṣaṃ bhāvamāpannastataḥ siddhimavāpsyasi / (9.1) Par.?

evamuktastu devena sahasrākṣeṇa dhīmatā // (9.2) Par.?

praṇamya śirasā bhūmim āgato 'sau hyacetanaḥ / (10.1) Par.?

narmadātaṭamāśritya karṣayannijavigraham // (10.2) Par.?

vratopavāsasaṃkhinno japahomarataḥ sadā / (11.1) Par.?

mahādevaṃ mahātmānaṃ varadaṃ śūlapāṇinam // (11.2) Par.?

bhaktyā tu parayā rājanyāvadābhūtasamplavam / (12.1) Par.?

aṃśāvataraṇād viṣṇoḥ sūto bhūtvā mahāmatiḥ // (12.2) Par.?

toṣayan vai jagannāthaṃ tato yāto hi sadgatim // (13.1) Par.?

eṣa tatsambhavastāta dārutīrthasya suvrata / (14.1) Par.?

kathito 'yaṃ mayā pūrvaṃ yathā me śaṅkaro 'bravīt // (14.2) Par.?

tato yudhiṣṭhiraḥ śrutvā vismayaṃ paramaṃ gataḥ / (15.1) Par.?

bhrātṝn vilokayāmāsa hṛṣṭaromā muhurmuhuḥ // (15.2) Par.?

śrīmārkaṇḍeya uvāca / (16.1) Par.?

tasmiṃstīrthe naraḥ snātvā vidhipūrvaṃ nareśvara / (16.2) Par.?

upāsya saṃdhyāṃ deveśamarcayedyaśca śaṅkaram // (16.3) Par.?

vedābhyāsaṃ tu tatraiva yaḥ karoti samāhitaḥ / (17.1) Par.?

so 'śvamedhaphalaṃ rājaṃllabhate nātra saṃśayaḥ // (17.2) Par.?

tasmiṃstīrthe tu yo bhaktyā bhojayed brāhmaṇāñchuciḥ / (18.1) Par.?

sa tu viprasahasrasya labhate phalamuttamam // (18.2) Par.?

snānaṃ dānaṃ japo homaḥ svādhyāyo devatārcanam / (19.1) Par.?

yatkṛtaṃ śuddhabhāvena tatsarvaṃ saphalaṃ bhavet // (19.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe dārukatīrthamāhātmyavarṇanaṃ nāma ṣaṭtriṃśo 'dhyāyaḥ // (20.1) Par.?